Read tiv 2 Utor 9 Bible Online

2 Utor 9 - tiv bible

2 Utor 9

¹Tsô profeti Elisha yila wanyeprofeti ugen, a kaa a na er: Fiir ikondo, kôr tumugh ku mkuregh kun sha uwe, za hen Ramoti-gileadi.

²Zum u ú za ar ker yô, ker Yehu wan u Yehoshafati wan u Nimshi la; nyôr, kaa un, a̱ mough hen atô u anmgbianev nav kera, za a na ken iyou i ken atô.

³Gema tumugh ku mkuregh kun haa un sha ityou, kaa wer: TER ngu kaan nahan er: M shighe u mkurem Mer, tema tor sha Iserael. Yô, bugh hunda, yevese, de timbir ga.

⁴Tsô wanye la, ka wanyeprofeti je la, a za hen Ramoti-gileadi.

⁵Zum u a za ar her yô, mbahemenev mba akumautya la tema lu her; a kaa er: Kwaghôron ngum a we, orhemenegh. Tsô Yehu pine er: Ka hanmô wase? A kaa er: Ka we je, orhemenegh.

⁶Nahan a mough a nyôr ken iyou; tsô a maa a haa un mkurem sha ityou, a kaa a na er: TER, Aôndo u Iserael, ngu kaan nahan er: M shighe u mkurem Mer, tema tor sha ior i TER, ka Iserael je la.

⁷Ú tim ya u teru Ahaba, sha er M̱ or iyev i awambe a mbayev av uprofeti kua awambe a mbayev mba TER cii, sha Yesebel.

⁸Gadia ya u Ahaba cii una tim, Me gber Ahaba hanma wannomso kera, u nan lu ken uikangen man u nan tem enger enger ken Iserael kpaa.

⁹Me gema ya u Ahaba una hingir er ya u Yerobiam wan u Nebati yô, man shi er ya u Baasha wan u Ahiya nahan.

¹⁰Iwa ia ya Yesebel ken akôngo a Yesereel, ma or á ii un ga. Tsô a bugh hunda a due a yevese.

¹¹Nahan Yehu due va hen mbayev mba ter na; ve pine un er: Ka bem kpa? Ka nyi orihundu ne a ve her a we? A kaa a ve er: Ne ayol a en kpaa ne fa inja i or la man kwaghôron na kpaa.

¹²Ve kaa er: Ka aie; shi ôr se. A kaa er: A ôrom kwagh nahan nahan, a kaa er: TER ngu kaan nahan er: M shighe u mkurem Mer, tema tor sha Iserael.

¹³Tsô hanmô ve tôô riga u nan fefa samber un shin angahar sha agbur a unden a mi, nahan ve tôngo korough ve kaa er: Yehu ka tor!

¹⁴Nahan Yehu wan u Yehoshafati wan u Nimshi gba keren Yoram a ku. Yô, Yoram lu kuran Ramoti-gileadi, un kua Iserael cii, sha ci u Hasael tor u Shiria;

¹⁵kpa tor Yoram hide ken Yesereel sha u va sôron avav a na, a Mbashiria gber un zum u a nôngo ityav a Hasael tor u Shiria la. Tsô Yehu kaa er: Aluer kwagh ne a lu ishima yen yô, or môm nana̱ de osogh nana̱ dugh ken gar nana̱ de za er kwagh min ken Yesereel ga.

¹⁶Nahan Yehu henda ikyekye gba zan hen Yesereel; gadia Yoram lu yaven ker; Ahashia tor u Yuda kpaa sen er una va nenge Yoram.

¹⁷Yô, orkuran tile sha gôgôyou u taven ken Yesereel, a ta ashe a za nenge a ikpelaior i Yehu, lu van. A kaa er: M nenge a ikpelaior. Tsô Yoram kaa er: Tindi ornyinya nana̱ za kohol ve, nana̱ pine er: Ka bem kpa?

¹⁸Tsô orgen za sha nyinya, nan za kohol un, nan kaa er: Tor ngu pinen er: Ka bem kpa? Yehu kaa er: Ka nyi i gbe u a beme? Kar lum ken ijime, dondo sha a mo. Tsô orkuran la kaa er: Ortyom la za ar her a ve je, kpa ngu hiden ga.

¹⁹Nahan a shi a tindi ornyinya u sha uhar; ngula za ar her a ve, a kaa er: Tor ngu pinen er: Ka bem kpa? Yehu gema kaa er: Ka nyi i gbe u a beme? Kar lum ken ijime, dondo sha a mo.

²⁰Tsô orkuran la kaa er: A za ar hen a ve je, kpa ngu hiden ga; kpa myevese u ikyekye la ngi er i Yehu wan u Nimshi nahan; gadia ngu yemen sha ihundu je.

²¹Nahan Yoram kaa er: Wa nen ago iyol. Nahan ve sôr un ikyekyeutya na. Tsô Yoram tor u Iserael kua Ahashia tor u Yuda ve due, hanmô ve lu sha ikyekye i nan, ve due u za keghen Yehu gbenda, ve za kohol un hen sule u Naboti or u Yesereel la.

²²Er Yoram nenge a Yehu yô, a pine er: Yehu ka bem kpa? A gema a kaa er: Ka bem hana, er idya i ngôu Yesebel man akombo a na a ngee yum nahana?

²³Tsô Yoram gema fese gba yevese; a kaa a Ahashia er: Ahashia kwagh ne ka num je.

²⁴Tsô Yehu henda ada na ta Yoram ivaan hen huwa ijime, ivaan kar kôr ishima, a gba shin ikyekye na.

²⁵Yehu gema kaa a Bidekar orhemen u utya na er: Tôô un, gbihi ken sule u Naboti or u Yesereel; gadia umbur, shighe u mo vea we se henda nyinya, se dondo ken ijime i ter na Ahaba la, TER ôr kwagh sha a na er:

²⁶Mimi je, nyen M nenge a awambe a Naboti kua awambe a ônov nav, kape TER kaa la, Me or iyev sha a we hen sule ne, kape TER kaa la. Yô, tôô un ase, gbihi ken sule ne, sha imo i TER kaa la.

²⁷Zum u Ahashia tor u Yuda nenge nahan yô, a gba yevese yemen vegher u hen Bete-hagan la. Kpa Yehu zenda un ijime kaa er: Un kpaa, ta nen un shin ikyekye; nahan ve ta un hen ape kôndon sha Gur u a lu hen Ibeleam la. A yevese zan zan a za ar hen Megido, a za kpe her.

²⁸Mbayev nav tôô un shin ikyekye, ve yem a mi ken Yerusalem, ve za ii un shin uwar na a uter nav imôngo, hen gar u Davidi.

²⁹Sha inyom i sha pue kar môm i Yoram wan u Ahaba la, Ahashia ya tor u Yuda.

³⁰Er Yehu va ken Yesereel yô, Yesebel ungwa nahan; nahan a wa tojir sha ashe, shi a kange ityough kpaa, a gbir ashe hen ian i iyoughough.

³¹Yehu nyer hen hunda yô, a kaa er: Ka bem kpa, we Shimeri orwuan teruwe?

³²Tsô a kende ashe sha hen ian la, a pine er: Ka an nan te ikaa ken a mo? Ka ana? Tsô mbaerentom ken ya u tor uhar shin utar ve shir ashe ve nenge a na.

³³A kaa er: Gbihi nen un shin inya. Tsô ve gbihi un shin inya; awambe na tsenda sha kpekpe kua sha anyinya kpaa, tsô a ndyar un shin angahar.

³⁴Nyer yô, a za ya kwagh, a ma kwagh; a kaa er: Za nenge nen kwase u lun a ifanyol ne, za ii un, gadia ka wan u tor je.

³⁵Kpa er ve za u za iin un yô, ve kohol un ga, saa igbôndotyou man angahar kua akevaveegh tseegh.

³⁶Nahan ve hide ve va kaa un. A kaa er: Kwagh ne ka kwaghôron u TER u lu kaa wanakiriki Na Eliya Ortishibi la je ne, er: Ka ken akôngo a gar u Yesereel iwa ia ya inyam i Yesebel ye;

³⁷ikom i Yesebel kpaa ia hingir er ihôghonov mbi ken sule nahan, ken akôngoagar u Yesereel; nahan á kera fatyô u kaan er: Ngun ka Yesebel ne ga.