Read tiv 1 Kroniku 11 Bible Online

1 Kroniku 11 - tiv bible

1 Kroniku 11

¹Tsô Iserael cii kohol hen Davidi hen Heberon, ve kaa er; Nenge, se mba ikuhe you kua inyam you kpaa.

²Sha ayange a tsuaa a Saulu lu tor la je kpaa, lu we je u hemen Iserael, u duen a ve, shi u nyôron a ve kpaa ye; man TER, Aôndo wou, kaa a we er: Ka we ú kuran ior Av Iserael, shi ka we ú lu orhemen u ior Av Iserael kpaa ye.

³Tsô mbatamen mba Iserael cii ve va hen tor hen Heberon; Davidi ya ikur a ve hen Heberon sha ishigh ki TER; nahan ve shighe Davidi mkurem ve ver un tor sha Iserael, sha imo i TER i Samuel kaa la.

⁴Nahan Davidi kua Iserael cii ve yem hen Yerusalem (ka Yebushi je la). Mbayebushi, mba ve tema hen tar la kpaa ve lu her.

⁵Mba ve tema ken Yebushi la kaa a Davidi er: Ú nyôr heen ga. Nahan kpaa Davidi hemba garutya u Shion la, ka gar u Davidi je la.

⁶Tsô Davidi kaa er: Anti or u nana hii u hemban Mbayebushi yô, nana hingir orhemen man kurutya kpaa. Tsô Yoabi wan u Seruya vande unden, nahan i ver un orhemen.

⁷Tsô Davidi za tema sha garutya la; nahan maa i yilan un er, gar u Davidi.

⁸A maa gar la a ningir, hii hen Milo zan zan, yisa; Yoabi kpaa mase sôron gar u a shi la.

⁹Davidi seer taver yem hemen hemen; gadia TER u akum a Sha lu a na.

¹⁰Mban ka mbahemenev ken anomaior a ageegh a Davidi, mba ve var a na gbang gbang ken tor na, a Iserael imôngo cii, sha u kôron un tor sha kwaghôron u TER lu kaa sha Iserael la.

¹¹Ka iyenge i anomaior a Davidi lu a mi ne, ka: Yashobeam wan u Hakemoni, orhemen u mba ikundugber; a kende iwange na sha ior deri utar, a wua ve icin i môm.

¹²Ken ijime na yô, lu Eleasar wan u Dodo, Orahohi, lu u môm ken anomaior a ageegh atar.

¹³A lu a Davidi imôngo hen Pasedamin, zum u Mbafiliti kohol her sha ci u utya yô; sule ugen lu her, shair iv ken u, tsô ior yevese Mbafiliti.

¹⁴Kpa ve za tile her atô u sule la, ve sendegh her, ve hemba Mbafiliti; TER na ve mhembe u vesen.

¹⁵Ior itiar ken mbahemenev mba ikundugber mbala ve sen ve va hen Davidi hen vande ken bar u Adulam; Mbafiliti gema haa afo shin pev u Refaim.

¹⁶Hen shighe la Davidi lu ken garutya man ikumutya i Mbafiliti gema haa ken Betelehem.

¹⁷Tsô sar Davidi ken ishima tsung, a kaa er: Ma or ma nan shi nem mngerem ma shin ijôr i Betelehem, i i lu hen hunda la, ma m me.

¹⁸Tsô mba utar mbala tor hen atô u ikumutya i Mbafiliti za kese mngerem shin ijôr i Betelehem i i lu hen hunda la, ve va na Davidi; kpa Davidi kera rumun u man ma ga, a gema a haa ma inya sha ishigh ki TER,

¹⁹a kaa er: Aôndo wam A̱ yangem er me er nahan ga yô; kera ka awambe a ior mba ve te uma ve kera gaa? Gadia ka sha icihi i uma ve je ve ve a ma ye. Ka nahan man a rumun u man ma ga ye. Ka kwagh u anomaior atar la er je ne.

²⁰Abishai anngô u Yoabi lu orhemen ken a ve mba utar mbala, gadia a kende iwange na sha ior deri utar, a wua ve, nahan a due iti ken ve mba utar mban.

²¹Ve mba utar mban un hemba mba uhar icivir, nahan a hingir orhemen ve; nahan kpaa a ar sha mba utar mba hiihii mbala ga.

²²Benaia wan u Yehoyada, wan u nomor ugen u ken Kabeseel, u a er akaavesen yô, a wua ônov mba Ariel, Ormoabi, uhar, shi a hungwa shin ihungwa a wua begha sha shighe u senou lu haan la.

²³A shi a wua Origipiti or u taven tsung, ityaven na kuma aseva ataan; Origipiti la lu a iwange sha uwe, i lu er igyaikondo nahan; a sen hen a na a gbough, a tsuwe Origipiti la iwange sha uwe, a wua un sha iwange na la je.

²⁴Ka akaa a Benaia wan u Yehoyada a er je ne; a due iti ken anomaior atar la.

²⁵A hemba mba ikundugber mbala icivir je, kpa a ar sha mba utar mba hiihii mbala ga; Davidi ver un orvesen u mbakuran un.

²⁶Anomaior a ageegh a akumautya lu: Asahel, anngô u Yoabi; Elhanan wan u Dodo u Betelehem;

²⁷Shamoti, Orharodi; Helese, Orpelon;

²⁸Ira, wan u Ikeshi, Ortekoa; Abieser, Oranatoti;

²⁹Shibekai, Orhusha; Ilai, Orahohi;

³⁰Maharai, Ornetofa; Heledi wan u Baana, Ornetofa;

³¹Itai wan u Ribai u Gibea u ken ônov mba Benyamin; Benaia, Orpiraton;

³²Hurai u hen iwagh i Gaashi; Abiel, Orarbati;

³³Asemaveti, Orbahurim; Eliaba Orshaalbon;

³⁴ônov mba Hashem, Orgison; Yonatan wan u Shage, Orharar;

³⁵Ahiam wan u Sakar, Orharar; Elifal wan u Ur;

³⁶Hefer, Ormekarati; Ahiya, Orpelon;

³⁷Hesero, Orkarmel; Naarai wan u Esebai;

³⁸Yoel anngô u Natan; Mibehar wan u Hageri;

³⁹Seleki, Oramon; Naharai, Orbeeroti, or u tilin Yoabi wan u Seruya ikav mbi utyav;

⁴⁰Ira, Oriteri; Garebi, Oriteri;

⁴¹Uria, Orhiti; Sabadi wan u Ahelai;

⁴²Adina wan u Shisa, Orruben, orhemen u Mbaruben, ior ikundugber lu a na imôngo;

⁴³Hanan wan u Maaka; man Yoshafati, Ormiteni;

⁴⁴Ushia, Orasheterati; Shama man Yeiel, ônov mba Hotam, Oraroer;

⁴⁵Yediael, wan u Shimeri, man anngô na Yoha, Ortishi;

⁴⁶Eliel, Ormahav; man Yeribai man Yoshavia, ônov mba Elnaam; man Itema, Ormoabi;

⁴⁷Eliel man Obedi, man Yaashiel, Ormesoba.