Read tiv 2 Utor 15 Bible Online

2 Utor 15 - tiv bible

2 Utor 15

¹Sha inyom i sha ikundu kar utaankaruhar i Yerobiam tor u Iserael la, Asaria wan u Amashia tor u Yuda ya tor;

²a lu anyom pue kar ataratar zum u a ya tor la; a tema tor anyom akunduahargber kar ahar ken Yerusalem; iti i ngô na er Yekolia u hen Yerusalem.

³A er kwagh u dedoo sha ishigh ki TER er ter na Amashia er nahan cii.

⁴Kpa ajiir a taven sha yô, i vihi a kera ga; ior lu nan nagh shi lu nanden kwaghhumandoon sha ajiir a taven sha la her.

⁵TER haa tor la imande, zan zan kar kpen a mi; a za lu ken iyou igen kposo. Nahan Yotam wan u tor gema lu nengen sha ya u tor, lu ôron ior mba tar la ajir.

⁶Aerenakaa agen a Asaria man akaa a a er cii yô, i nger a ken ruamabera u abaver a utor mba Yuda la gaa?

⁷Tsô Asaria yav a uter nav imôngo, i ii un a uter nav imôngo ken gar u Davidi; wan na Yotam gema tema tor sha ityough nagh.

⁸Sha inyom i sha ikundugber kar anigheni i Asaria tor u Yuda la, Sekaria wan u Yerobiam ya tor u Iserael ken Samaria, iwer ataratar.

⁹A er ifer sha ishigh ki TER, er uter nav lu er nahan; a undu asorabo a Yerobiam wan u Nebati a a ne Iserael a er a la ga.

¹⁰Tsô Shalum wan u Yabeshi zua zwa a ior, ta num sha a na sha ishigh ki iorov, wua un, gema tema tor sha ityough nagh.

¹¹Aerenakaa agen a Sekaria er yô, nenge, i nger a ken ruamabera u abaver a utor mba Iserael la.

¹²Ka imo i TER lu ôr Yehu je la, er: Ônov ou vea tema sha ikônough ki torough ki Iserael zan zan ikov inyiin. Lu di nahan je.

¹³Shalum wan u Yabeshi ya tor sha inyom i sha ikundugber kar utaankarunyiin i Ushia tor u Yuda la; a tema tor ken Samaria uwer môm.

¹⁴Tsô Menahem wan u Gadi mough ken Tirsa va ken Samaria, va ta num sha Shalum wan u Yabeshi ken Samaria, wua un, gema tema tor sha ityough nagh.

¹⁵Aerenakaa a Shalum agen man er a zua zwa a ior la, nenge i nger a ken ruamabera u abaver a utor mba Iserael la.

¹⁶Tsô Menahem ta num sha Tifesa hemba un kua mba ve lu ker cii, kua iningirtar na cii, hii hen Tirsa je; sha ci u ve bugh un hunda ga yô, ka nahan man a ta num sha ve ye; kasev mba uyaav mba ve lu ker cii a pav ve mbu.

¹⁷Sha inyom i ikundugber kar utaankarunyiin i Asaria tor u Yuda la, Menahem wan u Gadi ya tor sha Iserael, a tema tor ken Samaria, anyom pue.

¹⁸A er ifer sha ishigh ki TER; sha ayange a uma na cii, a undu asorabo a Yerobiam wan u Nebati, a a ne Iserael a er a la ga.

¹⁹Pul tor u Ashiria va ityav hen tar la; nahan Menahem na Pul azurfa utalenti dubu, sha er uwegh nagh ku̱ lu a na imôngo sha u taver tor sha ikev na yô.

²⁰Menahem ngohol inyaregh kila hen Iserael hen mbanyarev cii, hen hanma or azurfa ushekel akunduahargber, sha ci u nan tor u Ashiria. Nahan tor u Ashiria mough hide, kera lu ken tar la ga.

²¹Aerenakaa a Menahem agen man akaa a a er cii yô, i nger a ken ruamabera u abaver a utor mba Iserael la gaa?

²²Tsô Menahem yav a uter nav imôngo; wan na Pekahia gema tema tor sha ityough nagh.

²³Sha inyom i sha akunduahargber i Asaria tor u Yuda la, Pekahia wan u Menahem ya tor sha Iserael ken Samaria, tsa tor anyom ahar.

²⁴A er ifer sha ishigh ki TER; a undu asorabo a Yerobiam wan u Nebati, a a ne Iserael a er a la ga.

²⁵Peka, wan u Remalia, orhementyav na, zua zwa a ior, ta num sha a na, wua un kua Argobi man Arie ken Samaria ken iyouutya i hen ya u tor; ior akunduahargber mba Mbagileadi lu a na imôngo; a wua un, a tema tor sha ityough nagh.

²⁶Aerenakaa a Pekahia agen man akaa a a er cii yô, nenge, i nger a ken ruamabera u abaver a utor mba Iserael la.

²⁷Sha inyom i sha akunduahargber kar uhar i Asaria tor u Yuda la, Peka wan u Remalia ya tor sha Iserael ken Samaria, a tema tor anyom ikundu.

²⁸A er ifer sha ishigh ki TER; a undu asorabo a Yerobiam wan u Nebati, a a ne Iserael a er a la ga.

²⁹Sha ayange a Peka tor u Iserael la, Tigelati-pileser tor u Ashiria va, va ngohol Iyon man Abel-bete-maaka man Yanoa man Kedeshi man Hasor man Gileadi kua Galilia, ka tar u Nafetali cii je la; a kura ve a yem a mi uikangen ken Ashiria.

³⁰Hoshea wan u Ela zua zwa a ior sha Peka wan u Remalia la, a ta num sha a na, a wua un, a tema tor sha ityough nagh sha inyom i sha ikundu i Yotam wan u Ushia la.

³¹Aerenakaa a Peka agen man akaa a a er cii yô, nenge, i nger a ken ruamabera u abaver a utor mba Iserael la.

³²Sha inyom i sha uhar i Peka wan u Remalia tor u Iserael la, Yotam, wan u Ushia tor u Yuda, ya tor.

³³A lu anyom ikundu kar ataan zum u a ya tor la; a tema tor ken Yerusalem anyom pue kar ataratar; iti i ngô na er Yerusha, wan u Sadoki.

³⁴A eren kwagh u dedoo sha ishigh ki TER er ter na Ushia lu eren nahan cii.

³⁵Kpa ajiir a taven sha la, a vihi a kera ga; ior shi lu nan nagh man nanden kwaghhumandoon sha ajiir a taven sha la her. Ka un a maa hunda u iyou i TER, u sha.

³⁶Aerenakaa a Yotam agen man akaa a a er cii yô, i nger a ken ruamabera u abaver a utor mba Yuda la gaa?

³⁷Sha ayange la, TER hii u tindin Reshin tor u Shiria kua Peka wan u Remalia er ve̱ za nôngo ityav a Yuda.

³⁸Tsô Yotam yav a uter nav imôngo, i ii un a uter nav imôngo ken gar u ter na Davidi; wan na Ahashi tema tor sha ityough nagh.