Read tiv Genese 38 Bible Online

Genese 38 - tiv bible

Genese 38

¹Hen shighe la je Yuda mough hen anngôôv nav kar yem za kohol Oradulam, iti na er Hira.

²Keregh la, Yuda za nenge a wankwase u Orkanaan, iti na er Shua; a er un, a tsa a na.

³A wa iyav a mar wannomso, a ii un iti er Er.

⁴Shi a wa iyav a mar wannomso ugen, a ii un iti er Onan.

⁵Shi a mar wannomso, a ii un iti er Shela; lu ken Geshibi zum u a mar un la.

⁶Tsô Yuda er kwase, na Er wan na u iunda la, iti i kwase la er Tamar.

⁷Kpa Er, waniunda u Yuda la, inja na doo TER ga, nahan TER wua un.

⁸Tsô Yuda kaa a Onan er: Tôô kwase u anngôu, tsa a na, ver anngôu tse.

⁹Onan fa tse la á lu u na ga; nahan zum u una tsa a kwase u anngô na yô, a gema a haa ken inya, sha u una ver anngô na tse ga yô.

¹⁰Kwagh u a er la lu kwagh u vihin sha ishigh ki TER; nahan un kpaa A wua un.

¹¹Tsô Yuda kaa a Tamar, kwase u wan na la, er: Gba teman kwasecôghol ken ya u teru tsô, zan zan Shela wan wam á vese ve; gadia a kaa er: Un kpaa a̱ de kpeen er anngôôv nav nahan ga. Tsô Tamar yem za tema hen ya u ter na.

¹²Tsô ayange nga karen yô, Wanshua, kwase u Yuda kpe; ku ngu hoghol Yuda yô, a za hen mbatôndon iyôngo na aive hen Timna, un vea ikar na Hira, Oradulam.

¹³I kaa a Tamar er: Nenge, ter u nomu ngu zan hen Timna sha u za tôndon iyôngo na aive.

¹⁴Tsô a er ikav nav mbi kwasecôghol kera, a cir ikondo sha ishi, a yisa iyol na, a za tema hen hundagar u Enaim u u lu sha gbenda u zan hen Timna yô; gadia a nenge Shela vese, man i gema un, i na un er a̱ tôô un ga.

¹⁵Tsô Yuda nengen a na yô, gba henen er ka agbaga, sha ci u a yese ishigh nagh yô.

¹⁶Tsô a kaha a za hen na sha gbenda, a kaa er: Shi de, m̱ yav a we he; gadia a fa er i lu kwase u wan na ga. Kwase la kaa a na er: Ú nam nyi, man ú yav a mo?

¹⁷A kaa er: Me za kôr gumivo ken uile, me na i̱ va na u. A kaa er: Nahan ú nam ityungu, man ú mase tindin a mi ye zee?

¹⁸A kaa er: Ka nyi ityungu m̱ na we? A kaa er: Ka kunya wou u i ver ikav sha mi la man kor u u la, kua gbough ku u lu a mi sha uwe la. Tsô a na un akaa la, maa a yav a na, a wa iyav a na je.

¹⁹Tsô a mough, a yem a nagh, a za bugh ikondo la kera, a tôô ikav nav mbi kwasecôghol la, a haa.

²⁰Yuda za tindi a gumivo sha ikev i ikar na, Oradulam la, sha u a̱ za paa un ityungu sha ikev i kwase la yô, kpa a za zua a na ga.

²¹Tsô a pine ior mba hen ijiir na la er: Agbaga u iyange lu hen Enaim hen gbenda ne ngu hana? Ve kaa er: Ma agbaga lu heen ga.

²²Tsô a hide hen Yuda, a kaa er: M zua a na ga; man ior mba hen ijiir la kpaa kaa er: Ma agbaga lu heen ga.

²³Yuda kaa er: De un, a̱ gba lun a mi tsô, sé ker aheen ga; nenge, m tindi a gumivo ne, kpa u za tser a na ga.

²⁴Tsô iwer ngi kom itiar yô, i kaa Yuda er: Tamar kwase u wan wou er idya, a wa iyav sha idya je. Yuda kaa er: Due a na, i̱ nande un.

²⁵Mba dugh a na yô, a na loho hen ter u nom na, a kaa er: Ka or u akaa ne a lu a nan la, nan we iyav a mo ye; man shi a kaa er: Shi nenge dedoo yô, or u akaa ne, a lu a nan yô: kunya u i ver ikav sha mi ne man kor ne kua gbough kun.

²⁶Yuda kav a, nahan a kaa er: A hembam mimi, gadia m na un wan wam Shela ga. Mayange a kera shi yav a na ga.

²⁷Tsô zum u a gba toghol iyav yô, lu ônov mba ahinav lu ken iyav nav ye.

²⁸Ngur maren yô, u môm naregh uwegh, kwase u kôron mar kôr uwegh nagh zer un mou u nyian sha uwe, kaa er: Ngun vande duen.

²⁹Tsô hidi a uwegh nagh yô, anngô na kar due. A kaa er: U ande sha apera tsô! Ka nahan man i ii un iti er Perese ye.

³⁰Ken masetyô la anngô na due, u a lu a mou u nyian sha uwe la; i ii un iti er Sera.