Read tiv Genese 8 Bible Online

Genese 8 - tiv bible

Genese 8

¹Tsô Aôndo umbur Noa man inyam cii kua uzendenya cii, mba ve lu a na imôngo ken tso yô. Aôndo er ahumbe va ta sha tar, mngerem maa goho.

²Ambor a zegemnger man a-an a Sha kondo zegeura u senen sha kpaa tôndo;

³mngerem gba hiren ijime ijime sha tar; ayange deri man akunduahargber nga kar yô, mngerem songor.

⁴Sha uwer u sha utaankaruhar, sha ayange a u pue kar ataankarahar la, tso hange sha iwo i Ararati;

⁵mngerem seer a seer u hiren ijime zan zan uwer u sha pue la; uwer u sha pue iyange i hiihii i u la, ityouv mbi iwoov hii duen.

⁶Tsô ayange akunduahar nga kar yô, Noa bugh ian i a gber sha tso la,

⁷a pase gugôô, due gba purugh wue wue zan zan mngerem kar uman sha tar.

⁸Shi a pase atii sha u una nenge mngerem maa pande sha tar yô.

⁹Kpa atii zua ape veren angahar a na ga, nahan a hire hen a na hen tso, gadia mngerem lu sha tar cii deemee; tsô a za uwegh a kôr un a nyôr a mi ken tso.

¹⁰Shi a tamber ayange ataankarahar, nahan shi a pase atii la, due ken tso;

¹¹tsô atii la hide her a na aikighe a ihômon i olev sha zwa; nahan Noa fa er mngerem pande sha tar ve.

¹²A shi a tamber ayange ataankarahar, a shi a pase atii la; nahan a kera hide her a na ga.

¹³Tsô sha inyom i deri ataratar kar i môm, sha uwer u hiihii, sha iyange i hiihii i u la yô, mngerem uma sha tar; Noa bugh kughur u tsoogh; nengen kera yô, nenge, inya uma cii.

¹⁴Sha uwer u sha uhar, sha ayange a u ikundu kar ataankarahar la, tar hingir tseghe tseghe.

¹⁵Tsô Aôndo ôr kwagh a Noa kaa er:

¹⁶Due ken tso, we vea kwase wou man ônov ou kua kasev mba ônov ou a we imôngo.

¹⁷Man shi due a hanma kwagh u uma cii, u a lu a we imôngo: inyon man uzendenya kua hanma kwagh u a kper a kpela inya, sha u ve̱ mgbough sha won, ve̱ maren ve̱ seer a seer sha won.

¹⁸Tsô Noa due a ônov nav man kwase na kua kasev mba ônov nav a na imôngo;

¹⁹hanma inyam man hanma kwagh u a kper a kpela inya man hanma inyon kua hanma kwagh u a tenger hen inya, ve due ken tso, sha iniongo iniongo.

²⁰Tsô Noa ta atse a nanden TER nagh sha mi, a pande hanma injanyam i wang, man hanma injanyon i wang, a na nagh ku nanden sha atse la.

²¹TER ungwa ihuma i dedoo; nahan TER kaa ken ishima Na er: Me kera wa tar ifan sha ci u or ga, gadia mhen u ishima i or ka u bo, hii sha iyev mbu nan je; man shi Me kera tsaha akaauma er M vande eren nahan ne ga.

²²Sha ayange a tar ua lu ne cii, shighe u lôôn iyiav man shighe u sundan, hir man iceenyolough, inyom man fam, atetan man tugh, vea bunden ga.