Read tiv Genese 43 Bible Online

Genese 43 - tiv bible

Genese 43

¹Ijen kôr ken tar la tsung.

²Mba ye alakema u ve va a mi ken Igipiti la been yô, ter ve kaa a ve er: Shi za, za yam nen kwaghyan kpeghee.

³Tsô Yuda kaa a na er: Or la kaa a vese gbang gbang er: Né kera nenge ishigh yagh ga, saa anngô wen la una lu a ven.

⁴Aluer ú na anngô wase una za a vese imôngo yô, sé za shimi, sé za yam u kwaghyan;

⁵kpa aluer wea na un ga yô, sé za ga; gadia or la iyange kaa a vese er: Né kera nenge ishigh yagh ga, saa anngô wen una lu a ven.

⁶Tsô Iserael pine er: Ka nyi ne er a mo dang nahan, ne kaa or la ner, ne mba a anngô ugene?

⁷Ve kaa er: Or la pine se kwagh u sha ayol a ase kua ityô yase vighe vighe er: Ter wen ngu uma kpa? Ne mba a ma anngô wen ugen kpa? Tsô se ôr un sha mbampin mbala; se fa nyô ser, una kaa a vese er: Va nen a anngô wene?

⁸Yuda kaa a ter na Iserael er: Na wanakiriki ne a̱ za a mo imôngo, sé mough, sé yem, sha er sé lu uma, sé kera kpe ga yô, se man we kua ônov asev imôngo cii.

⁹Mo me paa un ityough, ka sha uwegh agh ú ker un ye. Aluer mea hide a na her a we, mea va ver u un sha ishi ga yô, nahan me gba lun a ibo sha ishigh you gbem tsô;

¹⁰gadia aluer sea timbir ga yô, ma se hire ma kuma kwa har ve.

¹¹Tsô ter ve Iserael kaa a ve er: A lu nahan keng yô, er nen nahan: tôô nen akaa a dedoo a ken tar ne ken ikav yenev, za sugh nen or la a mi: balsem kpeghee man zariyoughough kpeghee man ilyôghonov man mire man amondi.

¹²Tôô nen inyaregh ki kia kuma kwa har yô, inyaregh ki i hidi ne a mi ken aba a en la kpaa, hide nen a ki; alaghga i tsume a tsume;

¹³kua nen a anngô wen kpaa, mough nen, shi hide za nen hen or la;

¹⁴Aôndo Uhembanagee A̱ zungwe ne mhôônom hen or la, sha er una na ne gbenda a anngô wen la kua Benyamin kpaa yô, Mo yô, aluer i sarem ya yô, i sarem di je ve.

¹⁵Tsô ior mbala tôô ishughun la, shi ve tôô inyaregh ki ki kom kwa har kua Benyamin kpaa, ve mough ve sen shin Igipiti; ve za tile sha ishigh ki Yosev.

¹⁶Zum u Yosev nenge Benyamin a ve imôngo yô, a kaa a or u nengen sha ya na er: Nyôr a ior mban ken ya, wua ilev, yôr iwer; gadia iyange sha tembe yô, ior mban vea ya kwagh a mo imôngo.

¹⁷Tsô or la er, er Yosev kaa un nahan; a nyôr a ior mbala ken ya u Yosev.

¹⁸Ior mbala gba cian sha er i nyer a ve ken ya u Yosev yô; ve kaa er: Ka sha ci u inyaregh ki iyange i hide se a mi ken aba ase la je, i nyer a vese sha u una wa ile sha a vese, una ta num, sha a vese, una gema se, se̱ hingir ikpan a ujaki asev cii.

¹⁹Tsô ve kporom hen or u nengen Yosev sha ya la, ve za ôr kwagh a na hen hundaya,

²⁰ve kaa er: Terem, mimi je, mve wase u hiihii la, lu sha ci u va yamen kwaghyan je;

²¹yô, zum u se va ar hen afo, se mba saghen aba ase yô, inyaregh ki hanma or gema lu ken iba u nan, lu inyaregh yasegh a myohom ma ki vough; man shi se hire a mi kpaa.

²²Shi se va a inyaregh kigenegh kpaa sha u va yamen kwaghyan; se fa or u yan nan hide a inyaregh yasegh nan wa ken aba ga.

²³Tsô a kaa er: Ishima i̱ de nyian ne ga, de kera cie nen ga; Aôndo wen, Aôndo u ter wen na ne kwagh u doon ken aba a en; inyaregh yenegh iyange ki nyôr her a mo. Tsô a dugh Shimeon va kohol ve.

²⁴Or la nyôr a ior mbala ken iyou i Yosev, a na ve mngerem, ve ôô angahar a ve; a na ujaki vev kwaghyan kpaa.

²⁵Ve dugh iwua, ve ver a ver, er Yosev una va va iyange sha tembe yô; gadia ve ungwa er vea va ya kwagh her.

²⁶Zum u Yosev va nyer ken iyou yô, ve nyôr a iwua i ve lu a mi la ken iyou, ve gure un inya.

²⁷A pine mlu ve, a kaa er: Ter wen u a bee iyol u iyange ne ôron kwagh na la ngu dedoo? Ngu uma hereghe?

²⁸Ve kaa er: Wanakiriki wou, ter wase, ngu dedoo, ngu uma her. Tsô ve gure, ve kuma ityough inya.

²⁹A kende ashe, a nenge a idyondon na Benyamin, wan u ngô na, a kaa er: Ka un u masetyô u iyange ne ôron mo kwagh na nee? Shi a kaa er: Aôndo A̱ zungwe u mhôônom wan wam.

³⁰Tsô Yosev er fefa, gadia sase un iyol a anngô na; a ker ian i una za vaa yô, a nyôr ken iyou i yaven a gba za vaan ker.

³¹Ee ishigh yô, a due, a wa ishima gbang gbang, a kaa er: Due nen a kwaghyan.

³²Ve ver un, u na kposo, u ve kpaa kposo, u Mbaigipiti mba ve lu yan a na imôngo la kpaa lu kposo; gadia lu u Mbaigipiti vea ya kwagh a Mbaheberu imôngo ga, gadia nahan lu Mbaigipiti kwagh u ndôhôrshima.

³³Ve tema sha ishigh nagh: waniunda sha icivir na i mar, man u masetyô di sha iyev na; kpiligh ior mbala iyol, ve gba kenger ayol a ve.

³⁴A gba karen ve kwaghyan u a lu un hen ikum la; u Benyamin hemba u hanmô ve kwa taan. Ve ma kwagh, ve ember a na imôngo.