Read tiv Genese 24 Bible Online

Genese 24 - tiv bible

Genese 24

¹Aberaham bee iyol, a tsa sha won. TER lu veren Aberaham doo doo sha akaa cii.

²Nahan Aberaham kaa a wanakiriki na u vesen u hen ya na, u akaa na cii lu sha ikev na la, er: Shi verem uwegh ough hen ikooso;

³yô, m̱ er a we, bum TER, Aôndo u Sha man Aôndo u tar, wer, ú er wan wam kwase ken ônkasev mba Mbakanaan, mba m tem hen ve ne, ga;

⁴kpa ú za ken tar wam, ken ityô yam, ka keela man ú za er wan wam Isaka kwase ye.

⁵Wanakiriki na la, gema kaa a na er: Alaghga kwase la una rumun u van a mo imôngo ken tar ne ga; nahan yô, m̱ hide a wan wou ken tar u u dugh la zee?

⁶Aberaham kaa a na er: Ver ishima, de kera hidi a wan wam keela ga.

⁷TER, Aôndo u Sha, u A due a mo hen ya u terem, ken tar u i marem la, A ôr kwagh a mo man A bum a mo, A kaa er: Me na tsombor wou tar ne; ka Un je Una tindi ortyom Na Una hemen we, ú za er kwase keela ú na wan wam ye.

⁸Man aluer kwase la una rumun u van a we imôngo ga yô, ú lu a ishô sha mbum wam ne; saa di mhir tsô, ú hire a wan wam keela ga ye.

⁹Tsô wanakiriki la ver ter na Aberaham uwegh hen ikooso, bum a na sha kwagh la.

¹⁰Nahan wanakiriki la kôr urakumi pue ken urakumi mba ter na, maa a mough; a tôô hanma injakwagh i dedoo i ter na; tsô a kôr gbenda a gba yemen ken Mesopotamia, hen gar u Nahor.

¹¹A er urakumi ve gure inya ken akôngo a gar, hen kpejôr, aikighe, shighe u kasev ka ve zan mngerem ma za kesen la.

¹²A kaa er: TERE, Aôndo, u terem Aberaham, ma U shi doom ikôr nyian, ma i doo U a terem Aberaham!

¹³Nenge, mo m ngun m til hen kpe u imbormnger heen je; ônkasev mba ior mba hen gar ne mba duen van mngerem ma kesen.

¹⁴Yô, na er iniunkwase i me kaa a i mer: Shi shir ityegh ki mngeregh you m̱ ma; man ia kaa er: Ma, me na urakumi ou kpaa, ve̱ ma yô, i̱ lu i U tsegh sha ci u wanakiriki wou Isaka je la; ka sha kwagh ne je, me fa er i doo U a terem ye.

¹⁵Er a lu a kure kwaghôron ga je tsô, Rebeka u Betuel wan u Milka, kwase u Nahor, anngô u Aberaham, mar un la, va due a ityegh ki mngeregh sha vande.

¹⁶Wankwase la doo ashe tsung, lu iniun je, lu a fa nom ga; a hungwa shin imbormnger la, za kese mngerem shin itye poo, a hide a due sha won.

¹⁷Tsô wanakiriki la kura ayem za kohol un, kaa a na er: Ma m shi me anmnger shin ityegh you.

¹⁸A kaa er: Ma, orvesen wam; tsô a shir ityegh fese, a kôr a na un a ma.

¹⁹Ne un mngerem, me yô, a kaa er: Me kese me na urakumi ou kpaa ve̱ ma i̱ kuma ve.

²⁰A gema mngerem ma shin ityegh nagh a haa shin tso fese, shi a hide shin ijôr ayem, a za kese mngerem; a kese a haa urakumi nav cii.

²¹Tsô or la hôn ashe sha a na, lu ving, sha u una fa shin TER na ikôr doo un sha zende na ve shinii?

²²Tsô urakumi mba til mngerem ma man yô, or la tôô kunya u zenaria u wan sha ihinga, myohom ma u kuma veghershekel je, man ahye ahar a wan ken ave, myohom ma a kuma ushekel mba zenaria pue.

²³A kaa er: U ngu wan u ana? Shi kaam yôô. Ijiir ngi hen ya u teru er sé tsa je kpa?

²⁴A kaa a na er: Mo m ngu wan u Betuel wan u Milka, u a mar a Nahor yô.

²⁵Shi a kaa a na er: Se mba a adenga a alakema man kwaghyan u uile kpishi kua ijiir i tsan kpaa.

²⁶Tsô or la wa ityough inya, gure civir TER.

²⁷Man a kaa er: I̱ wuese TER, Aôndo u terem Aberaham, u A bunde erdoo man mimi Na a terem ga yô; mo yô, TER hemen mo sha gbenda zan zan va nyôr a mo hen ya u anmgbianev mba terem.

²⁸Tsô wankwase la gber ayem, za ôr mba hen ya u ngô na akaa la.

²⁹Rebeka lu a anmgbian iti na er Laban; tsô Laban due ayem, za hen or la hen kpe u imbormnger la.

³⁰Er a nenge kunya la man ahye la sha ave a anngô na, man er a ungwa kwaghôron u anngô na Rebeka, lu ôron la er: Ka ape or la er kwagh a mo ne, nahan a za hen or la; ngula tile her, a urakumi hen kpe u imbormnger.

³¹A kaa er: Nyôr, we or u lun a iveren i TER! Ka nyi u til ken wono? Gadia m vande sôron ya kua ijiir i urakumi kpaa, m ver a ver.

³²Tsô or la nyôr ken ya, i sagh urakumi ikav; i va a adenga a alakema man kwaghyan sha ci u urakumi, man mngerem ma ôôn angahar a na kua angahar a mba ve lu a na imôngo yô.

³³I ver un kwaghyan inya er a̱ ya; kpa a kaa er: Me ya ve ga, saa me vande ôron kwagh u m ve ne ve. A kaa er: Yô, ôr ase je.

³⁴A kaa er: Mo m ngu wanakiriki u Aberaham.

³⁵TER ver terem doo doo tsung je, a hingir shagbaor; shi A na un akum a iyôngo kua abua man azurfa kua zenaria man ikpan i nomso man i ukase man urakumi kua ujaki.

³⁶Man Sara kwase u terem mar terem wan, zum u a bee iyol la; man a gema akaa a a lu a mi cii a na un.

³⁷Terem erem m bum; a kaa er: De eren wan wam kwase ken ônkasev mba Mbakanaan, mba m tem ken tar ve ne ga,

³⁸kpa za ken ya u terem ken ityô yam, za er wan wam kwase ker.

³⁹Yô, m gema m kaa a terem mer: Alaghga kwase la nana rumun u van a mo imôngo ga.

⁴⁰A kaa a mo er: TER u m zenden sha ishigh Nagh ne, Una tindi ortyom Na a we imôngo, Una doo u ikôr sha gbenda wou, ú er wan wam kwase ken ityô yam, ken ya u terem je;

⁴¹nahan ú lu a ishô sha mbum u u bum a mo ne, zum u ú za ken ityô yam la; aluer vea na u ga yô, ú lu a ishô sha mbum u u bum a mo ne.

⁴²Nyian yô, m va ar hen imbormnger ne; yô, m kaa mer: TERE, Aôndo u terem Aberaham, aluer Wea doom ikôr sha gbenda wam u m ve ne yô,

⁴³m ngun m til hen kpe u imbormnger heen ne; yô, na er iniunkwase i ia due sha u va kesen mngerem, i me kaa a i mer: Ma m shi me anmnger shin ityegh you;

⁴⁴man ia kaa a mo er: Ma, man me kese me na urakumi ou kpaa yô, na, ingila i̱ lu iniunkwase i TER A tsegh sha ci u wan u terem yô.

⁴⁵Er m lu a kure kwaghôron la ken ishima yam ga je tsô, nenge, Rebeka due a ityegh ki mngeregh nagh sha vande, a hungwa shin imbormnger la, a kese mngerem; mo kpaa m kaa a na mer: Ma m shi me.

⁴⁶Tsô a shir ityegh ki mngeregh nagh fese, a kaa er: Ma, shi me na urakumi ou kpaa ve̱ ma; tsô m ma, a shi a na urakumi kpaa ma.

⁴⁷Tsô m pine un mer: U ngu wan u ana? A kaa er: Ka wan u Betuel, wan u Nahor, u Milka a mar a na yô; tsô m wa un kunya sha ihinga man ahye sha ave na kpaa.

⁴⁸Nahan m wa ityough inya, m gure m civir TER, m wuese TER, Aôndo u terem Aberaham, u A ze a mo sha gbenda u jighilii er, m̱ er wan u anngôm u terem a̱ lu kwase u wan na yô.

⁴⁹Hegen yô, á lu ne ka eren a terem dedoo man sha mimi kpaa yô, kaam nen, man á lu nahan ga kpaa, kaam nen, sha u me gema ken iyan shin ken imese yô.

⁵⁰Tsô Laban vea Betuel gema kaa er: Kwagh ne ka hen TER a dugh ye; se se fatyô u ôron we kwagh u bo shin u dedoo ga.

⁵¹Rebeka ngula, kua a na, yem a̱ za lu kwase u wan u teru, er TER kaa yô.

⁵²Tsô zum u wanakiriki u Aberaham ungwa imo ve yô, a gure inya sha ishigh ki TER.

⁵³Nahan wanakiriki la maa dugh inyarev mbi hweev mbi azurfa man mbi zenaria kua akondo kpaa, na Rebeka; shi a na anngô na kua ngô na iwua sha ikav mbi injaav.

⁵⁴Tsô ve ya, ve ma, kua mba ve lu a na imôngo, ve tsa; kper nan ve nder pepe, nahan a kaa er: Nam nen gbenda m̱ yem hen terem.

⁵⁵Tsô anngô na man ngô na, kaa er: De wankwase a̱ shi a̱ tsa a vese kpuaa, er ayange pue nahan; tsô una mase yemen.

⁵⁶Kpa a kaa a ve er: De timbir nen mo ga, gadia TER verem doo doo sha gbenda wam; yô, de nen, m̱ yem hen terem.

⁵⁷Ve kaa er: Yô, sé yila wankwase, sé ungwa imo na.

⁵⁸Tsô ve yila Rebeka, ve pine un er: Ú yem a or ne imôngo zee? A rumun er: Me yem.

⁵⁹Tsô ve na anngô ve Rebeka gbenda man yese na kua wanakiriki u Aberaham a ior nav kpaa.

⁶⁰Ve ver Rebeka dedoo, ve kaa a na er: Anngô wase u kwase, za hingir ngô u udubu mba udubu pue; tsombor wou u̱ ngohol hundagar u mbaihomov vev, u̱ hingir u ve.

⁶¹Nahan Rebeka mough a mbayev nav mba kasev, henda urakumi, ve dondo sha or la. Kape wanakiriki la kua a Rebeka, ve yem la.

⁶²Tsô Isaka due hen ian i Ber-lahai-roi; gadia a tema ken tar u Imbusutariyan la.

⁶³Yô, Isaka due za ken akôngo aikighe sha u za henen kwagh; kenden ashe sha yô, a ta ashe a za nenge urakumi van.

⁶⁴Rebeka kpaa kende ashe; nengen a Isaka yô, a hungwa sha rakumi.

⁶⁵A gema a pine wanakiriki la er: Ka anti nan zenden ken akôngo, nan ve u va keghen se gbenda la? Wanakiriki la kaa er: Ka terem je la; tsô a tôô ikondo i yisan, a yisa ishigh nagh.

⁶⁶Wanakiriki la ôr Isaka akaa a un er cii.

⁶⁷Tsô Isaka va a na ken tenti u ngô na Sara; a kua a Rebeka, hingir kwase na; a doo un ishima. Isaka maa zua a msurshima sha ku u ngô na.