Read tiv 1 Kroniku 16 Bible Online

1 Kroniku 16 - tiv bible

1 Kroniku 16

¹Tsô ve nyôr a areki u Aôndo ve ver un ken atô u tenti u Davidi tim sha ci na la, nahan ve na iniav mbi nanden man iniav mbi bem sha ishigh ki Aôndo.

²Zum u Davidi bee u nan nagh ku nanden kua iniav mbi bem yô, a ver ior doo doo ken iti i TER.

³Hanma or u Iserael nomsoor man kwase kpaa, a na nan akpekpa man ijuugh ki inyamegh man ijen i atam a wain a ombor.

⁴A ver Mbalevi mbagenev er ve̱ eren tom sha ishigh ki areki u TER, ve̱ pasen iwuese Na, ve̱ sughun, ve̱ civir TER, Aôndo u Iserael.

⁵Asav lu orvesen, Sekaria dondo sha a na man Yeiel man Shemiramoti man Yehiel man Matitia man Eliabi man Benaia man Obedi-edom man Yeiel, ve lu a mbaadiguve man umolo; Asav lu a ukwen, lu kuhwan taver taver;

⁶man upristi Benaia man Yahashiel ve lu a ukakaki, ve tôngon sha ishigh ki areki u ikuryan u Aôndo gbem.

⁷Ka sha iyange la je Davidi hii veren Asav a anmgbianev nav er ve̱ wuese TER ye.

⁸Wuese nen TER, yila nen sha iti Na; pase nen akuraior ityom Na.

⁹Wa icam ter nen Un, wa nen atsam a wuese Un; ôron nen kwagh u akaa a Na a kpilighyol cii.

¹⁰Ta nen ihagh sha icighanti Na; asema a mba ve keren TER yô, a̱ ember tsung.

¹¹Ker nen TER kua agee a Na kpaa, keren nen ishigh Nagh gbem!

¹²Umbur nen ityom Na i kpilighyol i A er yô, uivande Nav kua ajiraôron a ken zwa Na;

¹³ne tsombor u wanakiriki Na Iserael, ne ônov mba Yakob, ne uicuwan Nav.

¹⁴Un, TER, ka Aôndo wase je; ajiraôron a Na nga sha won cii.

¹⁵Umbur nen ikuryan Na gbem; ka mkaanem ma A kaa sha ci u ikov dubu je la;

¹⁶ikuryan i A ya a Aberaham la, man mbum Na a Isaka;

¹⁷A shi A taver i hingir tindi hen Yakob, hen Iserael kpaa hingir icôronikuryan je,

¹⁸er lu kaan er: Ka we je Me na u tar u Kanaan, u̱ lu kwar u dyako wen.

¹⁹Zum u ve lu ior kpeghee tsô la, ve ndahar mimi, man ve lu shir ken u la;

²⁰ve lu zenden ken akuraior sha adondo adondo, ve mough ken tartor ugen, ve yem ken ikurior igen kposo.

²¹A rumun ma or nzughul a ve ga; een, A zôhô a utor sha ci ve kpaa.

²²Lu kaan er: De benden nen mba M shigh ve mkurem la ave ga; uprofeti Av kpaa de eren nen ve kwagh u vihin ga.

²³Wa icam, ter TER, we tar cii; pase myom Na ayange ayange.

²⁴Pase akuraior iengem Na, man akaa a Na a kpilighyol kpaa, pase a hen ior cii.

²⁵Gadia TER hemba cii, A kuma iwuese kpishi je; A hemba cier iyol a mbaaôndo mbagenev cii.

²⁶Gadia mbaaôndo mba akuraior cii, ka agbilinakaa tsô; kpa TER gba Usha.

²⁷Icivir man iengem mba Un sha ishi; agee man iember mba ken ijiir Na i teman.

²⁸Ne icombor i ior, na nen TER, na nen TER icivir man agee;

²⁹na nen TER icivir i i kom sha iti Na yô; va nen a nagh, va nen sha ishigh Nagh. Gure civir nen TER a uicighanmbaakondov iyol.

³⁰Ikarikase i̱ gbidye u iyol sha ishigh Nagh, we tar sha won cii; tar kpaa u taver je ua kera tenger ga.

³¹Usha ve̱ ember man tar kpaa u̱ ember tsung; ve̱ kaa a akuraior er: TER tema tor.

³²Zegemnger a̱ hura, kua m-iv na kpaa; toho u̱ ember, kua akaa a a lu ken u cii.

³³Zum la ikon i ken ikô cii ia wa icam a iember sha ishigh ki TER; gadia ngu van sha u va ôron tar ijir.

³⁴Wuese nen TER gadia A doo; gadia erdoo Na ka u tsôron gbem sha won je.

³⁵Yô, kaa nen ner: Yima se, Aôndo u myom wase, kohol se imôngo, yima se sha ikev i akuraior, sha er sé wuese icighanti Wou man sé ta ihagh sha iwuese You yô.

³⁶I̱ wuese TER, Aôndo u Iserael, hii sha uicôrombaashighev zan zan gbem sha won cii! Nahan ior cii rumun er Amen! Man ve wuese TER.

³⁷Tsô a ver Asav kua anmgbianev nav er ve̱ tilen sha ishigh ki areki u ikuryan u TER, ve̱ eren tom sha ishigh ki areki gbem, sha gbayol u hanma iyange,

³⁸kua Obedi-edom a anmgbianev nav kpaa, ior akunduatar kar anigheni; Obedi-edom wan u Yedutun man Hosa, ve lu mbakuranhunda;

³⁹man pristi Sadoki, kua anmgbianev nav upristi, a ver ve sha ishigh ki tabernakel u TER sha igungu u hen Gibeon la,

⁴⁰sha u ve̱ naan iniav mbi nanden sha atse a nagh ku nanden gbem, pepe man aikighe, er i nger ken tindi u TER u A wa Iserael la nahan.

⁴¹Heman man Yedutun lu a ve imôngo, man shi mbagenev mba i tsuwa yô, mba i ter ati a ve, sha u ve̱ wuese TER, gadia erdoo Na ngu gbem sha won.

⁴²Heman man Yedutun kpaa lu a ukakaki man ukwen sha ci u ior mba tôngon man mba kuhwan la, man shi ityogholov sha ci u atsam a wuese Aôndo; kpa ônov mba Yedutun ve tilen sha hunda.

⁴³Tsô ior cii hembe, hanma or hide hen ya u nan; Davidi kpaa hide sha u za sughun ya na.