Read tiv 1 Utor 10 Bible Online

1 Utor 10 - tiv bible

1 Utor 10

¹Zum u torkwase u Sekeba ungwa gwa u Solomon sha kwagh u iti i TER yô, a va u va karen un sha mbampin mba cimin.

²A va ken Yerusalem a ior mba va veren un, kpishi je, a urakumi mba tôôn ilyôghonov man zenaria kpishi je, kua awen a injaa. Er a va hen Solomon yô, a ôr un akaa a a lu un ken ishima cii.

³Solomon kpaa pase un mbampin nav cii; ma kwagh môm hemba tor, u pasen un ga.

⁴Er torkwase u Sekeba nenge kwaghfan u Solomon cii man iyou i a maa la,

⁵man kwaghyan u sha tebul na man injamtem i ior nav man injamtil i mbatomov nav man akondo a ve man mbanan un kwaghman kua nagh nagh ku nanden ku a naan ken iyou i TER yô, kondo un iyol gbong.

⁶A kaa a tor er: Gwa u m ongo ken tar wam sha akaa a ou kua mfe wou yô, ka mimi je.

⁷Nahan kpaa m na jighjigh sha akaaôron la ga, zan zan m va nenge sha ashe am, yô, i ôron ma kwagh je ga; kwaghfan wou man inyaregh you gande gwa u m ongo yô.

⁸Saan ior ou iyol, saan mbayev ou mban iyol mba ve til sha ishigh you gbem, ve ongo kwaghfan wou ne.

⁹I̱ wuese TER, Aôndo wou, u u doo Un ishima A ver u sha ikônough ki torough ki Iserael; ka er Iserael a doo TER ishima gbem man A ver u tor er u̱ ôron ijir, shi u̱ eren perapera kpaa ye.

¹⁰Tsô a na tor zenaria kuma utalenti deri man ikundu, man ilyôghonov kpaa ngee kpishi kua awen a injaa; mayange je i kera shi va nyôr a ilyôghonov kpishi er mbi torkwase u Sekeba na tor Solomon la nahan ga.

¹¹Utso mba Hiram mba ve za tôô zenaria ken Ofir ve va a mi la, ve za va a ikon i sandal man awen a injaa kpishi kpaa ken Ofir.

¹²Tor er itiran i kôron ave sha mi sha agbur a unden zan sha iyou i TER kua iyou i tor, sha ikon i sandal la; shi a er umolo man mbaadiguve sha ci u mbawanatsam; i kera nyôr a ikon i sandal nahan ga, shi i kera nenge a i nahan mayange kpaa ga zan zan nyian.

¹³Tor Solomon na torkwase u Sekeba akaa a a sar un cii, hanma kwagh u a sôn yô, seer sha akaa a Solomon na un sha inja i tor la. Tsô a mough a yem hen tar na, un a ior nav.

¹⁴Myohom ma zenaria ma Solomon a zua a mi sha inyom i môm yô, lu zenaria kuma utalenti deri ataratar man akundu atar kar ataratar;

¹⁵i ôr kwagh u i zua a mi hen mbazendenkpenga man mbateenkasua, man utor mba akuraior kposo kposo kua ugomna la ga.

¹⁶Tor Solomon var iperutya deri uhar sha zenaria; a vihi zenaria kuma ushekel deri ataratar sha hanma perutya.

¹⁷Shi a var akuvautya kpaa deri utar sha zenaria, a vihi zenaria kuma pam utar sha hanma akuvautya; tor ver ve ken Iyou i Ikô i Lebanon.

¹⁸Shi tor er zegeikôn u tor sha anyi a nortar; a cir un zenaria u wang iyol.

¹⁹Agbur a unden sha ikônough ki torough kila lu ataratar, ityough ki ikônough kila va igundu ken ijime, man i gema i wa un igyar i kôron ave sha mi, vegher ne man vegher la, henpe teman la, ubegha uhar tile hen igyar i kôron ave sha mi la.

²⁰Ubegha pue kar uhar tile sha agbur a unden sha mi ataratar la, ken imbusu ne kua ngila kpaa; mayange je i er kwagh nahan ken tartor ugen ga.

²¹Ayongo a man kwagh a min a tor Solomon cii lu a zenaria, man ikav mbi ken Iyou i Ikô i Lebanon cii kpaa lu mbi zenaria cii, azurfa lu sha mi ga; gadia sha ayange a Solomon la a lu kwagh u ikoogh ga.

²²Gadia sha zegemnger, tor lu a ikpilautso mba Tarshishi, ve lu a utso mba Hiram imôngo; anyom a kuman atar yô, utso mba Tarshishi cii ve va kwa môm a zenaria man azurfa man anyi a nortar man ikarakya kua upikoki.

²³Kape tor Solomon hemba utor mba sha won cii inyaregh kua kwaghfan la.

²⁴Tar cii, sar u u nengen a Solomon, sha u ungwan kwaghfan na, u Aôndo A ne un ken ishima la.

²⁵Hanma or lu van a iwua i nan, lu ikav mbi i er sha azurfa man mbi sha zenaria man akondo man ikav mbi utyav man ilyôghonov man anyinya kua mbaalfadari, anyom anyom.

²⁶Solomon kohol akekeautya kua mbaanyinyav; a lu a akekeautya dubu man deri unyiin, man mbaanyinyav dubu pue kar uhar, a ver ve ken agar a akekeautya a lu ker yô, man hen tor ken Yerusalem kpaa.

²⁷Tor er azurfa ngee hingir er awen nahan ken Yerusalem, ikon i sedar kpaa ngee hingir er ikon i tur i shin pev nahan, ngee je gande u ôron.

²⁸Anyinya a Solomon lu a mi yô, ka ken Igipiti man ken Kue i za vaan a a ye; mbakasuav mba tor za yamen a ken Kue sha ishe i a vough.

²⁹Ka a za va a ikyekye ken Igipiti yô, i va tee i sha ushekel mba azurfa deri ataratar, nyinya yô, sha ushekel deri man akunduahargber; kape i vaan a mi i va teen utor mba Hiti kua utor mba Shiria cii la.