Read tiv 2 Samuel 12 Bible Online

2 Samuel 12 - tiv bible

2 Samuel 12

¹Tsô TER tindi Natan hen Davidi. Nahan a va her a na, a va kaa a na er: Iyange ior ihiar lu ken gar ugen, or môm lu ornyar, or môm lu icanor.

²Ornyar la lu a akum a iyôngo kua ibua kpishi;

³kpa icanor la lu a kwagh ga, lu di a antuleiyôngo u a yam a koso, a vese hen na a mbayev nav; yaan kwaghyan a na imôngo, maan kwagh shin iyongo na, a yav un sha ikum, hingir un vough er wan na u kwase nahan.

⁴Tsô iyange igen or va ornyar la inya, a tange iyôngo na kua ibua na la, a sôngo orvannya u a ve her a na la kwagh ga, kpa a gema a kôr antuleiyôngo u icanor la, a za sôngo orvannya na la.

⁵Nahan ishima vihi Davidi kpishi a or la; a kaa a Natan er: M bum er TER A lu u uma ne, or u nan er nahan la, nan kuma ku;

⁶man shi nana kimbi tuleiyôngo la, nana na iyôngo inyiin, sha ci u nan er kwagh ne, mhôônom kpaa ma ker nan ga yô.

⁷Tsô Natan gema kaa a Davidi er: Ka we je, u lu or shon ye! TER, Aôndo u Iserael, ngu kaan nahan er: Mo M shighe u mkurem u hingir tor u Iserael, Mo M yima u sha ikev i Saulu kpaa;

⁸M na u ya u teru kua kasev mba teru kpaa sha ikum you, M shi M na u ya u Iserael kua u Yuda; man a yen u kpaa ma M seer we akaa agen sha mi.

⁹Man ka nyi u laha kwaghôron u TER, u er iferkwagh ne sha ashe Na nahana? U wua Uria Orhiti sha sanker, u tôô kwase na a hingir kwase wou; u wua un sha sanker u Mbaamon.

¹⁰Nahan hegen yô, sanker una kar hen ya wou kera ga; sha ci u u laham u tee kwase u Uria Orhiti a hingir kwase wou yô.

¹¹TER ngu kaan nahan er: Nenge, Me na kwagh u bo una mough ken ya wou una tser u, Me tôô kasev ou sha ashe ou je, Me na orwanndor a we, nana yav a kasev ou atetan ken igbar je.

¹²Gadia we u er kwagh ne myer; kpa Mo yô, Me er kwagh ne sha ashe a Iserael cii, ken igbar atetan je.

¹³Davidi gema kaa a Natan er: M er TER kwaghbo. Nahan Natan kaa a Davidi er: TER de u kwaghbo wou, ú kpe ga.

¹⁴Nahan kpaa er u ne mbaihomov mba TER ityôkwagh i nan ityuhwanev kpishi sha kwagh ne yô, wan u u mar la, una kpe kpee.

¹⁵Tsô Natan mough yem ken ya na. Nahan TER er wan u kwase u Uria mar a Davidi la ican, angev kôr un ngegh.

¹⁶Davidi sôn Aôndo sha ci u wan la; shi Davidi hôr kwaghyan, a nyôr a yav hen inya zan zan sev kar aven.

¹⁷Nahan mbatamen mba hen ya na mough, va tile her a na sha u a̱ mough hen inya sha yô, kpa a venda, kwaghyan tsô kpaa a ya a ve imôngo ga.

¹⁸Tsô sha iyange i sha utaankaruhar la, wan la kpe. Cier mbashilen Davidi iyol u kaan un ku u wan la; gadia ve kaa er: Nenge, er wan la lu uma je kpaa se ôr kwagh a na, kpa a wa imo yase iko ga, man hile hegen u wan ne a kpe, sé kaa un yô, ishima ia vihi un ga yee?

¹⁹Kpa zum u Davidi nenge er mbashilen un ve lu ôron kwagh ivarivase ayol a ve yô, Davidi kav er wan la a kpe yô; nahan Davidi pine mbayev nav er: Wan shon kpee? Ve kaa er: Een, a saa.

²⁰Nahan Davidi kighir hen inya mough, za ôô iyol, shighe mkurem iyol, haa akondo agen, a za nyôr ken iyou i TER, a gure inya; tsô a hide hen ya na; zum u a sôn kwaghyan yô, i va ver un, a ya je.

²¹Nahan mbashilen un pine un er: Ka nyi kwagh u er nee? U hôr kwaghyan sha mlia je sha ci u wan ne, zum u a lu uma la; kpa er wan ne a kpe yô, u mough u ya kwagh.

²²A kaa er: Er wan ne lu uma yô, m hôr kwaghyan m vaa kpaa, gadia m kaa mer, alaghga TER Una zungwem mhôônom, wan ne una lu uma.

²³Man er hegen a kpe kera yô, ka sha ci u nyi man me hôr kwaghyana? Me shi me fatyô me hide a na kpa? Ka mo me za her a na ye, kpa un yô, una hide her a mo ga.

²⁴Nahan Davidi sur kwase na Batesheba ishima, a nyôr her a na, a tsa a na; a mar wan u nomso, a ii un iti er Solomon. A doo TER ishima;

²⁵A tindi profeti Natan er a̱ za ii un iti er: Yedidia, sha ci u TER.

²⁶Yô, Yoabi nôngo ityav a Raba u Mbaamon, a za hemba gar u tor la.

²⁷Nahan Yoabi tindi mbatyomov hen Davidi, kaa er: M nôngo ityav a Raba, m ngohol gar u mnger la je.

²⁸Yô, kohol ase ior mba ve shi cii, haa afoautya kase gar la, ngohol un; sha er mo m̱ de hembe gar shon man i̱ ii un iti sha iti yam ga.

²⁹Tsô Davidi kohol ior cii, za hen Raba, za nôngo ityav a na, ngohol un.

³⁰A bugh tor ve la idyer i tor kera, myohom ma i lu talenti u zenaria môm, iwen i injaa lu sha mi; i gema i i cir Davidi sha ityou, shi a kura ishar i ken gar la ngee je zua ga.

³¹A due a ior mba ve lu ker la a na ve tom u eren sha uzerto, man sha ucanca mba iyôôv, man sha azembe a iyôô, man shi a na ve tom u sôôn akam. Kape a er a agar a Mbaamon cii la. Nahan Davidi kua ior cii, ve hide hen Yerusalem.