Read tiv Genese 37 Bible Online

Genese 37 - tiv bible

Genese 37

¹Yakob tema ken tar u ter na lu shir ker la, ka Kanaan je la.

²Ingin ka icombor i Yakob ne: Yosev lu anyom pue kar ataankarahar, lu kuran ilev a anmgbianev nav imôngo, lu wanyekwaor, lu a ônov mba Bila man ônov mba Selpa, kasev mba ter na, imôngo. Yosev ôron ter ve aeren a ve a doon ga la.

³Iserael yô, Yosev hemba doon un ishima a ônov nav cii, gadia lu wan na u a mar un tamen yô; a kor un gôgôriga u lihen ave.

⁴Anngôôv nav kav er a hembe doon ter ve ishima a anngôôv nav cii yô, ve kôr un ihom je, ve kera fatyô u ôron kwagh a na bem bem ga.

⁵Tsô mnyam cie Yosev, a ôr anngôôv nav, shi ve seer kôron un ihom.

⁶A kaa a ve er: Ma ne shi ongo mnyam ma ma ciem ne.

⁷Nenge, se lu kangen aile a alakema ken sule, tsô ile wam mough tile sha, aile a en gema va kase ile wam la, gure inya.

⁸Anngôôv nav kaa a na er: Nahan yô, ú tema tor sha a vese he? Shi ú lu a tahav sha a vese kpaa ha? Nahan shi ve seer kôron un ihom sha ci u mnyam ma ma cien un kua sha akaaôron a na la kpaa.

⁹Shi a kimbir u ôron anngôôv nav mnyam magenem, a kaa er: Nenge, mnyam shi ciem er, iyange man uwer man asan pue kar môm ve lu guren mo inya.

¹⁰Er a ôr ter na man anngôôv nav ma yô, ter na gema zôhô a na, kaa a na er: Ka nyi mnya i cie u nahana? Nahan yô, mo man ngôu kua anngôôv ou, sé va, sé va gure u inya ha?

¹¹Anngôôv nav lu nôngon un iwuhe; kpa ter na yô, lu a kwaghôron la ken ishima na.

¹²Tsô anngôôv nav yem a ilev mbi ter ve ken Shekem u za nan mbi toho.

¹³Nahan Iserael kaa a Yosev er: Ka ken Shekem anngôôv ou ve yem a ilev u za nan mbi toho ye gaa? Yô, va m̱ tindi u her a ve. A rumun a na er: Een.

¹⁴A gema a kaa a na er: Yô, za za nenge er anngôôv ou ve lu yô, kua ilev kpaa, hide va ôrom. Ka shin pev u Heberon a lu man a tindi un er a̱ za ye; nahan a va nyôr ken Shekem.

¹⁵Tsô orgen va kohol un lu zenden ken toho wue wue; or la pine un er: Ka nyi u kerene?

¹⁶A kaa er: Ka anngôôv av m keren ye; yô, shi kaam her ape ve kor ilev yôô?

¹⁷Or la kaa er: Ve mough heen kera; yan m ungwa ve lu ôron er: Sé yem nen ken Dotan. Tsô Yosev gba tôvon anngôôv nav angahar, za kohol ve ken Dotan.

¹⁸Ve ta ashe, ve za nenge a na ca je; er a lu a mgbôghom a ve ga je tsô, ve wa kwagh ayol a ve sha a na, er vea wua un yô.

¹⁹Ve kaa ayol a ve er: Ormnya la, ngula van la.

²⁰Yô, sé wua nen un, sé gbihi nen un shin ijôr i môm i ken azôr ne, tsô sé kaa ser: Ka ma inyamikume i ye un ye; nahan sé nenge er mnyam nam maa za yô.

²¹Ruben ongo nahan yô, yima un sha ikev ve, kaa er: Sé wua nen un ga.

²²Ruben kaa a ve er: De hee nen awambe inya ga, gbihi nen un shin ijôr i i lu ken toho ne, de benden nen un ave ga; lu wan ishima u yiman un sha ave ve hiden a na hen ter na.

²³Zum u Yosev ar hen anngôôv nav yô, ve er Yosev riga na, gôgôriga u lihen ave u a lu a mi iyol la.

²⁴Ve kôr un ve gbihi shin ijôr la; ijôr la lu tseghe tseghe, mngerem lu shimi ga.

²⁵Tsô ve za tema ve gba yan kwagh; mba kenden ashe sha yô, nenge, mbakasuav mba Ishemael mba ve due ken Gileadi mba van a urakumi vev, ve tôô ilyôghonov man balsem man mire, ve lu yemen a mi ken Igipiti.

²⁶Tsô Yuda kaa a anngôôv nav er: Inja i sé wua anngô wase, sé yer awambe na yô, ka nyi?

²⁷Yô, sé tee nen un, Mbaishemael ve̱ yam, sé bende nen un ave ga, gadia anngô wase, ka iyol yase je. Anngôôv nav rumun imo na la.

²⁸Tsô Mbamidian mbazendenkasua mba va karen yô, ve kôr Yosev ve urugh ve due a mi shin ijôr la, ve tee Yosev, Mbaishemael yam sha agbenger a azurfa ikundu. Mbala yem a Yosev ken Igipiti.

²⁹Kpa Ruben hidi hen ijôr la yô, Yosev kera lu shimi ga, tsô a ande akondo na.

³⁰A hire hen anngôôv nav, a kaa er: Wanakiriki la ngu ga, man mo yô, me za hana?

³¹Tsô ve tôô riga u Yosev, ve sôngo ivo, ve wa riga la shin awambe a i;

³²ve na gôgôriga la, i za a mi hen ter ve, ve kaa er: Se zua a ngun, nenge dedoo, ka riga u wan wou shin ka u na ga.

³³A kav un; a kaa er: Ka riga u wan wam je ne! Ka ma inyamikume je, i ye un ye; i kôr Yosev javer javer, mnyiman ngu ga.

³⁴Tsô Yakob ande akondo a na, a ta ikondo uya, a zungwe ku u wan na ayange kpishi.

³⁵Ônov nav mba nomso kua mba kasev cii ve mough sha u surun un ishima, kpa ishima pever un ga; a kaa er: Mo me sen shin Sheol a mzungu, me za kohol wan wam. Ter na vaa un.

³⁶Mbamidian mbala za tee un ken Igipiti, Potifar orvesen u ken ya u Farao, tor u adugwer, yam un.