Read tiv Genese 22 Bible Online

Genese 22 - tiv bible

Genese 22

¹Tsô ken masetyô u akaa ne yô, Aôndo kar Aberaham, kaa a na er: Aberaham! A kaa er: Een.

²A kaa er: Tôô Isaka wan wou u môm môm u a doo u ishima la, yem ken tar u Moria, za na nagh ku nanden a mi sha uwo ugen u Me tese u yô.

³Tsô Aberaham mough pepe pepe kange jaki na shidi; a mough a mbayev nav uhar kua Isaka wan na; a ar ikon sha ci u nagh ku nanden; a gba zan hen ijiir i Aôndo tese un la.

⁴Sha iyange i sha utar la, Aberaham ta ashe za nenge a ijiir la ca je.

⁵Tsô Aberaham kaa a mbayev nav mbala, er: Lu nen heen a jaki, mo vea wanakiriki ne sé za shara, sé za civir Aôndo man sé hide sé va kohol ne ye.

⁶Aberaham tôô ikon i nanden nagh penda wan na Isaka sha vande, un iyol na yô, kôr usu man ihô sha uwe; tsô ve uhar cii, ve gba yemen imôngo.

⁷Nahan Isaka ôr kwagh a ter na Aberaham kaa er: Terem. A rumun er: Een, wan wam. A kaa er: Usu ngun man ikon kpaa ngin, man waniyôngo u á za nande nagh a mi yô, ngu hana?

⁸Aberaham kaa er: Aôndo Una na waniyôngo u nanden nagh a mi iyol Na, wan wam; tsô ve gba yemen imôngo ve uhar cii.

⁹Nahan ve za ar hen ijiir i Aôndo kaa un la; Aberaham ta atse heregh, a wa ikon vôôr vôôr, akange wan na Isaka a penda un sha atse, sha ikon la.

¹⁰Tsô Aberaham za uwegh tôô ihô sha u una sôngo wan na.

¹¹Kpa ortyom u TER yila un Sha, kaa er: Aberaham! Aberaham! A rumun er: Een.

¹²A kaa er: De ze uwegh ough sha wanakiriki ga, shi de eren un ma kwagh kpaa ga; gadia hegen yô, M fa u ngu or u cian Aôndo sha er u nyumum wan wou u môm môm kpaa ga yô.

¹³Aberam kenden ashe sha yô, a nenge nomiyôngo ken ijime na wever akor ken ageva. Tsô Aberaham za, za kôr iyôngo la, va na nagh ku nanden a mi sha ityough ki wan na.

¹⁴Aberaham maa ii ijiir la iti er Yehova-yire (TER Una na kwagh u a gbe yô); ka nahan man zan zan nyian i kaan er: Sha uwo u TER yô, á na kwagh u a gbe yô.

¹⁵Ortyom u TER yila Aberaham Sha, myer u sha kwa har,

¹⁶kaa er: TER kaa er: M bum iyol Yam je, er u er kwagh ne nahan, u nyumum wan wou u môm môm ga yô,

¹⁷Me ver u doo doo, Me seer tsombor wou iyenge er asan a Sha man er waarawa u shin kpezegemnger nahan; tsombor wou ua ngohol hundagar u mbaihomov mba u, ua hingir u ve;

¹⁸nahan akuraior a sha won cii aa zua a iveren ken tsombor wou, sha ci u, u we imo Yam iko yô.

¹⁹Tsô Aberaham hide va kohol mbayev nav; ve mough ve hide imôngo hen Bersheba; Aberaham maa tema hen Bersheba.

²⁰Tsô ken masetyô u akaa ne yô, i va kaa a Aberaham er: Nenge, Milka un kpaa a mar anngôu Nahor, ônov;

²¹wan na u iunda ka Use man anngô na Buse, man Kemuel ter u Aram,

²²man Kesedi man Haso man Pilda man Yidela man Betuel;

²³Betuel gema mar Rebeka. Mba anigheni mban, Milka mar ve a Nahor anngô u Aberaham.

²⁴Kwase u sha uika u i yilan un iti er Reuma la, mar Tebaha man Gaham man Tahashi kua Maaka.