Read Timugon Murut 1 SAMUIL 6 Bible Online

1 SAMUIL 6 - Timugon Murut bible

1 SAMUIL 6

¹Kopongo ra Kaban Nabantuan ru TUHAN no soroi ra pagun ru ulun ru Palistin buoi tulu' ngansila',

²nampiau ulun ru Palistin ra imam-imam am ulun-ulun mapandai kaga' ra sihir, am pangkuot, “Atan kinua' baalon takau ra Kaban Nabantuan ru TUHAN no? Amon ru pasagulion takau Kaban no ra intok nali, atan kinua' kuliamos ondo' musiti' pabayaan raginio?”

³Taam ilo, “Pai' min pasagulio' Kaban Nabantuan ri Aki Kapuuno' ru Israil no ra kolondo' paayaan ra atan pana taak ra tayar Riso no. Moonsoi Kaban no bayain ra taak ru tayar ra mamuso ra tula takau. Koon raginio noyo ra akau babason, am makapandai kau boo ra sasaban ri Aki Kapuuno' no mararayus mangukum ramuyun.”

⁴Pangkuot poyo ulun ru Palistin, “Taak ra atan kinua' ondo' moonsoi pootoron takau?” Taam ilo, “Atari' min limo lanit ra binaal-baal intor ra mas am niayuk limo tikus binaal-baal intor ra mas, nogondo' ra suang ru raja' ru Palistin. Baal makalalaa' ondo' nogondo' nakalumpa' noyo ramuyun ngaangai', iou ra mamagun am poyo ra raja'.

⁵Musiti' takau mambaal ra binaal-baal intor ra lanit-lanit am tikus ondo' tatanga' kumokot malarom ra pagun minti. Koon raginio noyo akau manaak ra pangurumatan ri Aki Kapuuno' ru Israil. Maaru' lair lumonggo' Io mangukum ramuyun, dewa am tana' mino.

⁶Atan onong no ra akau bambalingatan koson ra raja' ru Misir am mamagun nano ragili? Pai' min liliani' pinamakuan ri Aki Kapuuno' ra nangnganja' risilo, saboi nasuraan ilo am nopoloso ra ulun ru Israil nangiruan ra Misir.

⁷Ginio sabap ra panampos kano ra rondo' padati ondo' baguon am ruo ngainan sapi' ondo' tatanga' mapatiti' ra anak, am ondo' kalo igondo' pinakai maparalaat ra padati no. Rukugi' noyo karuruo ngainan sapi' no ra padati no, am uyungo' anak-anak ru sapi' no sumaguli' ra kandang.

⁸Mopongo raginio alapo' min Kaban Nabantuan ru TUHAN, posokoyo' ginio ra rasawat ru padati no, am sapapa' no pabantaa' min kaban ondo' sinuangan ra kuliamos mas ondo' moonsoi pataakon min ra TUHAN ra tayar mamuso ra tula mino. Polosoo' noyo padati no am sapi' no mugar galama'.

⁹Ilain min ati angayan ru sapi' no; amon ru Kaban Nabantuan no ibiton mongoi ra pagun toojo nano, giu' ra bandar Bit-Simis, baal ragitio makaarati' ra i Aki Kapuuno' ru ulun ru Israil naparatong noyo ra karaat makalalaa' kaga' ritakau. Kaa' amon ru padati no kalo mongoi ra giu' no, makapandai takau ra baal makalalaa' raginio sala' ka intor ri Aki Kapuuno' ru Israil, kaa' nakainamot ayuk.”

¹⁰Sinugut ru ulun-ulun ru Palistin; nangalap ilo ra karuruo ngainan sapi' ondo' tatanga' mapatiti' ra anak, am parukugo' karuruo ngainan sapi' no ra padati no, am anak-anak ru sapi' no boo inaput ralalom kandang.

¹¹Kopongo raginio pinasakoi Kaban Nabantuan no ra rasawat ru padati, pinabaya' ra kaban ondo' sinuangan ra tikus binaal-baal intor ra mas am lanit-lanit ra binaal-baal intor ra mas.

¹²Narayus sapi'-sapi' no minugar sumaboi ra tampilon Bit-Simis; nampangaa' sapi'-sapi' no liliwa' narayus ugar, ra kalo liminisang ra kait kapoam ra pamiris intor ra ralan maayo. Kalilimo ngaulun raja' ru Palistin no narayus nanunu' ra sapi'-sapi' no saboi ra balitan ru bandar Bit-Simis.

¹³Paat raginio mamagun ru Bit-Simis tatanga' mangkumos ra gandum giu' ra limayak. Paat ra ilo nakakito ra Kaban Nabantuan no, mapara' boo bansuk nilo!

¹⁴Minuog padati no mamaar ra rondo' batu maayo giu' ra umo ri Josua, sangulun mamagun ru Bit-Simis. Mamagun ru bandar no nampalapak ra padati tataun no am nanimbalui ra ruo ngainan sapi' no, am pataako' ngaangai' no ra tayar ru taak simbalui koson mapabansuk ra guang ru TUHAN.[13]

¹⁵Kopongo raginio pinatuun ru ulun-ulun ru Liwi Kaban Nabantuan ru TUHAN no am kaban ondo' makasuang ra kuliamos mas no. Pinabanta' nilo ngaangai' no ra rasawat ru batu maayo ra giu' no. Kopongo raginio, mamagun ru Bit-Simis napataak ra taak simbalui koson mapabansuk ra guang ru TUHAN am taak simbalui ra bokon ra TUHAN.

¹⁶Paat ra kalilimo ngaulun raja' ru Palistin no nakakito ra ngaangai' kasaukan no, uli' ilo ra Ikron ra orou raginio niayuk.

¹⁷Napakirim ulun ru Palistin ra limo lanit ra binaal-baal intor ra mas ra TUHAN, ra tayar ru taak mamuso ra tula, sangunor ra tayar ru moonong bandar ragitilo: Asdod, Gaja, Askilon, Gat am Ikron.

¹⁸Napakirim ilo niayuk ra tikus binaal-baal intor ra mas, rondo' ra tayar ru moonong bandar ondo' pinarinta ru limo ngaulun raja' ru Palistin no, iou ra bandar ondo' makatimbok am pekan ondo' kolondo' timbok. Inono' ru kasaukan raginio iono batu maayo intok napabantaan nilo ra Kaban Nabantuan ru TUHAN no. Saboi ra orou raiti' pana batu no lakat poyo soroi giu' ra umo ri Josua, ulun ru Bit-Simis no.

¹⁹Namatoi TUHAN ra tulu' ngoopor ngaulun mamagun ru Bit-Simis sabap ra inilayan nilo ralalom ru Kaban Nabantuan no. Ginio ra nangulir mamagun ru bandar no sabap ra linumpa' ilo ru TUHAN ra baal makalalaa' kaga'.

²⁰Indagu mamagun ru Bit-Simis, “Osoi kinua' masaga' muma' ra TUHAN Aki Kapuuno' ondo' matulai no? Ati kinua' boo pangataran takau Riso maa' raginio maalur intor ritakau?”

²¹Nangator ilo ra kukula' ngaulun maa' raginio mambala' ra mamagun ru Kiryat-Jiarim, “Pinasaguli' noyo ru ulun ru Palistin Kaban Nabantuan ru TUHAN no. Ratong kano mangalap ra Kaban no.”