Read tiv Genese 26 Bible Online

Genese 26 - tiv bible

Genese 26

¹Ijen gba ken tar la, kpa ka ijen i hiihii i i kôr sha ayange a Aberaham la ga. Tsô Isaka za hen Abimeleki, tor u Mbafiliti, hen Gerar.

²TER ande her a na, kaa er: De senen yemen shin Igipiti ga, kpa tema hen tar u Me kaa u yô.

³Lu shir ken tar ne, Mo kpaa Me lu a we, Me ver u doo doo; gadia ka we kua tsombor wou Me na ne ityar ne cii ye, Me taver mbum Wam, u M bum a teru Aberaham la;

⁴Me seer tsombor wou iyenge er asan a Sha nahan, Me na tsombor wou ityar ne cii; akuraior a sha won cii, aa zua a iveren ken tsombor wou;

⁵sha ci u Aberaham lu ungwa imo Yam, waan iko sha imo Yam man atindi Am man akaawan Am man atindiakaa Am.

⁶Isaka tema ken Gerar.

⁷Ior mba hen ijiir la mba pin un sha kwagh u kwase na yô, a kaa er: Ka anngôm u kwase; gadia lu cian u kaan er: Ka kwase wam; sha u ior mba hen ijiir la ve̱ de woom sha ci u Rebeka ga yô, kape a kaa la; gadia a doo ashe tsung.

⁸Tse hen ijiir la, ayange nga kar yô, Abimeleki tor u Mbafiliti, ta ashe hen ian i iyoughough za nenge Isaka lu numben a Rebeka, kwase na la.

⁹Tsô Abimeleki yila Isaka, kaa er: Ehee! Kwase ne ka u wou mimi je, ngun ve u kaan wer: Un ka anngôm u kwase yee? Isaka kaa a na er: M hen ken ishima mer: M̱ de kpe sha ci na ga.

¹⁰Abimeleki kaa a na er: Ka nyi u er a vese nahana? Ka ican u or ugen ma nan yav a kwase wou ga, nahan ma u hee se ibo iyol je.

¹¹Nahan Abimeleki ta ior icin cii, kaa er: Or u nana bende or ne ave shin kwase na yô, á wua nan kpee.

¹²Isaka lôô iyiav ken tar la; hen inyom la, iyiav tser kwa akunduataan, gadia TER ver un doo doo.

¹³Or la seer a seer icivir yem hemen zan zan hingir zegeor,

¹⁴lu a akum a iyôngo man a abua, shi lu a mbatomov kpishi kpaa; nahan Mbafiliti mough iwuhe a na.

¹⁵Azôr a mbatomov mba ter na yan ve time sha ayange a ter na Aberaham la cii, Mbafiliti cir a, iv inya shin a.

¹⁶Tsô Abimeleki kaa a Isaka er: Yem hen vese kera, gadia u hemba se ca yum.

¹⁷Nahan Isaka mough heregh yem za haa afo shin pev u Gerar, tema her.

¹⁸Tsô Isaka shi bugh azôr a yan i dugh sha ayange a ter na Aberaham la, gadia Mbafiliti cir a, er Aberaham kpe kera la; a shi a yila a sha ati a ter na lu vanden yilan a la.

¹⁹Er mbatomov mba Isaka time hen pev la yô, ve dugh ijôr i saar mngerem.

²⁰Nahan mbakuranilev mba hen Gerar mough ayôôso a mbakuranilev mba Isaka, gba kaan er: Mngerem man ka ma asem; nahan a ii ijôr la iti er Eseki, sha ci u ve hendan a na yô.

²¹Ve shi ve time ijôr igen, ngila kpaa shi ve kpelan, nahan a ii i iti er Setena.

²²A kporom a shi a time ijôr igen, ngila yô, ve kera kpelan ga; a maa a ii i iti er Rehoboti, a kaa er: Hegen yô, TER bugh se ian gbangese, nahan á kpe se iyol ken tar ne.

²³Tsô a mough heregh a va ken Bersheba.

²⁴Hen tugh mbula je, TER ande her a na, kaa er: Ka Mo Aôndo u teru Aberaham, de cie ga, gadia M ngu a we, Me ver u doo doo, Me seer tsombor wou sha ci u wanakiriki Wam Aberaham.

²⁵Tsô a ta atse a nanden nagh sha mi heregh, a yila sha iti i TER; a tim tenti na heregh; mbatomov mba Isaka dugh ijôr her.

²⁶Tsô Abimeleki mough hen Gerar za her a na vea ikar na Ahusati kua kurutya na Pikol kpaa.

²⁷Isaka kaa a na er: Ka nyi ne ve her a mo er ne kerem ihom ye, ne zenden her a ven kera?

²⁸Ve kaa er: Se nenge dedoo er TER A lu a we yô; yô, se kaa ser: Mbum ma a shi lu her atô wase, ka se a we je la; yô, sé ya ikur a we;

²⁹de eren se kwagh u bo ga, di er se kpaa se bende u ave ga, se er u kwagh u vihin ga, saa u dedoo tseegh, man se na u gbenda bem bem nahan; gayô, we u ngu a iveren i TER je.

³⁰A yôr ve iwer, ve ya, ve ma.

³¹Kper nan ve mough pepe je, ve bum ayol a ve; tsô Isaka na ve gbenda, ve mough her a na bem bem.

³²Sha iyange shon la je, mbatomov mba Isaka va, va ôr un kwagh u ijôr i ve dugh yô, ve kaa a na er: Se zua a mngerem shimi.

³³A ii i iti er Sheba; ka nahan man i yer iti i gar la er Bersheba zan zan nyian ye.

³⁴Zum u Isou lu anyom akunduahar yô, a er Yuditi wan u Beeri, Orhiti, man Basemati wan u Orhiti.

³⁵Ve gema ve na Isaka vea Rebeka ishima i vihin kpishi.