Read tiv 2 Samuel 3 Bible Online

2 Samuel 3 - tiv bible

2 Samuel 3

¹Ya u Saulu a ya u Davidi ve nôngo ityav gbem. Davidi yô, seer agee zaan hemen hemen, kpa ya u Saulu yô, lu panden hiden jime jime.

²Davidi mar ônov mba nomso ken Heberon; wan na u iunda lu Amnon, a mar un a Ahinoam wan u Mbayesereel;

³u sha uhar lu Kileabi, a mar un a Abigail kwase u Nabal, Orkarmel; u sha utar lu Abesalom wan u Maaka wan u Talmai, tor u Geshur;

⁴u sha unyiin yô, lu Adoniya wan u Hagiti; u sha utaan lu Shefatia wan u Abital;

⁵u sha ataratar lu Iteream u Egela, kwase u Davidi. Mban Davidi mar ve hen Heberon.

⁶Tsô er ya u Davidi a ya u Saulu ve lu nôngon ityav ayol a ve la yô, Abiner tile taveraa ken ya u Saulu.

⁷Kpa Saulu lu a kpankwase, iti na er Risepa, wan u Aia. Tsô Ishibosheti kaa a Abiner er: Inja na nan u yav a kpankwase u tereme?

⁸Tsô ishima vihi Abiner kpishi sha kwaghôron u Ishibosheti la, a kaa er: Mo m ngu ityough ki iwaagh ki Yuda shinii? Zan zan hegen m ngu eren a ya u teru Saulu doo doo, man a anmgbianev nav kua akar a na kpaa, m na u sha ikev i Davidi kpaa ga; nahan kpaa, nyian yô, u ngu nan mo ibo sha kwagh u kwase ne.

⁹Aôndo A̱ er a Abiner nahan shi i̱ hemba nahan kpaa aluer mea er a Davidi er TER A bum a na ga yô.

¹⁰Me dugh tor hen ya u Saulu me taver ikônough ki torough ki Davidi sha Iserael kua sha Yuda kpaa, hii hen Dan zan zan za ar hen Bersheba.

¹¹Tsô a kera fatyô u ôron kwagh ugen a Abiner ga, gadia a lu cian un.

¹²Tsô Abiner tindi mbatyomov hen Davidi sha ityough nagh, a kaa er: Tar ne ka u ana? Shi a kaa er: Ya ikur a mo, mo kpaa, nenge, uwegh agh kua lu a we imôngo, me gema Iserael cii me va a ve hen a we.

¹³A kaa er: Ka sha mi, me ya ikur a we, kpa kwagh ngum a we môm tsô, ú nenge a ishigh yagh ve ga, saa ú vam a Mikal wan u Saulu, shighe u ú vaan u va nengen mo yô.

¹⁴Shi Davidi tindi mbatyomov hen Ishibosheti wan u Saulu, a kaa er: Nam kwase wam Mikal u ngise m er un sha ishe i uipusu mba Mbafiliti deri la.

¹⁵Nahan Ishibosheti tindi i za kua a na hen nom na Paltiel wan u Laishi.

¹⁶Nom na gba veren un gbenda vaan zan a na ityô zan zan za ar hen Bahurim. Tsô Abiner kaa a na er: Hide; tsô a hide.

¹⁷Abiner vande tumen idyu a mbatamen mba Iserael, a kaa er: Sha ayange a tsuaa la, ne lu keren Davidi ner a̱ lu tor wen.

¹⁸Yô, er nen ase nahan, gadia TER iyange ôr kwagh ter Davidi kaa er: Ka sha uwegh ku wanakiriki Wam Davidi man Me yima ior av Iserael sha ikev i Mbafiliti kua sha ikev i mbaihomov vev cii kpaa ye.

¹⁹Shi Abiner vande ôron kwagh a Mbabenyamin kpaa; Abiner za sha u za ôron kwagh a Davidi hen Heberon sha akaa a Iserael kua Mbabenyamin ve ver ishima u eren cii yô.

²⁰Tsô Abiner va hen Davidi ken Heberon a ior ikundu a na ityô. Nahan Davidi yôr Abiner kua ior mba ve lu a na ityô mbala iwer.

²¹Tsô Abiner kaa a Davidi er: Me mough me yem me za kohol Iserael cii, me va a mi hen terem tor sha er ve̱ va ya ikur a we, er u tema tor er i sar u ken ishima cii yô. Tsô Davidi na Abiner gbenda, a mough doo doo.

²²Hen shighe la je mbayev mba Davidi kua mba Yoabi za hide ken utya, ve va a ishar kpishi; kpa Abiner kera lu a Davidi ken Heberon imôngo ga, gadia a vande nan un gbenda yem doo doo je.

²³Zum u Yoabi kua ikumutya i i lu a na imôngo cii, va nyôr yô, i kaa Yoabi er: Abiner wan u Ner va hen tor, a na un gbenda a yem bem bem je.

²⁴Tsô Yoabi va hen tor, va kaa er: Ka nyi u er nahan? Nenge, Abiner va her a we, man ka nyi u ne un gbenda a yem dedoo nahana?

²⁵U fa Abiner wan u Ner. A va sha u va tsughun we sha u una fa mdugh wou man mnyer wou, shi una fa kwagh u u eren cii kpaa.

²⁶Zum u Yoabi mough hen Davidi due yô, a tindi mbatyomov, ve zenda Abiner ijime zan zan hen ijôr i Shira, ve za hide a na, kpa Davidi fa ga.

²⁷Mba za hidi a Abiner ken Heberon yô, Yoabi ta ibalegh a na hen hundagar er una ôr kwaghhuwa a na, tsô a maa a kuma un kwagh sha uya a kpe, sha ci u awambe a Asahel anngô na la.

²⁸Tsô ken masetyô zum u Davidi ungwa nahan yô, a kaa er: Mo kua tartor wam lun yase a ibo sha ishigh ki TER sha won je ga, sha ike i awambe a Abiner wan u Ner ne;

²⁹i̱ hide sha ityough ki Yoabi kua sha ya u ter na cii; ken ya u Yoabi yô, or u duen ihyelegh iyol, shin orimande, shin or u suur sha aga, shin or u kpen ku u ishôm, shin or u banen a kwaghyan, nana̱ de banen ker ga.

³⁰Kape Yoabi vea anngô na Abishai ve wua Abiner la, sha ci u lu wua anngô ve Asahel hen Gibeon ken utya yô.

³¹Tsô Davidi kaa a Yoabi kua ior mba ve lu a na cii er: Ande nen akondo a en, ta nen mzemba uya, kar nen Abiner sha hemen zungwe nen. Tor Davidi kpaa dondo sha ikom.

³²Ve ii Abiner ken Heberon, tor vaa hen uwar u Abiner genger genger, ior cii kpaa vaa.

³³Tor dugh kwelegh sha ku u Abiner, a kaa er: Abiner gba kpen er ibumeor ka nan kpe nahan tsôô?

³⁴Ave ou i kange a ga, angahar a ou kpaa i haa a ahye a togula ga; er ônov mba aferev ka ve wua or nahan, kape i woo u la. Ior cii shi seer vaan un.

³⁵Tsô ior cii va, va zamber a Davidi er a̱ ya kwagh er iyange i shi her yô; kpa Davidi bum, kaa er: TER A̱ er a mo nahan shi i̱ hemba nahan kpaa aluer mea bende bredi zwa shin hanma kwaghyan ugen er iyange i lu a bee ga ne yô.

³⁶Nahan ior cii nenge kwagh la, doo ve gadia hanma kwagh u tor ka una er yô, a doo ior cii.

³⁷Ior cii kua Iserael cii kpaa, ve kav sha iyange la er i lu ishima i tor man i woo Abiner wan u Ner ga yô.

³⁸Shi tor kaa a mbayev nav er: Ne fa er nyian ititor, zegeor, a kpe ken Iserael gaa?

³⁹Kpa mo yô, nyian m ngu a lu a agee ga, shin er i shighem mkurem sha u m̱ lu tor nahan je kpaa, gadia ior mban, ônov mba Seruya, ve taver ve hembam. TER A̱ or iferor la iyev sha ifer na la.