Read tiv 1 Utor 17 Bible Online

1 Utor 17 - tiv bible

1 Utor 17

¹Tsô Eliya Ortishibi u hen Tishibi u ken Gileadi la, a kaa a Ahaba er: Mimi je, er TER, Aôndo u Iserael, u m til sha ishigh Nagh A lu u uma ne, avure aa kera gba ga, ura kpaa ua kera nôô ken anyom ne ga, saa sha imo yam.

²Nahan imo i TER va her a na kaa er:

³Mough heen, ver ishigh vegher u sha ityoughkitaregh, za yer hen uwagh u Keriti u u lu sha ishigh ki Yordan la.

⁴Yô, gbaa man mngerem ma uwagh la tsô; M kaa ugugôô Mer, ve̱ gba koson we ker tsô.

⁵Tsô a yem a za er sha imo i TER; a za lu hen kpeuwagh u Keriti u u lu sha ishigh ki Yordan la.

⁶Ugugôô va naan un bredi kua inyam pepe, man shi bredi kua inyam aikighe; a maan mngerem shin uwagh la.

⁷Ka tse dôghôô yô, uwagh la uma kera, gadia ura nôô ken tar la ga.

⁸Tsô imo i TER va her a na kaa er:

⁹Mough za ken Sarefati u ken tar u Shidon, za tema ker; nenge, M kaa kwasecôghol u ker Mer, a̱ koson we.

¹⁰Nahan a mough a za ken Sarefati; za ar hen hundagar yô, nenge, kwasecôghol lu her, lu sangen ayegheraikon; tsô a yila un, a kaa er: Shi za kese anmnger shin ishegh va nam m̱ ma.

¹¹Ngur zan u za kesen yô, a yila un, a kaa er: Shi vam a ankwaghyan kpaa.

¹²Kpa a kaa er: Er TER, Aôndo wou, A lu u uma ne, m ngu a anivurkwaghyan ga saa anmwe shin itye kua anmkure ciôn shin tum tsô; nenge, m ngu sangen ayegheraikon kpuaa mer, me za naha sha ci wam kua wan wam, sé ya, maa sé kpe.

¹³Tsô Eliya kaa a na er: De cie ga; za, za er kwagh u u kaa la, kpa vande panden eren mo anakpekpa a mi, va nam, tsô ú mase za eren sha ci wou kua wan wou.

¹⁴Gadia TER, Aôndo u Iserael, ngu kaan nahan er: Ityegh ki mweegh kin kia bee ga, tumugh ku mkure kpaa kua yina ga, zan zan iyange i TER Una kar nôôn ura shin tar.

¹⁵Tsô a za a za er sha imo i Eliya la; nahan un vea Eliya kua ya na, ve ya ayange kpishi.

¹⁶Ityegh ki mweegh bee ga, tumugh ku mkure kpaa yina ga, sha imo i TER, i A kaa Eliya la.

¹⁷Tsô ken masetyô u akaa ne yô, wan u kwase shon u ya lu u na la, gba angev; angev nav taver je, a kera lu uma ga.

¹⁸Nahan a kaa a Eliya er: Ka nyi i zoughom a we, we or u Aôndo? U va her a mo wer, m̱ umbur asorabo am, shi ú wuam wan kpaa!

¹⁹Tsô a kaa a na er: Nam wan wou. Nahan a ngohol un sha ikum i kwase la, a za a na sha iyou i yaven i sha, henpe a tema la, a penda un sha gambe na.

²⁰A vaa a TER a kaa er: TERE, Aôndo wam, U va a ican sha kwasecôghol u m tem her a na ne je, U wua wan na?

²¹Tsô a samber sha wanakiriki la kuma kwa tar, a sôn TER, a kaa er: TERE, Aôndo wam, uma u wanakiriki ne a̱ shi a nyôr ker a na, a̱ hingir uma.

²²Tsô TER ungwa imo i Eliya, uma u wanakiriki la, shi nyôr ker a na, a hingir uma.

²³Nahan Eliya tôô wanakiriki la, sha iyou i yaven, hungwa a mi va nyôr a mi ken ya la, za na ngô na; Eliya kaa er: Nenge, wan wou ngu uma!

²⁴Kwase la gema kaa a Eliya er: Hegen yô, m fa u ngu or u Aôndo je, kwaghôron u TER u ken zwa wou ka u mimi je.