Read tiv 1 Utor 21 Bible Online

1 Utor 21 - tiv bible

1 Utor 21

¹Tsô akaa ne nga kar kera yô, kwagh ne shi er: Naboti Oryesereel lu a sule u ikon i wain ken Yesereel, ikua ikua a ya u Ahaba tor u Samaria.

²Nahan Ahaba ôr kwagh a Naboti, a kaa er: Nam sule u ikon i wain wou ne, u̱ hingir mo sule u iue, gadia ngu ikua a ya wam, me na u sule a ikon i wain i hemban doon a ungun sha ityough ki u; shin aluer a hemba doon we yô, me yam a yam u sha inyar.

³Kpa Naboti kaa a Ahaba er: TER A̱ yangem u nan we dyako u uter av.

⁴Tsô Ahaba nyôr ken iyou na, hingir zunguluu, ishima vihi un sha kwaghôron u Naboti Oryesereel ôr a na la, er a kaa er: Me na u dyako u uter av ga. Nahan a za yav sha gambe na, a gema ishigh kera, a venda kwaghyan.

⁵Nahan kwase na Yesebel va her a na, va pine un er: Ka nyi ishima i vihi u yum, u vende kwaghyan nahana?

⁶A kaa a na er: Ka sha ci u m ôr kwagh a Naboti Oryesereel, m kaa a na mer: Nam sule u ikon i wain wou me yam sha inyar; shin aluer a doo u yô, me na u sule ugen sha ityough ki u; kpa a gema a kaa er: Me na u sule wam mayange ga.

⁷Tsô kwase na Yesebel kaa a na er: U ngu tor u Iserael ga ha? Mough, ya kwagh ishima i̱ lu u gbar gbar; me na u sule u ikon i wain u Naboti Oryesereel la.

⁸Nahan a nger utakerada sha iti i Ahaba, a cir ve, a ver ikav na sha mi, a tindi utakerada mbala hen mbatamen man mbatarev mba ken gar na, mba ve lu a Naboti yô.

⁹Ken utakerada mbala a nger er: Yôô iyange i hôron kwaghyan, ver Naboti ken hemen sha ishigh ki iorough;

¹⁰shi ver ior uhar, agbilinaior, sha ishigh nagh, ve̱ er shiada sha a na, ve̱ kaa er: U tuhwa Aôndo kua tor. Yô, due a na ken won, za ta un awen, a̱ kpe.

¹¹Tsô ior mba ken gar na, mbatamen kua mbatarev mba ve lu ken gar na la, ve er er Yesebel tindi ve loho nahan vough, er i nger ken utakerada mba a tindi ve a mi la yô.

¹²Ve yôô iyange i hôron kwaghyan, ve ver Naboti ken hemen sha ishigh ki iorough.

¹³Tsô ior ihiar, agbilinaior, ve nyôr ve tema sha ishigh nagh; ve agbilinaior la, ve gba eren shiada sha a na, ka sha Naboti je la, sha ishigh ki iorough, ve kaa er: Naboti tuhwa Aôndo kua tor. Tsô maa ve due a na ken won ken akôngo a gar, ve za ta un awen, a kpe.

¹⁴Nahan ve tindi hen Yesebel ve kaa er: I ta Naboti awen, a kpe ve.

¹⁵Zum u Yesebel ungwa er i ta Naboti awen a kpe kera yô, Yesebel kaa a Ahaba er: Mough ase sha, ya dyako u sule u ikon i wain u Naboti Oryesereel, u iyange a venda u teen we u sha inyar la; gadia Naboti ngu uma ga, a kpe kera.

¹⁶Tsô zum u Ahaba ungwa er Naboti kpe kera yô, Ahaba mough sen hen sule u ikon i wain u Naboti Oryesereel, sha u una ngohol u yô.

¹⁷Tsô imo i TER va hen Eliya Ortishibi kaa er:

¹⁸Mough, sen, za kohol Ahaba tor u Iserael, u a tem ken Samaria la; nenge, ngu ken sule u ikon i wain u Naboti, a za ker er una za ya dyako sha u.

¹⁹Za ôr kwagh a na wer: TER ngu kaan nahan er: U wua, shi ú kôr u ngoholo? Yô, shi ôr kwagh a na kaa wer: TER ngu kaan nahan er: Henpe iwa i ndiar awambe a Naboti la, iwa shi ia ndiar awambe a ou je.

²⁰Tsô Ahaba kaa a Eliya er: U zua a mo ve orihom wama? A rumun er: M zua a we; gadia u tee iyol you sha u eren ifer sha ishigh ki TER.

²¹Nenge, Me va a ican sha a we, Me ese u kera purututu, Me gber Ahaba hanma wannomso u nan lu ken uikangen man u nan tem enger enger ken Iserael kpaa;

²²shi Me gema ya wou una hingir er ya u Yerobiam wan u Nebati man er ya u Baasha wan u Ahiya nahan, sha ci u mbam u u bamen ne, shi u na Iserael a er kwaghbo kpaa.

²³Yesebel kpaa, TER kaa er: Iwa ia ya Yesebel hen gilgar u Yesereel u ken won la.

²⁴Or u Ahaba u nana kpe ken gar yô, iwa ia ya nan, man u nana kpe ken ikôngo yô, inyon i sha ia ya nan.

²⁵Mimi je or u nan tee iyol i nan u eren ifer sha ishigh ki TER er Ahaba nahan, nan lu ga, gadia kwase na Yesebel tor un ityô.

²⁶A er kwagh u hôngorough kpishi sha akombo a a dondo a, sha ieren i Mbaamor, mba TER zenda ve sha ishigh ki Mbaiserael kera la.

²⁷Tsô, zum u Ahaba ungwa akaaôron ne yô, a ande akondo a na, a ta ikondo uya, a hôr kwaghyan, a yav a ikondo uya, a gba zenden teghelee teghelee.

²⁸Nahan imo i TER va hen Eliya Ortishibi kaa er:

²⁹U nenge er Ahaba a hide a iyol na ijime sha ishigh Yagh kpa? Yô, er a hide a iyol na ijime sha ishigh Yagh nahan, nahan yô, Me kera va a ican la sha ayange na ga; saa sha ayange a wan na man Me va a ican la hen ya na ye.