Read tiv 1 Utor 8 Bible Online

1 Utor 8 - tiv bible

1 Utor 8

¹Tsô Solomon lôhô mbatamen mba Iserael man mbavesen mba sha ikwe cii kua mbahemenev mba sha uipaven mba Mbaiserael; ve va kohol hen tor Solomon hen Yerusalem, sha u za tôôn areki u ikuryan u TER hen gar u Davidi, ka Shion je la.

²Nahan ior mba Iserael cii va kohol hen tor Solomon hen iniongo sha uwer u Etanim, ka uwer u sha utaankaruhar je la.

³Mbatamen mba Iserael cii va, nahan upristi za tôô areki la.

⁴Ve va a areki u TER, man tenti u kohol ker la, uicighanmbaakaav cii mba ve lu ken tenti la; ka upristi kua Mbalevi ve va a mi ye.

⁵Tor Solomon kua ior i Iserael cii i i va kohol her a na la, ve lu sha ishigh ki areki, ve lu nan nagh ku sôngon sha iyôngo man ibua, iyenge i i gande u ôron fan.

⁶Nahan upristi va nyôr a areki u ikuryan u TER la, ve va ver un hen ijir na ken kpar u iyou kimi ken icighankpar u hemban cii la, shin atô u akper a ucerubi.

⁷Gadia ucerubi naregh akper a ve sha ijiir i areki la, ucerubi cir areki kua igbough nav.

⁸Igbough mbila lihe je, i nengen a ityouv mbi igbough mbila ken icighankpar sha ishigh ki kpar u kimi la, kpa i nengen a mi ken won ga; mbi her zan zan nyian.

⁹Ma kwagh ugen lu ken areki ga, saa ikpande i awen ihiar i Mose wa kimi hen Horebi, zum u TER ya ikur a Mbaiserael shighe u ve due ken tar u Igipiti la.

¹⁰Tsô zum u upristi due hen icighanjiir la kera yô, ibeenegh iv ken iyou i TER,

¹¹je upristi kera fatyô u tilen eren tom ga sha ci u ibeenegh kila; gadia iengem i TER iv ken iyou i TER la.

¹²Tsô Solomon ôr kwagh, a kaa er: TER kaa er, ka Un pe teman ken angôghime.

¹³Yô, m maa U iyou i teman ker, ijiir i Ú teman ker gbem yô.

¹⁴Tsô tor gema ishigh ver mkohol u Iserael cii doo doo; mkohol u Iserael cii tile sha.

¹⁵A kaa er: I̱ wuese TER, Aôndo u Iserael, u A ôr kwagh a terem Davidi sha zwa Na, man A kure un sha uwegh Nagh je, A kaa er:

¹⁶Hii sha iyange i M due a ior Av Iserael ken tar u Igipiti la je, M tsuwa ma gar ken ikwe i Iserael Mer, Me maa iyou sha u iti Yam i̱ lu ker ga; kpa M tsuwa Davidi Mer, a̱ tema tor sha ior Av Iserael.

¹⁷Terem Davidi lu veren ishima er una maa iyou sha ci u iti i TER, Aôndo u Iserael.

¹⁸Kpa TER kaa a terem Davidi er: Er u ver ishima u maan iyou sha ci u iti Yam yô, u er doo, er u ver ishima nahan yô;

¹⁹nahan kpaa, ka we ú maa iyou la ga, wan wou u ú mar iyol you je, ka un una maa iyou la sha ci u iti Yam ye.

²⁰TER kpaa A er vough sha kwaghôron Na u A ôr la, gadia mo m va tile sha ityough ki terem Davidi, man m tema sha ikônough ki torough ki Iserael, er TER lu tôndo zwa yô, man m maa iyou la sha ci u iti i TER, Aôndo u Iserael.

²¹M ver ijiir ker sha ci u areki u ikuryan i TER i̱ lu ker, i A ye a uter asev zum u A due a ve ken tar u Igipiti la.

²²Tsô Solomon kar za tile sha ishigh ki atse a TER a nanden nagh sha mi, sha ishigh ki mkohol u Iserael cii, a naregh ave Sha,

²³a kaa er: TERE, Aôndo u Iserael, ma Aôndo ugen ngu er We nahan ga, Sha kpaa ga, shin tar kpaa ga, We, u U we iko sha ikuryan man U ver ishima sha erdoo a mbayev Ou, mba ve zenden sha ishigh You a ishima i môm yô;

²⁴We u U kur kwagh u U tôndo zwa a terem Davidi wanakiriki Wou la; mimi je, U ôr kwagh sha zwa Wou, U kure un sha uwegh Ough, er i lu nyian nahan.

²⁵Yô, TERE, Aôndo u Iserael, wa iko sha kwagh u lu U tôndo zwa a wanakiriki Wou terem Davidi, er U kaa Wer: Ú ban a or sha ishigh Yagh u nana tema sha ikônough ki torough ki Iserael ga, aluer ônov ou vea ver ishima sha gbenda ve, vea zende sha ishigh Yagh er we u lu zenden sha ishigh Yagh nahan yô.

²⁶Yô, TERE, Aôndo u Iserael, kwaghôron Wou u U ôr a terem Davidi wanakiriki Wou la ma a kur sha mi vough.

²⁷Aôndo Una tema shin tar mimi jee? Nenge, Sha man Sha u a hembe gban ca la je kpa fatyô u ngohol We ga, man hide iyou i m maa ne?

²⁸Nahan kpaa, wa iko sha msen u wanakiriki Wou kua zamber na, TERE, Aôndo wam, ver ato sha imo i wanakiriki Wou man msen u a sen U nyian ne.

²⁹Ashe a Ou a̱ nengen sha iyou ne tugh man atetan kpaa, ka ijiir i U kaa Wer: Iti Yam ia lu her; sha u ú ver ato sha msen u wanakiriki Wou una sôn zum u una ver ishigh hen ijiir ne yô.

³⁰Man shi ver ato ungwa zamber u wanakiriki Wou, man u ior Ou Iserael, zum u vea eren msen vea ver ishigh hen ijiir ne yô; een, ungwa Sha, sha ijiir You i teman la, man zum u U ungwa yô, de se kwaghbo.

³¹Aluer or nana er or u nan we ndor a nan kwaghbo, man i ver nan mbum er nana̱ bum, man nana va bum sha ishigh ki atse Ou a nanden nagh sha mi ken iyou ne yô,

³²ungwa Sha, er sha mi, ôr ijir i mbayev Ou, na iferor ibo, hide nan a ieren i nan sha ityough ki nan; man gema na or u mimi ishô, er a nan sha mimi u nan la.

³³Zum u mbaihomov vea hemba ior ou Iserael sha ci u isholibo i ve er U yô, aluer vea gema her a We, vea pase iti You, vea er msen vea zamber We ken iyou ne yô,

³⁴ungwa Sha, de ior Ou Iserael asorabo a ve, shi hide a ve ken tar u U ne uter vev yô.

³⁵Zum u á cir Sha man ura kera nôô ga, sha ci u ve er U isholibo yô, man vea er msen, vea ver ishigh hen ijiir ne, vea pase iti You, vea gema asema sha u den isholibo ve, sha ci u mtsaha u U tsaha ve yô,

³⁶ungwa Sha, de isholibo i mbayev Ou kua i ior Ou Iserael kpaa, gadia U tese ve gbenda u doon u vea zenden sha mi yô; yô, nôô ura sha tar Wou, u U ne ior Ou dyako la.

³⁷Aluer ijen ia gba sha tar, shin aluer bouange una za va, shin alakema una gba akpor shin mningem, shin ikomon ia za va, shin igyer, aluer mbaihomov vev vea va kase ve ken agar a ken tar ve, shin a lu hanma kwagh u bo, shin hanma inja i uange ia lu kpaa,

³⁸hanma msen man zamber u hanma or u ior Ou Iserael nan zamber yô, aluer hanma or nana fa mvihi u ishima i nan iyol i nan, man nana naregh ave sha iyou ne yô,

³⁹ungwa Sha, sha ijiir i teman You, de nan isholibo, er sha mi, na hanma or sha ieren i nan cii, er U fe ishima i nan yô (gadia ka We tseegh U fa ishima i ônov mba iorov cii ye);

⁴⁰sha u ve̱ cia U sha ayange a uma ve cii, ken tar u U ne uter asev ne.

⁴¹Man shi or u ken nongo ugen u nan lu or u ior Ou Iserael ga yô, u nan dugh ken tar u icaa sha ci u iti You yô,

⁴²(gadia vea ungwa gwa u iti You i vesen, man uwegh Ough ku ageegh, man uwegh Ough ku naregh), zum u nana va er msen nana ver ishigh hen iyou ne,

⁴³ungwa Sha, hen ijiir You i teman la, er akaa a orvanava la nan sen U cii; sha er akuraior sha won cii a̱ fa iti You man a̱ cia U, er ior Ou Iserael nahan, man shi a̱ fa er iyou ingin i m maa ne ka iti You i yer i min ye.

⁴⁴Aluer ior Ou vea za nôngo ityav a mbaihomov vev, sha hanma gbenda u Ú tindi ve cii, vea sôn TER, vea ver ishigh hen gar u U tsough, man hen iyou i m maa sha ci u iti You ne yô,

⁴⁵ungwa msen ve kua zamber ve Sha, suwe mimi ve.

⁴⁶Aluer vea er U isholibo (gadia or u den eren isholibo nan ngu ga), man ishima ia lu vihin We a ve, Wea na ve sha ikev i mbaihomov, man vea yem a ve uikangen ken tar ve, a lu ca shin a lu ikua ikua;

⁴⁷kpa aluer vea za hen ken asema a ve ken tar u i ze a ve uikangen la, vea gema ishima vea zamber We ken tar u mba ve ze a ve uikangen la, vea kaa er: Se er isholibo, se er kwaghbo, se er ifer;

⁴⁸aluer vea hide hen a We a ishima ve cii kua uma ve cii, ken tar u mbaihomov vev, mba ve ze a ve uikangen la, vea sôn U, vea ver ishigh vegher u ken tar ve, u U ne uter vev, hen gar u U tsough man iyou i m maa sha ci u iti You ne yô,

⁴⁹ungwa msen ve man zamber ve Sha, hen ijiir You i teman, suwe mimi ve;

⁵⁰de ior Ou mba ve er U isholibo ve per atindi a Ou la; er ve ve̱ kôr mhôônom sha ishigh ki mba ve yem a ve uikangen sha u ve̱ zungwe ve mhôônom yô;

⁵¹gadia ka ior Ou je, ka dyako Wou kpaa u U due a mi ken tar u Igipiti, ken atô u usu u adum;

⁵²ashe a Ou a̱ lu sha zamber u wanakiriki Wou, man sha zamber u ior Ou Iserael, er Ú ver ato her a ve, hanma shighe u vea vaa a We yô.

⁵³Gadia ken akuraior a sha won cii ka ve U tsegh ve ye, sha u ve̱ lu dyako Wou, er U kaa a Mose wanakiriki Wou zum u U due a uter asev ken Igipiti la nahan, Tere AÔNDO.

⁵⁴Er Solomon kure msen ne kua zamber ne a TER cii yô, a mough sha ishigh ki atse a TER a nanden nagh sha mi, henpe a gure a naregh ave Sha la.

⁵⁵A tile sha, a ver mkohol u Iserael cii doo doo sha imo i taver taver, a kaa er:

⁵⁶I̱ wuese TER u A ne ior Nav Iserael mmem, sha kwagh u A tende zwa sha mi cii yô; ma kwaghôron môm sha ityendezwa Na i dedoo cii, i A tôndo a Mose wanakiriki Na la, gba inya ga.

⁵⁷TER, Aôndo wase, A̱ lu a vese, er lu a uter asev nahan, A̱ de undun se ga, man A̱ de te se kera kpaa ga;

⁵⁸A̱ gema asema ase sha u zan hen a Na, u zenden sha igbenda Na cii, man u wan atindi a Na iko, man akaawan a Na man ajiraôron a Na a A kaa uter asev yô.

⁵⁹Akaaôron a am angan, a m zamber sha ishigh ki TER, a̱ lu ikua ikua a TER, Aôndo wase, atetan man tugh, sha er A̱ suwe mimi u wanakiriki Na man mimi u ior Nav Iserael ayange ayange;

⁶⁰sha u akuraior a sha won cii a̱ fa er TER, A lu Aôndo yô, mô gen ngu ga.

⁶¹Yô, ishima yen i̱ lu vough sha ishigh ki TER, Aôndo wase, sha u zenden sha akaawan a Na man u wan atindi a Na iko er i eren nyian nahan.

⁶²Tsô tor kua Iserael mba ve lu a na cii, ve na nagh sha ishigh ki TER.

⁶³Solomon na TER nagh ku iniav mbi bem sha ibua dubu ikundukaruhar man iyôngo dubu deri man dubu ikundu. Kape tor a Mbaiserael cii ve tsegha iyou i TER la.

⁶⁴Sha iyange la je, tor tsegha ijiir i ken atô u tembe u u lu sha ishigh ki iyou i TER la; gadia ka heregh je a na nagh ku nanden man nagh ku sha samuyia kua ahôm a iniav mbi bem; gadia atse a togula a a lu sha ishigh ki TER la, yina u tôôn nagh ku nanden man nagh ku sha samuyia kua ahôm a iniav mbi bem la.

⁶⁵Kape Solomon a er iniongo hen shighe shon la, a Iserael mba ve lu a na cii; lu zegemkohol, ior hii hen gbenda u karen zan Hamati je zan zan za ar hen uwagh u Igipiti, sha ishigh ki TER, Aôndo wase, ayange ataankarahar kua ayange ataankarahar, ka ayange pue kar anyiin je la.

⁶⁶Iyange i sha anigheni la a na ior gbenda, tsô ve ver tor doo doo; ve yem hen utenti vev saan saan a iember ken asema sha ci u aeren a dedoo a TER A er a wanakiriki Na Davidi kua ior Nav Iserael yô.