Read tiv Genese 47 Bible Online

Genese 47 - tiv bible

Genese 47

¹Tsô Yosev za za kaa Farao, er: Terem man anngôôv av man ilev vev mbi kiriki man abua kua akaa a ve lu a mi cii, ve va a mi ken tar u Kanaan, ve va nyôr ken tar u Goshen ve.

²A za a anngôôv nav ior itian, a za tese Farao.

³Farao pine anngôôv nav er: Ka nyi tom ne erene? Ve gema ve kaa a Farao er: Mbayev ou mba kor ilev, se a uter asev kpaa.

⁴Shi ve kaa a Farao er: Se va ser ma se va lu shir ken tar ne, gadia ijiir i ilev mbi mbayev ou mbia ya toho kera ngi ga; gadia ijen kôr ken tar u Kanaan je zua ga; ma u shi rumun mbayev ou ma ve tem ken tar u Goshen.

⁵Tsô Farao ôr kwagh a Yosev kaa er: Teru kua anngôôv ou ve va kohol we ve.

⁶Tar u Igipiti ungun sha ishigh you je ne; ver teru kua anngôôv ou ve̱ tema hen ijiir i hemban doon ken tar ne; ve̱ tema ken Goshen; man aluer wea fa mbainjaav vea lu ken a ve yô, ver ve, ve̱ lu mbanengen sha ilev yav.

⁷Tsô Yosev nyôr a ter na Yakob, va ver un sha ishigh ki Farao; Yakob gema ver Farao doo doo.

⁸Farao pine Yakob er: Ayange a anyom a uma wou nga nana?

⁹Yakob kaa a Farao er: Ayange a anyom a shir wam, nga anyom deri man ikundugber; ayange a anyom a uma wam vese ga, ican lu eren mo sha a, a kuma sha ayange a anyom a uma a uter av sha ayange a shir ve la kpaa ga.

¹⁰Nahan Yakob ver Farao doo doo man a mough hen Farao.

¹¹Yosev tese ter na kua anngôôv nav ijiir i teman, a na ve tar ken tar u Igipiti, hingir u ve, lu hen ijiir i hemban doon ken tar la, hen ipaven u Ramese, er Farao kaa yô.

¹²Yosev koso ter na kua anngôôv nav man ior mba ter na cii, naan ve kwaghyan kuman sha iyenge i ônov vev vough.

¹³Ken tar la cii kwaghyan lu ga, gadia ijen kôr tsung je, tar u Igipiti man u Kanaan ure sha ci u ijen.

¹⁴Yosev kohol inyaregh ki ki lu ken tar u Igipiti man ken tar u Kanaan cii, sha alakema u ve va yamen la; Yosev za a inyaregh kila ken ya u Farao.

¹⁵Zum u inyaregh ki ki lu ken tar u Igipiti man ken tar u Kanaan bee cii yô, Mbaigipiti cii va hen Yosev, ve kaa er: Na se kwaghyan; gadia ka nyi man sé va kpe sha ashe ou er inyaregh ki bee kera nee?

¹⁶Yosev kaa er: Va nen a ilev yenev; me na ne sha ilev yenev, aluer inyaregh kia bee yô.

¹⁷Ve va a uzendenya vev hen Yosev; Yosev ngohol anyinya man ilev mbi kiriki man abua man ujaki, gema na ve kwaghyan; a koso ve sha kwaghyan sha uzendenya vev cii, ken inyom la.

¹⁸Inyom la i been yô, ve va hen na sha inyom i sha uhar la, ve va kaa a na er: Se yer ter wase ga, inyaregh bee cii; akum a uzendenya kpaa hingir kwagh u ter wase; ma kwagh u á na ter wase yô, kera ngu ga, saa ayol a ase man ishule yase;

¹⁹ka nyi man sé va tim sha ashe ou se a ishule yasa? Yô, yam se kua ishule yase na se kwaghyan, se a ishule yase se̱ hingir ikpan i Farao; na se ivor sha er se̱ lu uma se̱ kpe ga yô, ishule kpaa i̱ de gbe saan toho nahan ga.

²⁰Nahan Yosev yam Farao tar u Igipiti cii, gadia Mbaigipiti cii, hanma or tee sule u nan, sha ci u ijen i ker yum yô; tar la maa hingir u Farao.

²¹Ior yô, a gema a kura ve a haa ken agar, hii hen ikighirtar i Igipiti zan zan za ar ken ikighir igen.

²²Saa tar u upristi tseegh a yam ga ye; gadia ve upristi ve zuan a injar hen Farao; ka sha injar ve i Farao na ve la man ve yaan kwaghyan ye; ka nahan man ve tee tar ve ga ye.

²³Tsô Yosev kaa a ior er: Nenge, nyian, m yam ne kua tar wen, m na Farao; ivor ingin sha ci wen ne, za lôô nen ken ishule.

²⁴Zum u á gema sundan yô, né tsuwa tihi môm ken atihi ataan, né na Farao, atihi anyiin yô, a̱ lu a en, sha ci u ivor i ken sule man sha ci u kwaghyan wen kua mba hen uya enev, man sha ci u kwaghyan u ônov enev mba kiriki.

²⁵Ve kaa er: U yima uuma asev, ma i doo terem a vese, tsô sé hingir ikpan i Farao.

²⁶Yosev maa wa tindi sha ishule i Igipiti zan zan nyian, er Farao a̱ zuan a tihi môm ken atihi ataan; saa tar u upristi tsegh u hingir u Farao ga ye.

²⁷Tsô Iserael tema ken tar u Igipiti ken tar u Goshen; ve hingir ior mba lun a akaa ker; ve mar ônov ve seer a seer iyenge.

²⁸Yakob tema ken tar u Igipiti anyom pue kar ataankarahar; nahan ayange a Yakob, anyom a uma na kuma anyom deri man akunduahar kar ataankarahar.

²⁹Er kuma pe Iserael una kpe yô, a yila wan na Yosev a kaa a na er: Aluer a doo u a mo yô, shi pendam uwegh hen ikooso yôô, er a mo dedoo kua sha mimi kpaa; ma u iim ken Igipiti ga;

³⁰kpa zum u mea yav a uter av imôngo yô, tôôm ken tar u Igipiti kera, za iim ken uwar ve. A kaa er: Me er sha imo you.

³¹A kaa er: Yô, bum ase; tsô a bum. Iserael maa gure sha ityough ki gambegh.