Read tiv 2 Samuel 6 Bible Online

2 Samuel 6 - tiv bible

2 Samuel 6

¹Tsô Davidi shi kohol uicuwanmbaiorov mba Iserael cii, ior dubu ikundugber.

²Nahan Davidi mough a ior mba ve lu a na imôngo cii, za hen Baal-Yuda, sha u za tôôn areki u Aôndo, u i yer un sha Iti, ka iti i TER u akum a Sha, u A tem sha ucerubi je la.

³Ve penda areki u Aôndo sha ikyekye i he, ve due a mi hen ya u Abinadabi u a lu hen Gibea la; ônov mba Abinadabi Usa man Ahio, ve lu kôôm ikyekye a areki u Aôndo la.

⁴Ahio kar hemen areki u Aôndo.

⁵Davidi a ya u Iserael cii, ve gba vinen amar sha ishigh ki TER a ityogholov mbi kuhwan anza kposo kposo mbi i er sha kon u fer yô; umolo man mbaadiguve man ukungkung man mbaakaca man ukwen.

⁶Zum u ve za ar hen vande u gbiren alakema u Nakon la yô, Usa za uwegh sha areki u Aôndo kôr un, gadia abua nôngo gbev.

⁷Tsô ishima vihi TER a Usa; Aôndo ta num sha a na hen ijiir la sha kwaghbo na la, a maa a kpe hen kpe u areki u Aôndo la.

⁸Cier Davidi iyol er TER A ande A te num sha Usa yô, a maa a ii ijiir la iti er Perese-usa zan zan nyian.

⁹Davidi cia TER sha iyange la je, a kaa er: Á er nan man me va a areki u TER her a mo nahana?

¹⁰Nahan Davidi kera rumun u tôôn areki u TER van a mi her a na ken gar u Davidi ga; kpa Davidi kaha a mi, za a mi ken ya u Obedi-edom, Orgiti.

¹¹Tsô areki u TER lu hen ya u Obedi-edom, Orgiti, iwer itiar; nahan TER ver Obedi-edom doo doo a ya na cii.

¹²Tsô i va ôr tor Davidi er, TER ver ya u Obedi-edom doo doo kua akaa a na cii, sha ci u areki u Aôndo. Nahan Davidi za tôô areki u Aôndo hen ya u Obedi-edom, va a mi ken gar u Davidi saan saan.

¹³Er mbatôôn areki u TER la yem er a-avenangahar ataratar nahan yô, a sôngo nombua kua gumbua, a na nagh a mi.

¹⁴Nahan Davidi vine amar sha ishigh ki TER sha agee na cii, Davidi zer efodi u sha ikondo i pupuu.

¹⁵Kape Davidi man ya u Iserael cii ve va a areki u TER la, a awer a gbiren man ikor i tôngon kpaa kondo kondo la.

¹⁶Tsô, er areki u TER va nyôr ken gar u Davidi yô, Mikal wan u Saulu ta ashe hen ianiyoughough za nenge tor Davidi lu tsuwen vinen amar sha ishigh ki TER; tsô a laha un ken ishima.

¹⁷Tsô ve nyôr a areki u TER, ve va ver un hen ijiir na, ken atô u tenti u Davidi tim sha ci na la; nahan Davidi na iniav mbi nanden kua iniav mbi bem sha ishigh ki TER.

¹⁸Zum u Davidi bee u nan nagh ku nanden kua iniav mbi bem yô, a ver ior doo doo ken iti i TER u akum a Sha.

¹⁹Ior cii, ka ikpilaior i Iserael la cii, nomso kua kasev cii, a na hanma or akpekpa man ijuugh ki inyamegh man ijen i atam a wain a ombor. Tsô ior hembe cii, hanma or nan yem hen ya u nan.

²⁰Tsô Davidi hide sha u una ver ior mba hen ya na doo doo yô. Nahan Mikal wan u Saulu due u va keghen Davidi gbenda, a kaa er: Tor u Iserael ngu a icivir sha ashe a ior nyian tsôô, a er akondo kera sha ashe a ikpan i ukase i mbayev nav, vough er gbilinor u lun a kunya ga ka nan gba saghen ikondo nahan!

²¹Davidi gema kaa a Mikal er: Ka sha ishigh ki TER je, u A tsoughom, m hemba doon Un a teru man ya na cii la, A verem orhemen u ior mba TER, ka Iserael je la; me ember sha ishigh ki TER.

²²Me seer heen iyol yam á hemba heen kpaa, me laha iyol yam; kpa ikpan i ukase i u ter i la, i yô, me lu i a icivir.

²³Mikal wan u Saulu mar wan ga, zan zan kar kpen.