Read tiv Genese 21 Bible Online

Genese 21 - tiv bible

Genese 21

¹Tsô TER va sôr Sara er lu kaa nahan; TER er Sara kwagh u A vande teren la.

²Sara wa iyav mar Aberaham wannomso er a bee iyol nahan kpaa, sha shighe u Aôndo lu kaa un la vough.

³Aberaham ii wan na u i mar un la, ka u Sara mar un je la, iti er Isaka.

⁴Aberaham tsôngo wan na Isaka zum u a kuma ayange anigheni yô, er Aôndo kaa un nahan.

⁵Aberaham lu anyom deri zum u i mar un wan na Isaka la.

⁶Man Sara kaa er: Aôndo erem m hingir ahanzwa, hanma or u nan ongo kpaa, ahan á gba nan zwa sha kwagh wam ne.

⁷Man a kaa er: Ka an man nan fetyô u kaan a Aberaham er: Sara una va ambe ônovo? Gadia m mar un wan er a bee iyol nahan kpaa.

⁸Wan la vese, de atumba. Tsô Aberaham er zegeiniongo sha iyange i Isaka de atumba la.

⁹Tsô Sara ta ashe za nenge wan u Hagar Wanigipiti, u a mar Aberaham la, lu numben;

¹⁰nahan a kaa a Aberaham er: Zenda kpankwase ne vea wa na; wan u kpankwase ne a̱ de ye dyako vea wan wam Isaka imôngo ga.

¹¹Kwagh la lu Aberaham kwagh u vihin tsung, gadia lu wan na je.

¹²Kpa Aôndo kaa a Aberaham er: Kwagh ne a̱ de kera vihin we sha ci u wan ne kua kwase wou ne kpaa ga; kwagh u Sara a kaa u cii, ungwa imo na, gadia ka ken Isaka je á va yilan er tsombor wou ye.

¹³Wan u kpankwase ne kpaa, Me er un una lu ikurior, sha ci u a lu vor wou yô.

¹⁴Tsô Aberaham mough pepe pepe, tôô bredi man isheghmnger, na Hagar, penda un sha vande kua wan la kpaa, maa a na un gbenda a yem. A mough a gba zenden wue wue ken desereti u Bersheba.

¹⁵Mngerem ma ken ishegh mara ma been yô, a gema wan a gbir hen ihuu.

¹⁶Tsô a kar a za tema ca er ikeren i ivaan yô; gadia a kaa er: Me nenge ku u wan ne ga. A za tema ken hemen kpuaa, a hembe mliam a gba vaan.

¹⁷Kpa Aôndo ungwa mliam ma wan la; tsô ortyom u Aôndo yila Hagar Sha, kaa a na er: Ka nyi i er uwe, Hagar? De cie ga, gadia Aôndo ungwa imo i wan henpe a lu la.

¹⁸Mough kôr wan la wa un sha ikum, gadia Me gema un una hingir ikurior i vesen.

¹⁹Tsô Aôndo bugh un ashe, a nenge a ijôr, a za iv mngerem shin ishegh, a na wan la, ma.

²⁰Aôndo lu a wan la, lu vesen; a maa a tema ken desereti, a hingir or u keren avaan.

²¹A tema ken desereti u Paran; ngô na er kwase ken tar u Igipiti na un.

²²Hen shighe la, Abimeleki man Pikol, kurutya u ikumutya na, ôr kwagh a Aberaham, kaa er: Aôndo ngu a we ken akaa a u eren cii.

²³Yô, ma u shi bum a mo heen, sha ishigh ki Aôndo wer, ú kera er a mo dang ga, shin a ônov av, shin a tsombor wam kpaa ga; kpa sha erdoo u m er a we yô, kape we kpaa ú er a mo je la, kua a tar u u lu shir her ne kpaa.

²⁴Aberaham kaa er: Me bum.

²⁵Tsô Aberaham zôhô a Abimeleki sha kwagh u ijôr i mbatomov mba Abimeleki ngohol sha apera la.

²⁶Abimeleki gema kaa er: M fa or u nan er kwagh ne ga; we kpaa u kaam ga, mo kpaa, m ungwa ga, saa nyian.

²⁷Tsô Aberaham kôr iyôngo man abua, na Abimeleki; ve uhar ve ya ikur.

²⁸Aberaham tsegha utulembaiyôngov utaankaruhar ken uile.

²⁹Tsô Abimeleki pine Aberaham er: Inja i utulembaiyôngov utaankaruhar mba u tsegh ne yô, ka nyi?

³⁰A kaa er: Utulembaiyôngov utaankaruhar mban, ngohol ve sha ikev yam, i̱ hingir mo ikav er i lu mo m tim ijôr ne yô.

³¹Kape i lu man i yer ijiir la iti er Bersheba la; gadia ka heregh man ve uhar cii ve bum ye.

³²Kape ve ya ikur hen Bersheba la. Nahan Abimeleki mough vea Pikol kurutya na, ve hide ken tar u Mbafiliti.

³³Tsô Aberaham môôr kon u tsamia hen Bersheba, hen ijiir la, a yila sha iti i TER, Aôndo u tsôron.

³⁴Aberaham lu shir ken tar u Mbafiliti ayange kpishi.