Read tiv 1 Utor 12 Bible Online

1 Utor 12 - tiv bible

1 Utor 12

¹Tsô Rehobiam za hen Shekem; gadia Iserael cii va hen Shekem sha u va kôron un tor.

²Er Yerobiam wan u Nebati ungwa nahan yô (gadia a lu ken Igipiti, henpe a yevese tor Solomon a za lu la), a mough ken Igipiti a hide.

³Tsô ve tindi i za yila un, Yerobiam man mkohol u Iserael cii ve va, ve va ôr kwagh a Rehobiam, ve kaa er:

⁴Teru lu wan se ikav mbi yuhwan; yô, shi pande se tom u ican u teru man ikav nav mbi yuhwan mbi a wa se ne; nahan yô, sé rumun we.

⁵A kaa a ve er: Mough yem nen, ayange á kar atar yô, shi hide nen her a mo. Maa ior hembe yem.

⁶Nahan tor Rehobiam tume idyu a mbatamen, mba iyange ve tilen sha ishigh ki ter na Solomon shighen u a lu uma la. A pine er: Mnenge wen yô, ngu nana, sha kwagh u mbana?

⁷Ve kaa a na er: Aluer wea rumun u hingir ortom u ior ne nyian man wea wa ve iko man wea na ve imo man wea ôr kwagh a ve sar sar yô, nahan vea hingir mbatomov ou gbem je.

⁸Kpa a ta imo i mbatamen ve kaa un la kera, a gema a hen kwagh a mbayev mba ve lu kwav a na, ve tilen sha ishigh nagh yô.

⁹A pine ve er: Mhen wen yô, ngu nana, sha kwagh u sé ôr ior mban mba ve er kwagh a mo ve pinim er: Heghem se ikav mbi teru lu wa se la?

¹⁰Tsô mbayev mba ve lu kwav na la, ve kaa a na er: Yô, kaa ior mba ve er kwagh a we mban, ve kaan er: Teru wa se ikav mbi yuhwan kpa we yô, pande se mbi la; kaa a ve nahan wer: Ihôwe-ikumbul wam hemba kehen a iwenge i terem.

¹¹Yô, aluer terem lu wan ne ikav mbi yuhwan yô, mo me seer ne mbi; aluer terem lu tsahan ne sha akpa, mo me tsaha ne sha kwagir.

¹²Tsô Yerobiam a ior cii ve va hen Rehobiam sha iyange i sha utar, sha imo i tor kaa a ve la er: Va nen her a mo sha iyange i sha utar la.

¹³Nahan tor gema ôr kwagh a ior sha tswam; a venda imo i mbatamen kaa un la,

¹⁴a gema a ôr ve kwagh sha imo i mbayevikaior mbala, a kaa er: Terem lu wan ne ikav mbi yuhwan, mo me seer ne mbi, terem tsaha ne sha akpa, mo me gema me tsaha ne sha kwagir.

¹⁵Kape tor wa ior iko ga la; gadia lu sha awashima u TER je, sha u Una kure kwaghôron Na u Ahiya Orshilo ôr a Yerobiam wan u Nebati sha imo i TER la.

¹⁶Zum u Iserael cii ve nenge er tor wa ve iko ga yô, ior gema kaa a tor er: Kwar wase shi ngu ken Davidi hana? Se kera mba a dyako ken wan u Yese kpaa ga; hide nen hen utenti enev ne Iserael; yô, gba nôngon sha ya wou iyol you tsô Davidi. Nahan Iserael hembe yem hen utenti vev.

¹⁷Kpa Mbaiserael mba ve lu ken agar a Yuda yô, Rehobiam tema tor sha a ve.

¹⁸Nahan tor Rehobiam tindi Adoram u a lu nengen sha mbatomov mba i kighir ve a tom la, kpa Iserael cii ta un awen ve wua. Tsô tor Rehobiam unde ikyekye na fefa sha u yevese yemen ken Yerusalem.

¹⁹Kape Iserael hendan a ya u Davidi la, zan zan nyian ne.

²⁰Nahan zum u Iserael cii ungwa gwa er Yerobiam hide yô, ve tindi i za yila un er a̱ va hen mkohol, nahan ve ver un tor sha Iserael cii; ma orgen ta ken ya u Davidi ga, saa kwe u Yuda tseegh.

²¹Zum u Rehobiam va ken Yerusalem yô, a kohol ya u Yuda cii man kwe u Benyamin, uicuwanmbaiorov dubu deri man dubu akunduanyiin, mba ve lu mbanôngontyav yô, sha u á nôngo ityav a ya u Iserael, á shi á hide a tor hen Rehobiam wan u Solomon yô.

²²Kpa imo i TER va hen Shemaia, or u Aôndo er:

²³Ôr kwagh a Rehobiam wan u Solomon, tor u Yuda, man a ya u Yuda cii kua u Benyamin kua ior mbagenev cii, kaa ve wer:

²⁴TER ngu kaan nahan er: De kende nen ga, de za nenge nen ityav a anmgbianev enev, Mbaiserael ga; hanma or nana̱ hide hen ya u nan; gadia kwagh ne ka her a Mo a dugh ye. Tsô ve ungwa imo i TER, ve kôr gbenda ave, ve hide sha imo i TER.

²⁵Tsô Yerobiam maa Shekem sha tar u iwoogh u Eferaim, a tema ker; a mough keregh, a za maa Penuel.

²⁶Nahan Yerobiam kaa ken ishima na er, tor una va hide hen ya u Davidi;

²⁷aluer ior mban vea kôndo sha u za nan nagh ken iyou i TER ken Yerusalem yô, asema a ior aa shi á hide hen ter ve, Rehobiam, tor u Yuda; nahan vea wuam, vea hide hen Rehobiam tor u Yuda.

²⁸Nahan tor hen kwagh, a gema a er anibuav uhar sha zenaria; a kaa a ve er: Ne za ken Yerusalem kuma ve; nenge mbaaôndo ou, we Iserael, ka mba ve due a we ken tar u Igipiti je ne.

²⁹A ver u môm ken Betel, ugen a ver ken Dan.

³⁰Kwagh ne gema hingir kwaghbo; gadia ior ve za civir u môm hen Betel ugen di hen Dan.

³¹A gema ajiir a taven sha hingir utempel; shi a tôô ior wue wue a ver ve upristi, mba ve lu ônov mba Levi ga yô.

³²Tsô Yerobiam ver iniongo sha uwer u sha anigheni, ayange a u pue kar ataan la, sha inja i iniongo i ken Yuda, a za unde sha atse a nanden nagh sha mi la, kape a er ken Betel la, a lu nan anibuav mba a er mbala nagh; shi a ver upristi ken Betel sha ajiir a taven sha a a er la.

³³A za unde sha atse a a er ken Betel la, sha iyange i sha pue kar ataan sha uwer u sha anigheni la, ka uwer u a tsuwa iyol na sha ishima na la; a ver iniongo sha ci u Mbaiserael man a unde sha atse u za nanden kwaghhumandoon kpaa.