Read tiv 2 Samuel 7 Bible Online

2 Samuel 7 - tiv bible

2 Samuel 7

¹Tsô, er tor tema ken iyou na man er TER na un mmem sha mbaihomov nav cii mba ve kase un la yô,

²tor kaa a profeti Natan er: Nenge, mo m tema ken iyou i ikon i sedar, kpa areki u Aôndo yô, gema ngu tsan ken tenti tsô.

³Tsô Natan gema kaa a tor er: Yô, gba eren akaa a a lu u ken ishima cii, gadia TER ngu a we.

⁴Tsô hen tugh mbula je, kwaghôron u TER va hen Natan er:

⁵Za, za kaa wanakiriki Wam Davidi wer: TER ngu kaan nahan er: We, ú maam iyou i Me tema ker yôô?

⁶Gadia hii sha iyange i M due a ônov mba Iserael ken Igipiti la je zan zan nyian, M ngu a tema ken ma iyou ga, kpa ka ken tenti, ka ken tabernakel M lu zenden ye.

⁷Sha ajiir a M lu zenden a Mbaiserael imôngo la cii, M shi ôr kwagh a ma kwe u Iserael u M ver u sha u u kura ior Av Iserael la, Mer: Ka nyi ne maam iyou i sha ikon i sedar ga, kpa?

⁸Yô, za kaa wanakiriki Wam Davidi nahan wer, TER u akum a Sha ngu kaa nahan er: M tôô u hen ijiir i ilev yan toho, ken ijime i uile Mer, hingir or u hemen ior Av, Iserael;

⁹man M lu a we her ape u zenden cii, M tim mbaihomov ou sha ishigh you kera cii; Me er iti you ia za gwa er iti i uzegembaiorov mba ve lu sha won nahan.

¹⁰Shi Me ver ijiir sha ci u ior Av Iserael, Me môôr ve, sha u ve̱ tema hen ijiir ve ayol a ve, á kera num ve ga; ônov mba aferev kpaa vea kera za ve iyol er tsuaa la nahan ga,

¹¹er hii sha ayange a M ver mbaajiriv Mer, ve̱ nengen sha ior Av Iserael la; Me na u, ú mem sha mbaihomov ou cii. Man shi TER ngu kaan a we er: TER Una maa u ya.

¹²Zum u ayange ou á bee, ú yav a uter ou imôngo yô, Me ver wan wou ken ijime you u una due ken iyol you je yô, Me taver tor na.

¹³Ka un una maa iyou sha ci u iti Yam ye, Mo kpaa Me ver ikônough nagh ki torough kia lu gbem.

¹⁴Me lu Ter na, un di una lu wan Wam; aluer una er ifer yô, Me tsaha un sha akpa u or kua gbidiv mbu ônov mba iorov kpaa;

¹⁵kpa erdoo Wam una kar hen na kera ga, er M ngohol un hen Saulu, u M kar a na sha ishigh you kera la nahan ga.

¹⁶Ya wou kua tartor wou vea tile dông sha ishigh you gbem; ikônough you ki torough kia lu her gbem sha won.

¹⁷Ka sha akaaôron ne cii, kua mpase ne cii kpaa, Natan a ôr kwagh a Davidi ye.

¹⁸Tsô tor Davidi nyôr za tema sha ishigh ki TER; a kaa er: Mo m ngu nyi, Tere AÔNDO, ya wam ngu di nyi je, man U korom zan zan hegene?

¹⁹Kwagh ne kpaa ka kwagh u kiriki sha ashe Ou tsô, Tere AÔNDO, U ter kwagh u ya u wanakiriki Wou sha ayange a ken hemen ca je, ngu ka tindi sha ci u ior je, Tere AÔNDO.

²⁰Ka nyi je Davidi una shi á seer kaan We? Gadia U fa wanakiriki Wou, Tere AÔNDO.

²¹Sha ci u kwaghôron Wou man sha ishima You kpaa, U er zegekwagh ne cii, man U ne wanakiriki Wou a fe un yô.

²²Ka nahan man U hembe ye, TER Aôndo, or u kuman sha a We nan ngu ga, ma Aôndo ugen kpaa ngu ga, saa We, sha akaa a se ongo sha ato ase cii.

²³Ka hanma ikurior igen sha won i lu er ior Ou Iserael nahana, i Aôndo A za yem i er i̱ hingir ior Nav jim, sha u iti Na i̱ za sha won, man sha u Una er uzegembaakaav sha ci ve kua akaa a cieryol sha ci u tar Wou, sha ishigh ki ior Ou, mba U yem ve sha ci Wou ken Igipiti sha ikev i atôatyev man mbaaôndo veve?

²⁴Shi U ver ior Ou Iserael Wer, ve̱ lu ior Ou gbem sha won; We TER, U hingir Aôndo ve.

²⁵Yô, TERE Aôndo, kwaghôron Wou u U er sha wanakiriki Wou kua ya na la, taver un gbem, er kwagh u U kaa la,

²⁶sha er i̱ kende a iti You sha gbem, er i kaan er: TER u akum a Sha ka Aôndo u Iserael; ya u wanakiriki Wou Davidi kpaa una lu sha ishigh You taveraa.

²⁷Gadia We TER u akum a Sha, Aôndo u Iserael, U pase wanakiriki Wou Wer, Me maa u ya, ka nahan man wanakiriki Wou a sen U kwagh ne vangertiôr ye.

²⁸Hegen yô, Ter AÔNDO, We U ngu Aôndo, akaaôron Ou kpaa ka a mimi, U tôndo zwa a wanakiriki Wou sha kwagh u doon ne;

²⁹yô, rumun, ver ya u wanakiriki Wou, a̱ tsôr sha ishigh You gbem; gadia We Ter AÔNDO, U kaa nahan; sha iveren You i dedoo la ya u wanakiriki Wou a̱ lu a iveren gbem sha won.