Read tiv Genese 19 Bible Online

Genese 19 - tiv bible

Genese 19

¹Mbatyomov mba uhar mbala za ar hen Sodom aikighe; yô, Loti tema hen hundagar u Sodom; Loti nengen a ve yô, a mough a za kegh ve gbenda, a ngurum, a wa ityough inya,

²a kaa er: Ne uter av, shi kaha nen, nyôr nen hen ya u wanakiriki wen, tsa nen, ôô nen angahar, tsô né va mough pepe né yem; kpa ve kaa er: Ei, ka hen tembe sé tsa ye.

³A zamber a ve tsung; tsô ve goom her a na, ve nyôr hen ya na; un kpaa a yôr ve iwer, a kaa bredi u i we kwa sha mi ga yô, ve ya.

⁴Kpa er ve lu a yav ga je tsô, ior mba hen gar la, Mbasodom, ve kase ya la, mbayevikaior kua mbatamen kpaa, ior ca ca cii;

⁵ve gba yilan Loti, kaan a na er: Ior mba ve ve hen a we tugh ne yô, mba hana? Due a ve, va a ve hen vese heen, se̱ fa ve.

⁶Tsô Loti due za hen ve, gema uwegh wuhe hunda ken ijime.

⁷A kaa er: Anmgbianev av, de eren nen ifer nahan ze he!

⁸Nenge, mo m ngu a ônov mba kasev uhar mba ve lu a fa nom ga yô; yô shi de nen, m̱ due ne a ve, er nen a ve er i sar ne yô, kpa ior mban yô, de eren nen ve kwagh ga, sha er ve va nyer hen haav av yô.

⁹Ve kaa er: Kpela keela. Shi ve kaa er: Or ne va shir tsô, man gema ngu veren iyol er un ngu orjir; yô, sé er u kwagh u bo á hemba u ve. Tsô ve imbishi or la, ka Loti je la, ve kporom sha u vihin hunda.

¹⁰Kpa ior mbala naregh uwegh vegh, kôr Loti nyôr a mi, va kohol ve ken iyou, maa ve wuhe hunda.

¹¹Tsô ve pir mba hen hunda u ya la ashe, mbakiriki kua mbatamen cii; ve ker hunda je ve vôr.

¹²Tsô ior mbala kaa a Loti er: Ior mbagenev kpaa mba u heene? Wankem man ônov ou mba nomso man mba kasev mba u lu a mi hen gar cii, due a ve hen ijiir ne kera;

¹³gadia timin yase ijiir ne, sha ci u mliam ma i vaa ve gba ikôr sha ishigh ki TER, nahan TER tindi se sha u se̱ va tim i.

¹⁴Tsô Loti due ôr kwagh a ônov nav mba kemev mba ve sôôr ônov nav yô, a kaa er: Mough due nen hen ijiir ne kera; gadia TER timin gar ne je ne; kpa ônov nav mba kemev yô, lu ve er ka asenge a eren yô.

¹⁵Sev mbu av yô, mbatyomov gba torough a Loti kaan er: Mough kua kwase wou man ônov ou mba kasev mba uhar mba ve lu heen ne, sha er ú tim sha ibo i gar ne ga yô.

¹⁶Kpa a er zô zô; ior mbala kôr un sha uwe kua kwase na man ônov nav mba kasev uhar, gadia Aôndo lu zungwen un mhôônom; ve due a na, ve ver un ken akôngo a gar.

¹⁷Tsô zum u ve due a ve ken won yô, A kaa a ve er: Yevese war, de gem ashe ijime ga, gbulumaa ne cii kpaa, de til her ga, yevese yem sha uwo, sha er ú tim ga yô.

¹⁸Loti kaa a na er: Ku, nahan ga, TERE!

¹⁹Nenge, doo U a wanakiriki wou, U zungwem je, er U yem uma wam yô; kpa me fatyô u yevese za waren sha uwo la ga; gadia kwaghbo una kohol mo sha gbenda, me kpe.

²⁰Shi nenge, gar ne ngu heen ikua ikua u yevese za waren ker, ka u kiriki je. Yô, shi de, m̱ za ker, ka u kiriki tsô gaa? Uma wam a̱ war.

²¹A kaa a na er: Yô, sha kwagh ne kpaa, M rumun we ve, Me tim gar u u kaa la ga.

²²Er fefa, yem ker, gadia Me fatyô u eren ma kwagh ga, saa u nyôr ker ve. Ka nahan man i yila gar la er Soar ye.

²³Zum u Loti ar ken Soar la yô, iyange vande kôndon sha ve.

²⁴Tsô TER er sulfur man usu due sha TER Sha, haa sha Sodom man Gomora.

²⁵A tim agar la, man gbulumaa la cii, man mba ve lu ken agar la cii kua akaamenden a hen inya kpaa.

²⁶Kpa kwase na u a lu un ken ijime la gema ashe ijime, maa a hingir icebar.

²⁷Tsô Aberaham mough pepe za her ape yan tile sha ishigh ki TER la;

²⁸te ashe nengen ken ian i Sodom man Gomora kua gbulumaa u tar la cii yô, a nenge mnyim hen inya lu kôndon sha, er ka mnyim ma duen ken atse yô.

²⁹Shighe u Aôndo timin agar a hen gburumaa la, Aôndo umbur Aberaham, A er Loti due ken mtim la kera, zum u lu timin agar a Loti tema ker la.

³⁰Loti due ken Soar tema sha uwo, a ônov nav mba kasev uhar a na imôngo; gadia lu cian u teman ken Soar; a tema ken bar, un kua ônov nav mba kasev uhar mbala.

³¹Tsô u vesen la kaa a u kiriki la er: Ter wase bee iyol, man ma or nan kera ngu sha tar u nana va hen vese inja i ior ve eren sha tar ga.

³²Va, sé er ter wase a̱ ma wain; yô, sé yav a na sha u sé ver ter wase tse yô.

³³Tsô ve er ter ve ma wain hen tugh mbula; nahan u iunda la nyôr za yav a ter na; kpa a fa myav na ga, shin mmough na kpaa ga.

³⁴Tsô kper nan yô, u vesen la kaa a u kiriki la er: Nenge, nyen tugh m yav a terem; yô, shi sé er un a̱ ma wain tugh mbun kpaa, we kpaa, nyôr yav a na, sha u sé ver ter wase tse yô.

³⁵Tsô ve er ter ve ma wain hen tugh mbula kpaa; wen ukiriki la nyôr yav a na. Kpa a fa myav na ga, shin mmough na kpaa ga.

³⁶Nahan ônov mba Loti uhar cii, ve wa iyav a ter ve.

³⁷U iunda la mar wannomso, a ii un iti er, Moabi. Ka un je a lu ter u Mbamoabi zan zan nyian ye.

³⁸U kiriki la kpaa mar wan, a ii un iti er Benami. Ka un a lu ter u ônov mba Amon zan zan nyian ye.