Read Timugon Murut 1 SAMUIL 31 Bible Online

1 SAMUIL 31 - Timugon Murut bible

1 SAMUIL 31

¹Liliwa' raginio ulun ru Palistin mangayou ra ulun ru Israil giu' ra Gunung Gilboa. Masuang ulun ru Israil pinatoi ra giu' no. Ulun ru Israil ra bokon, nakaaya' Raja' Saul am anak-anak ungkuyon nano nagigiru'.

²Kaa' ulun ru Palistin nangilou risilo am namatoi ra talu ngaulun anak ungkuyon ru Raja' Saul, iono i Jonatan, Abinadab am i Malkisua.

³Pangayawan paat raginio moporos kaga' giu' ra libung ru Raja' Saul saboi io galama' napilatan ra masaran natiu' ra panah ru pantula'.

⁴Kon ru Raja' Saul ra ulun nagibit ra kinandoi nano, “Butuso' ilang muno am potoyo' aku no, maa' raginio pai' ru ulun ru Palistin ondo' kalo nakaulig ri Aki Kapuuno' ti mangkukuli raki', am mamatoi raki'.” Kaa' ulun magibit ra kinandoi no kalo makakau' mambaal raginio. Ginio ra butuso' ru Raja' Saul ilang nano am tobok io galama'.

⁵Pakakito ulun magibit ra kinandoi no ra Raja' Saul no minatoi noyo, io niayuk timinobok galama' am minatoi narumar ra Raja' Saul.

⁶Kon raginio noyo Raja' Saul am talu ngaulun anak ungkuyon nano minatoi, am niayuk ulun magibit ra kinandoi no, am ngaangai' ulun ru Raja' Saul minatoi ra orou raginio.

⁷Pokorongog ulun ru Israil ondo' giu' ra sandaup ru Limayak Jijriil am giu' ra tampilon ru Sungoi Jordan ra nagigiru' noyo saujor ru Israil, am ra Raja' Saul am anak-anak ungkuyon nano minatoi noyo, ilo pana nangiruan ra bandar nilono am nagigiru'. Kopongo raginio minatong ulun ru Palistin am ayan ra bandar-bandar no.

⁸Suabon raginio, ulun ru Palistin nanalingaau ra kuliamos ondo' soroi ra baangkai ru ulun ru Israil. Kopongo raginio natuum nilo baangkai ru Raja' Saul am talu ngaulun anak ungkuyon nano giu' ra Gunung Gilboa.

⁹Nanginggulu' ilo ra ulu ru Raja' Saul am nangalap ra bayang pangayawan nano. Kopongo raginio nangator ulun ru Palistin ra ulun sinusub mongoi ra titikop pagun ru Palistin koson mampasaboi ra tanou moonsoi no ra ngaangai' sinungkalalaing nilono am mamagun nilono.

¹⁰Kopongo raginio bayang pangayawan ru Raja' Saul no binulian ra ralalom ru Kuil Dewi Asyitorit, am inan nano pinakuan ra timbok ru bandar Bit-Sian.

¹¹Pokorongog mamagun ru Jabis giu' ra Giliad ra baal ondo' binaal ru ulun ru Palistin ra Raja' Saul,

¹²kukula' ngaulun ondo' baani kaga' minugar am nangkiralan ra buoi ru rondom minongoi ra Bit-Sian. Pinatuun nilo baangkai ru Raja' Saul am anak-anak ungkuyon nano intor ra timbok ru bandar, am inibit ginilo saguli' ra Jabis, am sinolob ngaangai' baangkai no ra giu' no.

¹³Kopongo raginio inumung nilo ngaangai' bungul no am linobong ginilo ra saau ru puun tamariska giu' ra bandar Jabis, am nampali ilo ra buoi katuluan.