Read tiv 1 Utor 14 Bible Online

1 Utor 14 - tiv bible

1 Utor 14

¹Hen shighe la Abiya wan u Yerobiam gba angev.

²Tsô Yerobiam kaa a kwase na er: Shi mough ase gema iyol, i̱ de kera kaven er u lu kwase u Yerobiam ga; yô, za hen Shilo; nenge ka ker profeti Ahiya a lu ye, un u lu teren mo er me ya tor sha ior mban yô.

³Shi tôô ikpen i bredi pue man akpekpa kua ishegh i iyoughough, za her a na; una ôr u kwagh u una er wanakiriki ne yô.

⁴Tsô kwase u Yerobiam er nahan, a mough a za hen Shilo, a va hen ya u Ahiya. Ahiya nengen ga, gadia ashe na lu gang, sha ci u iyol i been.

⁵Nahan TER kaa a Ahiya er: Nenge, kwase u Yerobiam ngu van her a we er una pine kwagh u wan na, gadia ngu uange; yô, ka nahan nahan ú ôr un ye; gadia zum u una nyôr yô, una gema iyol er ka kwase ugen yô.

⁶Tsô zum u Ahiya ungwa acin a angahar a na, er a va nyôr sha hunda yô, a kaa er: Nyôrôhô, kwase u Yerobiam; ka nyi u gem iyol you er u ngu kwase ugen nahana? Gadia i tindim a loho u bo her a we.

⁷Hide, za kaa Yerobiam wer: TER, Aôndo u Iserael, ngu kaan nahan er: Er M kende u sha ken ior, M ver u orhemen sha ior Av Iserael,

⁸M tsuwe tor hen ya u Davidi, M na u; nahan kpaa u lu er wanakiriki Wam Davidi ga, u a wa iko sha atindi a Am, a dondom a ishima na cii, lu eren kwagh u a lu vough tseegh sha ashe Am yô;

⁹kpa we yô, u er ifer hemba mba ve vande hemen a we cii, je u gema u za er mbaaôndo mbagenev iyol you, man ieev mbi keren a ker, sha u u bamem yô, shi u gbihim ken ijime you kpaa;

¹⁰yô, nenge Me va a ican sha ya u Yerobiam, Me gber Yerobiam hanma wannomso kera, u nan lu ken uikangen man u nan tem enger enger ken Iserael kpaa, Me ese ya u Yerobiam kera purututu er or ka nan ese ihôghonov zan zan mbi bee kera cii nahan.

¹¹Or u Yerobiam u nana kpe ken gar yô, iwa ia ya nan; u nana kpe ken ikôngo yô, inyon i sha ia ya nan, gadia TER kaa nahan.

¹²Nahan mough, yem hen ya wou; shighe u ú za haan angahar ken gar yô, wan la di una kpen;

¹³Iserael cii vea zungwe ku na, vea ii un; gadia ior i Yerobiam cii ka un tseegh a ii un shin uwar ye; gadia ken a na yô, i wa zuan a kwagh u dedoo sha ishigh ki TER, Aôndo u Iserael, ken ya u Yerobiam.

¹⁴Man shi TER Una ver tor ugen sha Iserael, u una hembe ya u Yerobiam sha iyange la yô. Ka nana? Hegen je kpaa.

¹⁵Gadia TER Una gbidye Iserael er kunakwa ka u tenger shin mnger nahan; Una wuhe Iserael ken tar u dedoo ne kera, u A na uter vev la, Una sambe ve zan zan yande ifi u Uferati la; gadia ve er Asherim ve, ve bam TER sha u vihin Un ishima.

¹⁶Una ta Iserael kera, sha ci u asorabo a Yerobiam a er la, man a ne Iserael a er a kpaa la.

¹⁷Tsô kwase u Yerobiam mough yem za nyôr hen Tirsa; va ar hen kpandehunda u iyoughough yô, wan la maa sule.

¹⁸Iserael cii ii un, ve zungwe ku na, sha imo i TER kaa wanakiriki na profeti Ahiya la vough.

¹⁹Aerenakaa a Yerobiam agen, er a nôngo ityav man er a tema tor yô, nenge, i nger a ken ruamabera u abaver a utor mba Iserael.

²⁰Ayange a Yerobiam tema tor yô, kuma anyom ikundu kar ahar; tsô a yav a uter nav imôngo; wan na Nadabi tema tor sha ityough nagh.

²¹Rehobiam wan u Solomon tema tor ken Yuda. Zum u Rehobiam ya tor la, a lu anyom akunduahar kar môm; a tema tor anyom pue kar ataankarahar ken Yerusalem; ka gar u ken ikwe i Iserael cii u TER A tsough un u Una ver iti Na ker la; iti i ngô na er, Naama, wan u Mbaamon.

²²Yuda er kwaghbo sha ashe a TER, ve kpoghol iwuhe Na sha asorabo a ve er la, gande kwagh u uter vev ve er cii.

²³Gadia ve maa ajiir a taven sha, shi ve tim mtôm ma awenem man Asherim sha hanma igungu u taven, man shin itine i hanma kon u lun a mure;

²⁴mba lun inja er Mbasodom nahan kpaa ve lu ken tar la; ve lu eren akaa a hôngorough a akuraior, a TER zenda a sha ishigh ki Iserael kera la.

²⁵Tsô, sha inyom i sha utaan i tor Rehobiam la, Shishaki tor u Igipiti kôndo sha u va nôngon ityav a Yerusalem;

²⁶a kura ikav mbi injaav mbi ken iyou i TER, kua ikav mbi injaav mbi ken iyou i tor; a kura ca ca; shi a kura iperutya i zenaria i Solomon er la cii.

²⁷Nahan tor Rehobiam er iperutya igen sha togula sha ityouv mbi ingila; a ver i sha ikev i mbahemenev mba mbakuran, mba ve kuran hundaya u tor yô.

²⁸Tsô hanma shighe u tor una nyôron ken iyou i TER yô, mbakuran ve tôô i, man ve shi ve hide a mi ken iyou i mbakuran.

²⁹Aerenakaa a Rehobiam agen, man akaa a a er cii, i nger a ken ruamabera u abaver a utor mba Yuda la gaa?

³⁰Ityav lu hen atô u Rehobiam a Yerobiam gbem.

³¹Tsô Rehobiam yav a uter nav imôngo, i ii un a uter nav imôngo, ken gar u Davidi; iti i ngô na er, Naama, wan u Mbaamon. Wan na Abiyam tema tor sha ityough nagh.