Read tiv 2 Utor 13 Bible Online

2 Utor 13 - tiv bible

2 Utor 13

¹Tsô sha inyom i sha ikundu kar atar i Yoashi wan u Ahashia, tor u Yuda la, Yehoahashi wan u Yehu ya tor sha Iserael ken Samaria, a tsa tor anyom pue kar ataankarahar.

²A er ifer sha ishigh ki TER; a eren asorabo a Yerobiam wan u Nebati, a a ne Iserael a er a la, a undu a ga.

³Nahan ishima vihi TER a Iserael tsung, A na ve sha ikev i Hasael tor u Shiria, man sha ikev i Benhada wan u Hasael, ve lu sha ikev ve gbem.

⁴Kpa Yehoahashi zamber a TER, nahan TER ungwa imo na, gadia A nenge ican i Iserael i tor u Shiria lu eren ve yô.

⁵(Tsô TER na Iserael oryiman, ve due sha ikev i Mbashiria kera, nahan Mbaiserael tema ken utenti vev er tsuaa nahan.

⁶Nahan kpaa ve undu asorabo a ya u Yerobiam, a a ne Iserael a er a la ga, ve zenden sha mi; Ashera kpaa lu ken Samaria her.)

⁷A undu Yehoahashi a ior je ga, saa mbaanyinyav akunduahargber tseegh man akekeautya pue kua mbazanangahar dubu pue; gadia tor u Shiria tim ve, gema ve, ve hingir er vuulevu u ndyaren angahar mi yô.

⁸Aerenakaa a Yehoahashi agen man akaa a a er cii, kua agee na yô, i nger a ken ruamabera u abaver a utor mba Iserael la gaa?

⁹Tsô Yehoahashi yav a uter nav imôngo, i ii un ken Samaria; wan na Yoashi gema tema tor sha ityough nagh.

¹⁰Sha inyom i sha ikundugber kar utaankaruhar i Yoashi tor u Yuda la, Yoashi wan u Yehoahashi ya tor ken Samaria sha Iserael; a tema tor anyom pue kar ataratar.

¹¹A er ifer sha ishigh ki TER, a undu asorabo a Yerobiam wan u Nebati, a a ne Iserael a er a la ga, a zenden ken a.

¹²Aerenakaa a Yoashi agen man akaa a a er cii kua agee na a a lu nôngon ityav a Amashia tor u Yuda la, i nger a ken ruamabera u abaver a utor mba Iserael la gaa?

¹³Tsô Yoashi yav a uter nav imôngo; nahan Yerobiam tema sha ikônough ki torough nagh; i ii Yoashi ken Samaria a utor mba Iserael imôngo.

¹⁴Tsô zum u Elisha gba angev mbu una kpe yô, Yoashi tor u Iserael va her a na gba va vaan un kaan er: Tereme, tereme, akeke a Iserael kua mbaanyinyav nav kpaa!

¹⁵Nahan Elisha kaa a na er: Tôô ada kua avaan; tsô a tôô ada kua avaan.

¹⁶A kaa a tor u Iserael er: Penda uwegh ough sha ada; tsô a penda uwegh nagh sha ada. Elisha kpaa penda ave na sha ave a tor.

¹⁷Nahan a kaa er: Bugh ian i sha vegher u sha ityoughkitaregh la, tsô a bugh i. Elisha kaa er: Ker! Tsô a ker. A kaa er: Ivaan i TER i hemban; ka ivaan i hemban Shiria je la; ú va hemba Mbashiria hen Afeki je.

¹⁸Shi A kaa er: Tôô avaan; tsô a tôô a. A kaa a tor u Iserael er: Gbidye a inya; a gbidye kwa tar, tsô a de.

¹⁹Nahan ishima vihi or u Aôndo a na, a kaa er: Ma u gbidye kwa taan shin kwa taratar nahan, yô, ma u hembe Shiria purututu; kpa hegen yô, ka di kwa tar tsô ú hemba Shiria ye.

²⁰Tsô Elisha maa kpe, ve ii un. Inyom i he hiin yô, akum a Mbamoabi nyôr ken tar la.

²¹Tsô mba ngur iin orgen yô, ve ta ashe ve za nenge ikumutya, nahan ve gbihi orkpen la shin uwar u Elisha; er orkpen la za bende a akuhe a Elisha yô, a nder, a tile sha, sha angahar a na.

²²Hasael tor u Shiria er Iserael ican sha ayange a Yehoahashi la cii.

²³Kpa TER er a ve dedoo, zungwe ve mhôônom, A umbur ve sha ci u ikuryan Na i A ya a Aberaham man Isaka kua Yakob la, nahan A rumun u timin ve ga, man shi lu a ta ve kera sha ishigh Nagh ga, zan zan hegen.

²⁴Tsô Hasael tor u Shiria kpe, wan na Benhada gema tema tor sha ityough nagh.

²⁵Yoashi wan u Yehoahashi shi ngohol Benhada wan u Hasael agar a yan ngohol hen ter na Yehoahashi sha utya la. Yoashi hemba un kwa tar, nahan a ngohol agar a Iserael la.