Read tiv 1 Kroniku 12 Bible Online

1 Kroniku 12 - tiv bible

1 Kroniku 12

¹Mban yô, ka mba ve va kohol Davidi hen Shikelagi zum u a lu ken iuv sha ci u Saulu wan u Kishi la; ve kpaa ve lu anomaior a ageegh, ve lu wasen un ken utya.

²Ve lu mbakerenavaan, ve fa u eren kwagh ken uwegh ku yanegh kua ken ku imesegh kpaa, u keren awen sha mzu man u keren avaan sha ada; ve lu anmgbianev mba Saulu ken Benyamin.

³Ahieser lu orhemen, Yoashi gema dondo, ônov mba Shemaa, Orgibea; Yeshiel man Peleti, ônov mba Asemaveti; man Beraka, man Yehu, Oranatoti;

⁴man Ishemaia, Orgibeon, lu nomor u ageegh ken mba ikundugber mbala, lu orhemen u mba ikundugber mbala; man Yeremia man Yahashiel man Yohanan man Yosabadi, Orgedera;

⁵Elusai man Yerimoti man Bealia man Shemaria man Shefatia, Orharufi;

⁶Elkana man Ishia man Asarel man Yoeser man Yashobeam, ka Mbakora je la;

⁷man Yoela man Sebadia, ônov mba Yeroham u hen Gedor.

⁸Mbagadi kpaa pande za kohol Davidi hen garutya u ken toho, ka anomaior a ageegh a fan ityav a a lu a perutya kua iwange; ishiv vev yô, lu er ishiv mbi ubegha nahan, ve fa u nyôngoso er ivodura i sha iwo nahan;

⁹Eser lu orhemen, Obadia dondo, man Eliabi lu u sha utar,

¹⁰Mishemana u sha unyiin, Yeremia u sha utaan,

¹¹Atai u sha ataratar, Eliel u sha utaankaruhar,

¹²Yohanan u sha anigheni, Elsabadi u sha utaankarunyiin,

¹³Yeremia u sha pue, Makebanai u sha pue kar môm.

¹⁴Mban lu ken ônov mba Gadi, ve lu mbahemenev mba akumautya; u gban ijime la kuma sha ior deri, u hemban vesen kuma sha dubu.

¹⁵Ka ve je ve per Yordan sha uwer u hiihii ye, zum u ifi sar avenge cii la; ve zenda mba ve lu ken upev cii, vegher u sha ityoughkitaregh kua shin ityôtar kpaa.

¹⁶Tsô ônov mba Benyamin mbagenev kua mba Yuda kpaa va hen Davidi hen garutya.

¹⁷Nahan Davidi due za kegh ve gbenda, a kaa a ve er: Aluer nea va her a mo sha bem sha u va wasen mo yô, ishima yam ia var a ven; kpa aluer nea va sha u va nengen mker, nan mo sha ikev i mbaahendanev av, er ma ibo i lu sha ave am kpaa ga yô, Aôndo u uter asev A̱ nenge kwagh la, man A̱ yange ne.

¹⁸Tsô Jijingi sen tema sha Amasai, orhemen u mba ikundugber la, a kaa er: Se mba mba ou Davidi; se mba tan ken a we je, we wan u Yese. Lu bem bem; man bem a̱ lu a mbawasen we kpaa; gadia Aôndo wou ngu wasen we. Nahan Davidi rumun ve ver ve mbahemenev mba ikumutya.

¹⁹Mbamanase mbagenev kpaa pande za kohol Davidi, zum u a va a Mbafiliti imôngo, u va nôngon ityav a Saulu la (kpa a wase ve ga, gadia utor mba Mbafiliti hen imôngo, nahan ve na un gbenda er a̱ hide, ve lu kaan er: Una za kohol ter na Saulu nahan ityouv yasev mbia saa).

²⁰Er a lu zan hen Shikelagi yô, ior mba Manase, na ve za kohol un yô, lu: Adena man Yosabadi man Yediael man Mikael man Yosabadi man Elihu man Shiletai, mbahemenev mba ken Manase mba lun a ior dubu dubu sha ikev.

²¹Ve wase Davidi, ve nôngo ityav a ikum i mbanumungbenda la, gadia ve cii ve lu anomaior a ageegh je, shi ve lu mbahemenev kpaa ken akumautya.

²²Ior va kohol Davidi ayange ayange sha u wasen un, zan zan hingir zegeikumutya, er ikumutya i Aôndo nahan.

²³Iyenge i mbavesen, mba ve kange ikav mbi utyav, ve va hen Davidi hen Heberon, er vea gema tor vea na un sha ityough ki Saulu sha imo i TER yô, ka:

²⁴Ônov mba Yuda, mba ve lu a perutya man iwange yô, ve kuma ior dubu ataratar man deri anigheni mba ve kange ikav mbi utyav yô.

²⁵Ônov mba Shimeon, anomaior a ageegh a a kohol iyol sha ci u utya yô, lu ior dubu utaankaruhar man deri môm.

²⁶Ônov mba Levi yô, lu ior dubu unyiin man deri ataratar.

²⁷Shi Yehoyada orhemen u Mbaaron kua ior dubu utar man deri utaankaruhar a na imôngo;

²⁸man Sadoki, wanyekwaor, nomor u ageegh, kua ior mba hen ya u ter na, mbahemenev ikundu kar uhar.

²⁹Ônov mba Benyamin, anmgbianev mba Saulu, lu ior dubu utar, mba ve hembe ngeen ken ve yô, ve var a ya u Saulu her.

³⁰Ônov mba Eferaim yô, lu ior dubu ikundu man deri anigheni, anomaior a ageegh a a due iti ken uya mba uter vev.

³¹Vegherkwe u Manase yô, lu ior dubu pue kar anigheni mba i ter ve sha ati ati; ve va sha u va kôron Davidi tor.

³²Mbaisakar, ior mba ve fa ashighe, nahan ve fa kwagh u a doo u Iserael una er yô, ve lu mbavesen ior deri uhar a anmgbianev vev cii mba ve lu sha ikev ve la kpaa.

³³Sebulon, mba ve kuma u nyôron ken akumautya, ve fa u tangen ityav a hanma inja ikav mbi utyav yô, lu ior dubu akunduahargber; ve wan ago iyol sha ci u utya, ve zua doo doo ve lu a asema ahar ga.

³⁴Nafetali yô, mbahemenev lu dubu, man ior mbagenev dubu ikundugber kar utaankaruhar a ve imôngo, mba lun a perutya kua iwange.

³⁵Mbadan mba ve fa u tangen ityav yô, lu ior dubu ikundu kar anigheni man deri ataratar.

³⁶Asher, mba ve kuma u nyôron ken akumautya man ve fa u tangen ityav yô, lu ior dubu akunduahar.

³⁷Yande Yordan keela, Mbaruben man Mbagadi man vegherkwe u Manase yô, lu ior dubu deri man ikundu, a hanma inja i ikav mbi utyav.

³⁸Mban cii ve lu mbanôngontyav mba ve fa u tangen ityav yô; ve va ken Heberon a ishima i môm sha u va kôron Davidi tor sha Iserael cii; Mbaiserael mbagenev cii kpaa, ishima ve lu i môm sha u kôron Davidi tor.

³⁹Ve lu heregh a Davidi imôngo, ayange atar, ve lu yan kwagh man kwagh, gadia anmgbianev vev vande kohol iyol sha ci ve.

⁴⁰Man shi mba ve lu anmgbianev vev yô, zan zan ar hen Isakar man Sebulon man Nafetali kpaa, ve va a kwaghyan sha ujaki man sha urakumi man sha mbaalfadari man sha ibua, kwaghyan er mwem, man azen a tur, man asume a atam a wain a ombor, man wain kua mkurem, man ibua kua iyôngo kpishi; gadia saan Iserael iyol kpishi.