Read tiv 2 Utor 18 Bible Online

2 Utor 18 - tiv bible

2 Utor 18

¹Tsô sha inyom i sha utar i Hoshea wan u Ela tor u Iserael la, Hesekia wan u Ahashi tor u Yuda, ya tor.

²Zum u a ya tor la, anyom a na lu ikundu kar ataan; a tema tor anyom ikundu kar ataankaranyiin ken Yerusalem, iti i ngô na er Abi wan u Sekaria.

³A eren kwagh u dedoo sha ishigh ki TER, er ter na Davidi lu eren nahan.

⁴A vihi ajiir a taven sha la kera, a hembe mtôm ma awenem, a gber Asherim kera; shi a hembe iyô i togula i Mose lu er la; gadia zan zan hen shighe la je kpaa Mbaiserael lu nanden kwaghhumandoon sha ci u i; i yila i er Nehushetan.

⁵A suur sha TER, Aôndo u Iserael; nahan ken ijime na yô, i kera zua a ma tor u Yuda u kuman sha a na ga, shin mba ve vande a na mbala kpaa, mô lu ga;

⁶gadia a var a TER, a undu Un ga, a waan atindi Na iko, a TER na Mose yô.

⁷TER lu a na; henpe una za cii, i kpe un iyol; a hendan a tor u Ashiria, a eren kwagh sha ishima na ga.

⁸A hemba Mbafiliti zan zan a za ar hen Gasa man iningirtar na, hii hen daar u mbakuran zan zan za ar hen gar u lun a gir.

⁹Kpa sha inyom i sha unyiin i tor Hesekia la, ka inyom i sha utaankaruhar i Hoshea wan u Ela tor u Iserael je la, Shalmaneser tor u Ashiria va ityav hen Samaria, a haa afo a kase un.

¹⁰Anyom nga kar atar yô, ve ngohol un; ka inyom i sha ataratar i Hesekia la, shi ka anyom ataankaranyiin a Hoshea tor u Iserael je la, i hemba Samaria ye.

¹¹Nahan tor u Ashiria kura Iserael yem a mi ken Ashiria, za ver ve ken Hala, man hen kpe u Habor, ifi u ken Gosan, man ken agar a Mbamede la,

¹²gadia ve wa iko sha imo i TER, Aôndo ve, ga, kpa ve vihi ikuryan Na, ka akaa a Mose wanakiriki u TER wa tindi sha mi cii je la, ve venda u ungwan un man u eren sha mi kpaa.

¹³Sha inyom i sha pue kar unyiin i tor Hesekia la, Senakeribi tor u Ashiria kôndo sha u nôngon ityav a agar a Yuda a lun a ugir cii, a ngohol a kpaa.

¹⁴Tsô Hesekia tor u Yuda tindi loho hen tor u Ashiria hen Lakishi, kaa er: M er kwaghbo, mough yem tsô, kwagh u u wam cii me er sha mi. Tsô tor u Ashiria wa Hesekia tor u Yuda azurfa utalenti deri utar man zenaria utalenti ikundugber.

¹⁵Nahan Hesekia na un azurfa cii, mba i zua a mi ken iyou i TER kua ken ayou a koson akaa ker a ken ya u tor cii.

¹⁶Hen shighe la, Hesekia bugh zenaria u sha ihinda i tempel u TER, kua u sha ambusu a ihinda, u Hesekia tor u Yuda cir sha mi la, a na tor u Ashiria.

¹⁷Tsô tor u Ashiria tindi Tartan man Rabesarishi kua Rabeshake er ve̱ mough hen Lakishi ve̱ za hen Hesekia hen Yerusalem a ikumutya i ngeen. Nahan ve mough ve va hen Yerusalem. Zum u ve ar yô, ve va tile hen akpa u ityungumnger u sha, u a lu sha kômgbenda u zan hen ijiir i kungun akondo la.

¹⁸Er ve yila tor yô, Eliakim wan u Hilkia, ua nengen sha ya u tor la man Shebena orngeren kua Yoa wan u Asav or u ngeren abaver ken takerada la due, ve va her a ve.

¹⁹Tsô Rabeshake kaa a ve er: Kaa nen Hesekia ahegen je, zegetor, tor u Ashiria a kaa er: Ka nyi agee u suur sha mi nahana?

²⁰U ngu henen wer, ka kwaghôron u sha ityumbuzwaagh a lu mhen man agee a utya yee? Ka sha an je u suur, ve u hendan a moo?

²¹Nenge, u ngu suur sha Igipiti ishombongbo u iyia ne, u or nana lian sha mi yô, kua nyôr nan ken ikevwe kua kuma nan tsula, kape Farao tor u Igipiti a lu hen mba ve suur sha a na cii je la.

²²Kpa aluer nea kaam ner: Se mba suur sha TER, Aôndo wase, yô, kera ka Un shon u Hesekia lu vihi ajiir a Na a taven sha kua atse Na a nanden nagh sha mi kera, shi a gema a kaa a Yuda kua Yerusalem er: Gure civir nen sha ishigh ki atse a ken Yerusalem ne gaa?

²³Yô, ta ase hwande a terem, tor u Ashiria; mo yô, me na u anyinya dubu uhar aluer wea fatyô u nan mbahendan a yô.

²⁴Ú er nan man ú hemba gomna môm u alu u hemban gban ijime cii ken mbayev mba terem la ityava? U gema u suur sha Igipiti sha u zuan a akekeautya kua mbaanyinyav tsô.

²⁵Kera ka sha mrumun u TER man m kende sha ijiir ne sha u va timin i gaa? Ka TER je, A kaa a mo er: Kôndo, za nôngo ityav a tar la tim u ye.

²⁶Tsô maa Eliakim wan u Hilkia man Shebena kua Yoa, ve kaa a Rabeshake er: Ma u shi ôr kwagh a mbayev ou ken zwa u Shiria, gadia se mba ongo u; de kera er kwagh a vese ken zwa u Mbayuda sha ato a ior mba ve lu sha gilgar ne ga.

²⁷Kpa Rabeshake kaa a ve er: Terem tindim er m̱ va ôr kwagh a ter wen kua ne tseegh tsôô? Kera ka hen ior mba ve tem sha gilgar, a tindim sha er vea ya akôngo a ve man vea ma mnyandem vem a ven imôngo gaa?

²⁸Tsô Rabeshake tile genger imo taver taver ken zwa u Mbayuda, kaa er: Ungwa nen imo i zegetor, tor u Ashiria.

²⁹Tor ngu kaan nahan er: Hesekia a̱ de kera tsughun ne ga; gadia una fatyô u yiman ne sha ikev na ga;

³⁰shi de rumun nen ner, Hesekia a̱ gema ne, ne suur sha TER ga, er a kaan er: TER Una yima se kpee je, á na gar ne sha ikev i tor u Ashiria ga la.

³¹De ongo nen kwaghôron u Hesekia ga; gadia tor u Ashiria ngu kaan nahan er: Lu nen bem a mo, due va nen her a mo; nahan hanmô wen nana ya atam a kon u wain u nan, man hanmô wen kpaa nana ya tur u nan, hanmô wen nana ma mngerem ma ijôr i nan kpaa;

³²zan zan me va kua a ven me za a ven tar ugen u u lu er tar wen nahan, tar u uyia man zar u wain, tar u ruam man u ishule i ikon i wain, tar u ikon i olev kua iyough, sha er ne̱ lu uma, ne̱ kpe ga yô, de veren nen ato sha Hesekia ga, gadia ngu nôngon u geman ne sha u a kaa er, TER Una yima se yô.

³³Ma aôndo u ken mbaaôndo mba akuraior cii u a yima tar na sha ikev i tor u Ashiria ngu kpa?

³⁴Mbaaôndo mba Hamati kua mba Arpadi mba hana? Mbaaôndo mba Sefarvaim man mba Hena kua mba Iva mba hana? Ve yima Samaria sha ikev yam kpa?

³⁵Mbaaôndo mba ityar la cii, ka hanmô je a yem tar na sha ikev yama, ve TER Una yima Yerusalem sha ikev yama?

³⁶Kpa ior huan ving, bugh zwa a na sha kwagh môm ga; gadia tor kaa er: De bughun nen zwa a na ga.

³⁷Tsô Eliakim wan u Hilkia u a nengen sha ya u tor man Shebena orngeren kua Yoa wan u Asav or u ngeren abaver ken takerada, ve va hen Hesekia a akondo a anden iyol, ve va ôr un mkaanem ma Rabeshake la.