Read Timugon Murut 1 SAMUIL 8 Bible Online

1 SAMUIL 8 - Timugon Murut bible

1 SAMUIL 8

¹Paat ra i Samuil matutuo noyo, pinili' no anak-anak nano masauk ra akim giu' ra Israil.

²Anak nano ra katuaan makainggalan ri Joil am ondo' karuo no makainggalan ri Abia. Karuruo no nasauk ra akim giu' ra Birsyiba.

³Kaa' kalo namaya' ilo ra ama' nilono. Naguyum ilo ayuk ra kalabaan galama'; nangapu ilo ra rasua am nangakim ra mamagun ra kalo matanda'.

⁴Kopongo raginio ngaangai' mamagun ru Israil timinimung am minuma' ri Samuil giu' ra Rama.

⁵Indagu ilo risilo, “Rongogo' tuan, matutuo kou noyo am anak-anak muno kalo namaya' rirun. Ginio ra moonsoi poyo pilion mu sangulun raja' ra tayar mai, maa' raginio akai ti pana mokoondo' sangulun raja' koson ra bansa'-bansa' ra bokon.”

⁶Kalo naansayan i Samuil ra kitaakon nilono, am nakiasi' io ra TUHAN.

⁷Indagu TUHAN riso, “Suguto' noyo ngaangai' ru kitaakon nilono. Sala' ka okou ondo' impayin nilono; sotopot no, Aku ti noyo raja' nilo ondo' impayin nilono.

⁸Intor ra Aku nagibit risilo miningkual intor ra Misir, tinalikuran nilo noyo Aku am siminamba ra dewa-dewa. Raino, atan ondo' binaal nilo rirun, masalok nilo noyo baalon Raki' niayuk.

⁹Ginio ra suguto' noyo kitaakon nilono; kaa' anii' ilo ra papakaraan ra malasang, am balai' noyo ra baal pamakuan ru raja' nilono risilo ra maagu no.”

¹⁰Pinasaboi ri Samuil ngaangai' ragu ru TUHAN no ra ngaangai' ru ulun ondo' nakitaak sangulun raja' no.

¹¹Nambala' i Samuil, “Gitio noyo baal pamakuan ru raja' mino ramuyun ra maagu no. Alapon ru raja' no anak ungkuyon mino koson pasaukon ra saujor. Mokoondo' ondo' masauk ra pulalai ru mangkarita' kuda, mokoondo' poyo ondo' masauk ra pulalai ru mangkuda, mokoondo' poyo ondo' masisimbul ra saang ru kurita' kuda ru raja' no.

¹²Mokoondo' ondo' pasaukon ra tingganai ru pulalai ra saribu ngaulun saujor, am mokoondo' poyo tingganai ru pulalai ra limo ngoopor ngaulun saujor. Jajalin ru raja' no anak ungkuyon mino maparagus ra umo nano, mangkumos ra ampos ru tinanom nano, am mambaal ra kinandoi am niayuk kuliamos ra tayar ru kurita' kuda ru raja'.

¹³Anak ruandu' mino susubon mambaal ra umau maamis owou, am pongondoyon koson ra mangngansak am niayuk mambaal ra ruti' ra tayar ru raja'.

¹⁴Alapon ru raja' no umo, umo ru anggur mino, am umo ru puun jaitun mino ra moonsoi kaga' no, am pataakon ngaangai' no ra pagawai-pagawai nano.

¹⁵Umo am umo ru anggur mino kitaakin ra cukai mopor piatus intor ra ampos no, am paatakon ru raja' ginio ra pagawai-pagawai am pagawai ru saujor ru raja' no.

¹⁶Alapon ru raja' no ulipon am bibiag tinambiag[15] mino ondo' moonsoi kaga', am niayuk kaladai mino, am pakayon ngaangai' no koson ra kandoi ru raja' no.

¹⁷Alapon ru raja' no mopor piatus intor ra ngaangai' bibiag tinambiag mino. Mulu' poyo ra akau galama' masauk ra ulipon ru raja' no.

¹⁸Paat raginio mambutok kau sabap ra raja' mino, raja' ondo' pinili' mino galama'. Kaa' kalo lioon ru TUHAN butok mino.”

¹⁹Kalo lioon ru ulun ru Israil ragu ri Samuil no, kaa' konilo, “Polosoon noyo! Totopot akai masaga' ra sangulun raja'.

²⁰Masaga' akai masauk koson ra bansa'-bansa' ra bokon. Raja' maino mamarinta ramon am maningganai ramon ralalom ru pangayawan.”

²¹Norongog ri Samuil ngaangai' ru ragu nilono, am pabalaa' no ginio ra TUHAN.

²²Taam TUHAN, “Suguto' noyo kitaakon nilono. Pilio' noyo sangulun raja' ra tayar nilo.” Kopongo raginio sinusub ri Samuil ngaangai' ulun ru Israil minuli' ra baloi ru sigagama'.