Read tiv 2 Utor 25 Bible Online

2 Utor 25 - tiv bible

2 Utor 25

¹Tsô sha inyom i sha utaankarunyiin i a ya tor la, uwer u sha pue, ayange a u di kpaa pue la, Nebukadinesar tor u Babilon za va a mbautyav nav cii, er una nôngo ityav a Yerusalem, ve va haa afo; shi ve kaha gil kpaa, ve kase un.

²Nahan i kase gar la zan zan ar sha inyom i sha pue kar môm i tor Sedekia la.

³Uwer u sha unyiin ayange a u ataankaranyiin la, ijen gba ken gar kpishi, nahan ior mba ken tar la zua a kwaghyan ga.

⁴Tsô i pev gilgar, nahan mbautyav cii yevese tugh, ve due hen hunda u lu hen haregh u ukpekpe uhar mba ve lu hen sule u tor la — Mbakaldi gema kase gar la tser, nôngo ityav a na — ve yem gbenda u u ver ishigh hen Araba la.

⁵Kpa mbautyav mba Mbakaldi zenda tor ityô ve za kohol un hen kpuunkpuun u Yeriko; mbautyav nav ci ca sambe undu un.

⁶Tsô ve kôr tor ve yem a na hen tor u Babilon hen Ribela, ve za ôr un ijir.

⁷Ve wua ônov mba Sedekia mba nomso sha ashe na je, man shi ve ongor Sedekia ashe, ve kange un sha mshir, ve yem a na ken Babilon.

⁸Tsô sha uwer u sha utaan ayange a u ataankarahar la, sha inyom i sha pue kar utaankarunyiin i tor Nebukadinesar tor u Babilon la, Nebusaradan orhemen u mbakurantor, wanakiriki u tor u Babilon, va ken Yerusalem.

⁹A va nande iyou i TER man iyou i tor kua ayou a ken Yerusalem; hanma iyou i vesen a nande i sha usu.

¹⁰Mbautyav mba Mbakaldi mba ve lu a orhemen u mbakurantor la, ve hembe ugil mba Yerusalem cii ve ningir ve tser.

¹¹Asande a ior a a shi ken gar man mba ve za ta ken tor u Babilon la kua ikpelaior i i shi la, Nebusaradan orhemen u mbakurantor kura ve cii, yem a ve uikangen.

¹²Mbaatsanev mbagenev mba ken tar la yô, orhemen u mbakurantor la undu ve er ve̱ lu mbanengen sha ishule i ikon i wain man i uyia.

¹³Mtôm ma togula ma ma lu ken iyou i TER, kua asange a pendan utasa sha mi man zegetasa u togula mba ve lu ken iyou i TER la, Mbakaldi hembe ve avur avur, ve kura utogula ve yem a mi ken Babilon.

¹⁴Ityev kpaa, man ushebul man akambe a sôron amenger a min man mbaahwa kua ikav mbi sha togula cii, mbi i eren tom a mi, ve kura ve yem a mi.

¹⁵Man ugbande mba usuv man utasa, orhemen u mbakurantor kura yem a mi, ka akaa a i er a sha zenaria man sha azurfa la.

¹⁶Mtôm mhar man zegetasa u môm la man asange a pendan utasa sha mi a Solomon er sha ci iyou i TER yô, togula u i er ikav mbin a mi cii, myohom nam gande u ôron.

¹⁷Ityaven i ityôgh ki mômough lu aseva pue kar anigheni, ki lu a indyuruku u togula sha mi; ityaven i indyuruku la lu aseva atar; man kper kua upomegraneti lu sha indyuruku vegher u sha kase tser, ve cii lu sha togula; ityôgh ki sha uhar kpaa, lu di nahan a kper.

¹⁸Orhemen u mbakurantor la, kôr pristi u vesen Seraia man Sefania pristi u dondon sha a na la, kua mbakuranhunda, ior itiar;

¹⁹shi ken gar la, a kôr orhemen u i wa un mbautyav sha ikev yô, a ior itian mba lun a tor, mba i zua a ve ken gar yô, man orngeren u kurutya, u a kohol ior mba ken inya sha ci u utya yô, kua ior akunduatar mba ken inya, mba i zua a ve ken atô u gar yô.

²⁰Nebusaradan orhemen u mbakurantor kôr ve, va a ve hen tor u Babilon hen Ribela;

²¹tor u Babilon wua ve hen Ribela ken tar u Hamati. Kape i kura Yuda ken tar ve kera, i yem a ve uikangen la.

²²Sha kwagh u ior mba ve shi ken tar u Yuda, mba Nebukadinesar tor u Babilon undu la, a ver Gedalia wan u Ahikam wan u Shafan lu gomna sha a ve.

²³Tsô zum u mbahemenev mba akumautya cii, ve a ior vev, ve ungwa er tor u Babilon ver Gedalia, hingir gomna yô, ve va hen Gedalia hen Misepa, ka Ishemael wan u Netania man Yohanan wan u Karea man Seraia wan u Tanhumeti, Ornetofa, man Yaasania wan u Ormaakati, ve a ior vev.

²⁴Tsô Gedalia bum a ve kua ior vev, a kaa a ve er: De kera cie nen mbatomov mba Mbakaldi ga, gba teman nen ken tar ne tsô, er nen tor u Babilon tom, tsô á kpe ne iyol.

²⁵Kpa sha uwer u sha utaankaruhar la Ishemael wan u Netania, wan u Elishama u ken tsombor u tor, va a ior pue a na imôngo, ve va ta num sha Gedalia, ve wua un kua Mbayuda man Mbakaldi mba ve lu a na imôngo hen Misepa la.

²⁶Tsô ior cii, mbakiriki man mbavesen kua mbahemenev mba akumautya, ve hembe ve yem hen Igipiti, gadia ve lu cian Mbakaldi.

²⁷Tsô sha inyom i sha ikundugber kar utaankaruhar i Yehoyakin tor u Yuda lu ken kwar la, uwer u sha pue kar uhar, ayange a u ikundu kar utaankaruhar la, Evil-merodaki, tor u Babilon, sha inyom i a ya tor la, a kende a Yehoyakin tor u Yuda sha, a dugh un ken gaadi,

²⁸a ôr kwagh a na dedoo, a kende ikônough nagh ki torough sha hemba mkônom ma torom ma utor mba ve lu a na ken Babilon la.

²⁹A er un akondo a gaadi kera, a haa un agen, a gema yaan kwagh a na imôngo sha ayange a uma na cii;

³⁰sha kwagh u gbayol na kpaa, tor lu nan un kwar na gbem, hanma iyange a lu zuan a kwar na, sha ayange a uma na cii.