Read Timugon Murut 1 SAMUIL 5 Bible Online

1 SAMUIL 5 - Timugon Murut bible

1 SAMUIL 5

¹Kopongo ulun ru Palistin napagaau ra Kaban Nabantuan, inibit nilo ginio intor ra Ibin-Gaijir minongoi ra Asdod, bandar nilono.

²Giu' ra bandar no, inibit nilo Kaban Nabantuan no pinaumpos ra kuil Dagon, dewa nilono. Pinabanta' nilo Kaban no ra sapapa' ru dewa sinungkalalaing no.

³Suabon no ra iosusuab, paat mamagun ru Asdod minongoi ra kuil no, nakito nilo sinungkalalaing Dagon nakakubu ra tana' giu' ra saang ru Kaban Nabantuan ru TUHAN. Kopongo raginio kinayang nilo sinungkalalaing no am pinasaguli' ra intok nano.

⁴Paat ra suabon raginio iosusuab, nakito nilo sinungkalalaing no naratu' poyo ra saang ru Kaban Nabantuan. Raino ti ulu ru sinungkalalaing no am karuruo longon nano naputul am nakabanta' ra kulobon no; inan ayuk boo ru sinungkalalaing no lakat poyo soroi. (

⁵Ginio sabap ra saboi raino ti giu' ra Asdod imam ru Dagon am ngaangai' ru sumamba riso no lumandang ra kulobon ru kuil Dagon am kalo kuminjang raginio.)

⁶Nangukum TUHAN ra mamagun ru Asdod ra maagat kaga', am napakalalaa' risilo. Nangukum io risilo am mamagun giu' ra libung ra paginggaar no ra lumanit-lanit ra inan nilono.[12]

⁷Paat ilo nakakito ra atan ondo' tatanga' masauk no, indagu ilo, “I Aki Kapuuno' ru Israil no nangukum ritakau am i Dagon dewa takano. Pai' takau polosoo' Kaban Nabantuan no soroi poyo ragiti.”

⁸Ginio ra nampiau ilo ra kalilimo ngaulun raja' ru Palistin ra tumimung, am pangkuot, “Atan kinua' moonsoi baalon takau ra Kaban Nabantuan ri Aki Kapuuno' ru ulun ru Israil no?” Taam raja'-raja' no, “Pabandingo' Kaban no ra bandar Gat.” Kaban no pana pinabanding boo ra Gat, rondo' bandar ru Palistin ra bokon.

⁹Kaa' kalupus Kaban no nakasaboi ra giu' no, nangukum TUHAN ra mamagun ru bandar raginio niayuk am napatabual ra baal ondo' makaimamang kaga'. Nangukum TUHAN ra ngaangai' ru mamagun ra lumanit-lanit ra inan nilo, iou ra ulun mamulok am poyo ra ulun matutuo.

¹⁰Ginio ra inataran nilo Kaban Nabantuan no ra Ikron, rondo' bandar ru Palistin ra bokon poyo. Kaa' paat Kaban no nakasaboi ra giu' no, indagu mamagun ru bandar no, “Ilai' noyo, nagibit ilo ra Kaban Nabantuan ri Aki Kapuuno' ru Israil no ragiti koson mamatoi ritakau ngai'!”

¹¹Ginio ra nampiau ilo ra ngaangai' raja' ru Palistin tumimung, am indagu, “Atarin min Kaban Nabantuan ri Aki Kapuuno' ru Israil no ra intok toojo nali, maa' raginio kalo makapamatoi ritakau am sasambaloi takau.” Ngaangai' mamagun ru bandar no maimamang sabap ra i Aki Kapuuno' nangukum risilo ra maagat kaga'.

¹²Ulun ondo' kalo minatoi, natiu' ra maruol lumanit-lanit saboi mamagun ru bandar no giminolok makiindangan ra dewa-dewa nilo.