Read tiv 2 Samuel 20 Bible Online

2 Samuel 20 - tiv bible

2 Samuel 20

¹Tsô gbilinor ugen lu her, iti na er Sheba wan u Bikeri, Orbenyamin; a tôngo korough a kaa er: Se mba a ci ken Davidi ga; man se mba a dyako ken wan u Yese kpaa ga; yô, hanma or nana̱ hide hen tenti u nan, ne Iserael.

²Tsô ior i Iserael cii mough undu Davidi, gema dondo sha Sheba wan u Bikeri la; kpa ior i Yuda yô, ta ken tor ve, hii shin Yordan je zan zan za ar sha Yerusalem.

³Tsô Davidi va hen ya na ken Yerusalem; tor tôô kasev mba puev mbala, kasev nav mba sha uika, mba lu undu ve er ve̱ kuran un ya la, a wa ve ken iyou, a ver mbakuran lu koson ve, a kera yav a ve ga. I wuhe ve ker, zan zan ayange a kuugh a ve, ve lu icôghol.

⁴Tsô tor kaa a Amasa er: Kohol mo ior i Yuda er ayange a lu a kuma atar ga ne, we kpaa lu her.

⁵Nahan Amasa za sha u una za kohol ior i Yuda; kpa a timbir zan zan iyange i i ver un la i kar.

⁶Tsô Davidi gema kaa a Abishai er: Hegen Sheba wan u Bikeri una er se kwagh u bo á hemba u Abesalom la; yô, kua a mbayev mba teru, zenda un ijime sha er a̱ de nyer ken agar a i maa a ugil, a̱ ndiir se ashe ga.

⁷Tsô ior mba Yoabi mough va dondo un, kua Mbakereti man Mbapeleti man anomaior cii; ve due ken Yerusalem sha u zendan Sheba wan u Bikeri ijime.

⁸Zum u ve ar hen zegeiwen u hen Gibeon la yô, Amasa va kegh ve gbenda. Yô, Yoabi lu a akondo na a utya iyol, a kange kwange sha mi, kua sanker shin iwenge ken var na; ngur yemen yô, sanker tsuwa gba.

⁹Tsô Yoabi kaa a Amasa er: Anngôm u ngu dedoo kpa? Yoabi gema kôr Amasa sha indyer sha uwegh nagh ku yanegh er una suse un zwa yô.

¹⁰Kpa Amasa ver ishima sha sanker u Yoabi lu a mi sha uwe la ga; nahan a kuma un sha uya, myam nam haa inya, a kera seer kuman un ga; tsô a kpe. Tsô Yoabi kar vea anngô na Abishai, ve zenda Sheba wan u Bikeri ityô.

¹¹Wanye u Yoabi ugen tile her, a gema a kaa er: Or u Yoabi a doo nan, man nan te ken Davidi yô, nana̱ cir ase Yoabi ijime.

¹²Yô, Amasa lu heregh lu sharegh iyol sha awambe na hen atô gbenda. Zum u or la nenge ior cii tile yô, a tôô Amasa a kar a mi sha gbenda kera, a ver un ken toho a cir un ikondo, gadia a nenge hanma or u nan va ar hen na yô, nan tile.

¹³Er i tôô un sha gbenda kera yô, ior ca ca kar dondo Yoabi ijime, sha u zendan Sheba wan u Bikeri la ityô.

¹⁴Un yô, a kar hen ikwe i Iserael cii a va ken Abel man Bete-maaka kua Mbaberi cii; ve cii ve kohol, ve dondo un.

¹⁵Tsô i va kase un ken Abel u Bete-maaka, ve ta tihi inya hen kpegar za ar sha gil u ken won la ior mba ve lu a Yoabi imôngo cii ve gba timen gilgar er a̱ gba.

¹⁶Tsô kwase u fan kwagh u ken gar la yila, kaa er: Ungwa nen, ungwa nen! Shi kaa nen Yoabi ner: Va heen, m̱ ôr kwagh a we.

¹⁷Tsô a kporom her a na; kwase la kaa a na er: Ka we Yoabi nee? A rumun a kaa er: Ka mo. Tsô a kaa a na er: Yô, ungwa ase kwaghôron u kpan wou u kwase ne. A gema a kaa er: M ngu ungwan.

¹⁸Tsô a kaa er: Ayange a tsuaa la yô, i kaan er: I̱ za hen kwagh a Abel; kape i kuren kwagh la.

¹⁹Mo m ngu môm ken mba keren bem man môm ken mba kuman u veren ishima sha a ve ken Iserael; ka saren we u timin gar, man gema ka ngô ken Iserael je; inja na nan man i lu u ka vihin dyako u TERE?

²⁰Yoabi gema kaa er: Ka nahan ga! Ka nahan je ga! Mo m ngu nyi je ve me vihi kwagh shin me tim kwagha?

²¹Kwagh ne ka nahan ga; kpa orgen u sha tar u iwoogh u Eferaim iti na er Sheba wan u Bikeri, a mough ngu hendan kwagh a tor Davidi je; yô, due a na tseegh tsô, tsô me kar hen gar ne kera. Kwase la gema kaa a Yoabi er: Yô, á gbihi u ityough nagh kia sen sha kpekpe gar.

²²Nahan kwase la za ôr kwagh a ior cii sha kwaghfan. Tsô ve gber ityough ki Sheba wan u Bikeri, ve kende Yoabi. Tsô a tôngo korough, ve sambe, ve kar hen gar la kera, hanma or yem hen tenti u nan. Yoabi kpaa hide ken Yerusalem hen tor.

²³Yoabi yô, lu orvesen sha ikumutya i Iserael cii; Benaia wan u Yehoyada lu sha Mbakereti man Mbapeleti;

²⁴Adoram lu nengen sha mba ve eren tom u kpan yô; Yehoshafati wan u Ahiludi lu or u ngeren abaver ken takerada;

²⁵Sheva lu or u ngeren; Sadoki man Abiatar lu upristi;

²⁶man Ira Oryair kpaa lu pristi u Davidi.