Read tiv 2 Samuel 13 Bible Online

2 Samuel 13 - tiv bible

2 Samuel 13

¹Tsô ken masejime la yô, Abesalom wan u Davidi lu a anmgbian u kwase u doon ashe, iti na er Tamar; man a gema a doo Amnon wan u Davidi ishima.

²Kwagh ne nyôr Amnon ken ishima hingir angev sha ci u anngô na u kwase Tamar, gadia lu iniunkwase, man lu Amnon ican u una er kwagh a na.

³Kpa Amnon lu a ikar iti na er Yonadabi wan u Shimea, anmgbian u Davidi; man un Yonadabi la lu or u ayomough kpishi.

⁴A pine un er: Ka nyi we wan u tor man u kanden a kande gbem nahana? U rumun u kaan mo gaa? Amnon kaa a na er: Tamar anngô u anngôm Abesalom doom ishima.

⁵Tsô Yonadabi kaa a na er: Yô yav sha gambe wou er u ngu uange nahan, tsô shighe u teru una va sha u va nengen we yô, kaa a na wer, anngôm u kwase Tamar ma a shi ve ma a va nem kwaghyan ma m ye, a̱ er kwaghyan sha ishigh yagh sha u me nenge, shi me ya sha uwegh nagh kpaa yô.

⁶Nahan Amnon za yav er ngu uange yô, zum u tor va sha u va nengen un yô, Amnon kaa a tor er: Anngôm Tamar a̱ shi va, a̱ va erem umasa uhar sha ishigh yagh, sha er me ya sha uwegh nagh.

⁷Tsô Davidi tindi loho za hen Tamar ken iyou, a kaa er: Za hen ya u anngôu Amnon za er un kwaghyan.

⁸Nahan Tamar za hen ya u anngô na Amnon; yô lu yaven heregh. A tôô mwem a hôr a er umasa sha ashe na, a kaa umasa mbala.

⁹A shir icenge, a haa ve sha ishigh nagh, kpa a venda u yan. Amnon gema kaa er: Ior cii ve̱ due ve nam ian. Nahan ior cii due na un ian.

¹⁰Tsô Amnon kaa a Tamar er: Va a kwaghyan ken iyou i yaven sha er me ya sha uwegh ough yô. Nahan Tamar tôô umasa mba a kaa la, a va a mi ken iyou i yaven hen anngô na Amnon.

¹¹Ve a mi ikua ikua sha u a̱ ya yô, a kor un, a kaa a na er: Va va yav a mo, anngôm.

¹²A gema a kaa a na er: Ei, anngôm, de heen mo nahan ga; gadia doo u á er imbakwagh ne ken Iserael ga; de eren ibumekwagh nahan ga.

¹³Mo yô, me za yer kunya wam hana? Man we kpaa, ú hingir gbilinor ken Iserael je. Yô, shi ôr kwagh a tor tsô, gadia una nyume u mo ga.

¹⁴Nahan kpaa, a rumun u ungwan kwaghôron na la ga, kpa er a hemba un agee yô, a yav a na, a hee un.

¹⁵Nahan Tamar mase vihin Amnon ishima tsung, mvihi u a vihi un ishima la, hemba mdoo u iyange a doo un tsuaa la. Nahan Amnon kaa a na er: Mough, due kera.

¹⁶Kpa a kaa a na er: Ei, nahan ga, gadia kwaghbo u u er, u zendem ne, hemba u u vande eren mo la. Kpa a venda imo na.

¹⁷Tsô a yila wanakiriki na u eren un tom, a kaa a na er: Duem a kwase ne kera, kôr hunda wuhe.

¹⁸A lu a riga iyol u vesen u lihen ave, gadia ka anza a uriga angan ônov mba tor mba kasev mba ve lu anuunaukase ve haan ye. Tsô ortom na la due a na kera, a kôr hunda a wuhe.

¹⁹Nahan Tamar haa mtwem sha ityou, shi a ande riga na u lihen ave u a haa iyol la, shi a kaa uwegh sha ityou, gba vaan genger genger yemen.

²⁰Tsô anngô na Abesalom pine un er: Ka Amnon anngôu, a lu a we yee? Kpa hegen yô huan ayôôso anngôm; ka angôu je; de luun a kwagh ne ken ishima you ga. Nahan Tamar maa gba teman ken ya u anngô na Abesalom er kwase u i te nan kera nahan.

²¹Zum u tor Davidi ungwa kwagh la nahan, ishima vihi un mimi.

²²Kpa Abesalom ôr kwagh a Amnon ga, shin u dedoo shin u bo kpaa ga; gadia Abesalom kôr Amnon ihom sha ci u a hee anngô na Tamar yô.

²³Tsô anyom nga kar ahar yô, Abesalom lu a mbatôndon iyôngo aive ken Baal-hasor u ken Eferaim la; nahan Abesalom lôhô ônov mba tor cii iniongo.

²⁴Tsô Abesalom va hen tor va kaa er: Nenge, wanakiriki wou ngu a mbatôndon iyôngo aive yô, tor kua mbatomov nav ve̱ shi za vea wanakiriki wou imôngo.

²⁵Tsô tor kaa a Abesalom er: Ei, wan wam, ka se cii sé za ga, nahan sé za za u iyol yum. A za un iyol, nahan kpaa a rumun u zan ga, kpa a ver un doo doo tsô.

²⁶Tsô Abesalom kaa er: Man a̱ lu nahan ga yô, shi de, anngôm Amnon a̱ za a vese imôngo. Nahan tor pine un er: Inja na nan man a̱ za a we imôngo?

²⁷Kpa Abesalom za un iyol zan zan a de Amnon a ônov mba tor cii ve za a na imôngo.

²⁸Tsô Abesalom kaa a mbatomov nav er: Ver nen ishima, shighe u Amnon una va hingir saan saan sha wain yô, mea kaa a ven mer, wua nen Amnon yô, wua nen un je, de cie nen ga; ka mo m ne ne zwa ye gaa? Taver nen ishima lu nen icihi.

²⁹Nahan mbatomov mba Abesalom er a Amnon er Abesalom na ve zwa nahan. Tsô ônov mba tor cii hembe, hanmô henda alfadari u nan yevese.

³⁰Er ve lu sha gbenda la je, Davidi ungwa er: Abesalom wua ônov mba tor cii, mô ve môm shi ga.

³¹Tsô tor kighir mough, ande akondo na, yav hen inya; mbatomov nav cii kpaa va tile a na her a akondo a anden iyol.

³²Kpa Yonadabi wan u Shimea, anmgbian u Davidi la, gema kaa er: Terem a̱ de henen er i wua mbayev, ônov mba tor cii ga, ka Amnon tseegh a kpe ye; gadia ishigh ki Abesalom tese kwagh la hii sha iyange i a hee Tamar, anngô na u kwase la je.

³³Yô, kwagh ne a̱ de luun terem tor ken ishima, henen er ônov mba tor cii ve kpe ga; gadia ka Amnon tseegh a kpe ye.

³⁴Nahan Abesalom yevese. Tsô wanye u kuran la, ta ashe za nenge ior kpishi lu van sha gbenda u karen hen igungu ken ijime na.

³⁵Nahan Yonadabi kaa a tor er: Nenge, ônov mba tor mbala van la; er wanakiriki wou a kaa la, ka nahan vough.

³⁶Tsô kur kwaghôron yô, ônov mba tor va nyôr, ve ger mliam, ve gba vaan; tor a mbatomov nav cii kpaa ve gba vaan tsung.

³⁷Kpa Abesalom yevese, yem hen Talmai wan u Amihur, tor u Geshur. Davidi gba zungwen ku u wan na ayange ayange.

³⁸Kape Abesalom yevese la, a yem hen Geshur, a za lu ker anyom atar.

³⁹Tsô gba saren tor Davidi ken ishima tsung u Abesalom ma a hidi; gadia ishima pever un sha kwagh u Amnon, er a kpe kera yô.