Read tiv 2 Utor 12 Bible Online

2 Utor 12 - tiv bible

2 Utor 12

¹Ka sha inyom i sha utaankaruhar i Yehu la, Yoashi ya tor ye; a tema tor anyom akunduahar ken Yerusalem; iti i ngô na er, Shibia u ken Bersheba.

²Yoashi eren kwagh u dedoo sha ishigh ki TER sha ayange a na cii, a pristi Yehoyada lu tesen un la.

³Kpa ajiir a taven sha yô, i vihi a kera ga, ior shi lu nan nagh her, shi ve lu nanden kwaghhumandoon sha ajiir a taven sha la.

⁴Tsô Yoashi kaa a upristi er: Hanma inyaregh ki i ne icighannagh a mi cii, ki i ve a mi ken iyou i TER la, ka inyaregh ki i eren kasua a min la, inyaregh ki i we hanma or er nana̱ kimbin yô, man inyaregh ki hanma or nan ve a mi cii ken iyou i TER sha ishima i nan yô,

⁵upristi ve̱ ngohol ki, hanmô hen ior mba nan, nahan ve̱ sôr iyou sha ajiir a i vihi yô, hanma ijiir i i vihi cii.

⁶Kpa er sha inyom i sha ikundu kar atar i Yoashi la, upristi lu a sôr ajiir a vihin sha iyou la ga yô,

⁷tor Yoashi yila pristi Yehoyada kua upristi mbagenev, a kaa a ve er: Ka nyi ne ser iyou sha ajiir a i vihi la ga? Hegen yô, de kera shi seer ngohol nen inyaregh hen ior enev ga, kpa ver nen ki sha ci u ajiir a vihin sha iyou ne.

⁸Tsô upristi rumun er vea kera ngohol inyaregh hen ior ga, man ajiir a vihin a sha iyou la kpaa vea kera sôr ga.

⁹Nahan pristi Yehoyada tôô akwati pev un ihura sha kughur na, ver un hen kpe u atse a nanden nagh sha mi, vegher u ken iyan, henpe nyôron ken iyou i TER la; upristi mba kuran hunda haa inyaregh ki i ve a mi ken iyou i TER la cii kimi.

¹⁰Tsô zum u ve nenge er inyaregh ki ngee ken akwati yô, nahan orngeren u tor kua pristi u tamen, ve kôndo ve za kohol ki, ve kange, ve za ôr inyaregh ki ve zough a mi ken iyou i TER.

¹¹Tsô ve na inyaregh ki ve kar myohom ma ki la, sha ikev i mbaerentom mba ve nengen sha iyou i TER la; ve kimbi mbagbanakaa kua mbamaankwagh mba ve lu eren tom sha iyou i TER,

¹²man mbamaan sha akam, man mbakuanawen, man sha ci u yamen ikpande man awen a kuan sha u sôron iyou i TER sha ajiir a i vihi yô, man shi sha ci u hanma kwagh u i gbe u kimbin sha ci u sôron iyou la yô.

¹³Kpa inyaregh ki i va a mi ken iyou i TER la yô, i er ayongo a azurfa a mi ga, shin akambe a sôron amenger a mi kpaa ga, shin utasa ga, shin ikor i tôngon kpaa ga, shin ma ikav mbi zenaria shin ikav mbi azurfa sha ci u iyou i TER kpaa ga;

¹⁴kpa ve gema ki ve na mbaerentom er ve̱ sôr iyou i TER a mi.

¹⁵Inyaregh ki ve na ior sha ci u ve̱ kimbi mbatomov yô, ve kera pine ve kwagh u ve er a mi ga; sha ci u ve lu eren kwagh ve sha mimi yô.

¹⁶Kpa inyaregh ki iniav mbi iboov man inyaregh ki iniav mbi isholibo, i va a mi ken iyou i TER ga; ki lu sha ci u upristi.

¹⁷Tsô Hasael tor u Shiria kôndo za nôngo ityav a Gati ngohol un je; nahan Hasael gema ver ishigh u zan ken Yerusalem.

¹⁸Tsô Yoashi tor u Yuda kura uicighanmbaakaav mba Yehoshafati man Yehoram man Ahashia, uter nav, utor mba Yuda lu tsegha la, kua uicighanmbaakaav nav cii, kua zenaria mba i zua a mi ken ayou a koson akaa ker, a iyou i TER, kua a iyou i tor kpaa, a gema a tindi Hasael tor u Shiria a mi; tsô a mough hen Yerusalem a yem.

¹⁹Aerenakaa a Yoashi agen man akaa a a er cii yô, i nger a ken ruamabera u abaver a utor mba Yuda la gaa?

²⁰Tsô mbatomov mba Yoashi zua zwa, wua un hen iyou i Milo sha gbenda u zan Shila la.

²¹Yosakar wan u Shimeati man Yehoshabadi wan u Shomer, mbatomov nav, wua un, i ii un a uter nav imôngo ken gar u Davidi; wan na Amashia tema tor sha ityough nagh.