Read tiv 1 Kroniku 18 Bible Online

1 Kroniku 18 - tiv bible

1 Kroniku 18

¹Tsô ken masejime la, Davidi hemba Mbafiliti, ve hingir sha ikev na, a ngohol Gati kua angarev nav sha ikev i Mbafiliti.

²A hemba Moabi kpaa; Mbamoabi hingir sha ikev i Davidi, ve taan un kpandegh.

³Davidi shi hemba Hada-deser tor u Soba kpaa, hen Hamati, zum u a lu zan sha u una za taver tor na hen ifi u Uferati la.

⁴Davidi ngohol un akekeautya dubu man mbaanyinyav dubu utaankaruhar man mbazanangahar dubu ikundu, Davidi tôndo anyinya a kpelan akeke cii igbela i shin akishiangahar, kpa a tsegha agen, kuma sha akeke deri.

⁵Er Mbashiria mba sha Damaseku va sha u vea wase Hada-deser tor u Soba yô, Davidi wua Mbashiria ior dubu ikundu kar uhar.

⁶Tsô Davidi maa ver mbautyav mba kuran ken Shiria u Damaseku; Mbashiria hingir sha ikev i Davidi, ve taan un kpandegh. TER na Davidi mhembe hanma ijiir i una za cii.

⁷Davidi kura iperutya i zenaria i ior mba Hada-deser lu a mi la, a va a mi ken Yerusalem.

⁸Hen Tibehati man Kun, agar a Hada-deser la kpaa, Davidi kura utogula heregh kpishi, ka ve je Solomon er zegetasa u togula man mtôm kua ikav mbi togula a min ye.

⁹Zum u Tou, tor u Hamati, ungwa er Davidi hemba akumautya a Hada-deser, tor u Soba, cii yô,

¹⁰a tindi wan na Hadoram hen tor Davidi er a̱ za sugh un, shi a̱ wuese un kpaa, er a nenge ityav a Hada-deser, a hembe un yô; gadia Hada-deser vande nôngon ityav a Tou; a va a hanma inja i ikav mbi zenaria man mbi azurfa kua mbi togula.

¹¹Mbila kpaa Davidi tsegha mbi sha ci u TER, seer sha azurfa man zenaria mba a kura hen akuraior cii, hen Edom man hen Moabi man hen Mbaamon man hen Mbafiliti kua hen Mbaamaleki.

¹²Abishai wan u Seruya kpaa wua Mbaedom ior dubu puenigheni shin pev u Bar.

¹³Shi a ver mbautyav mba kuran ken Edom, nahan Mbaedom cii hingir sha ikev i Davidi; TER na Davidi mhembe hanma ijiir i una za cii.

¹⁴Davidi tema tor sha Iserael cii a ôron ior nav cii ijir sha mimi kua sha perapera.

¹⁵Yoabi wan u Seruya lu a akumautya sha ikev; Yehoshafati wan u Ahiludi lu or u ngeren abaver ken takerada.

¹⁶Sadoki wan u Ahitubi man Abimeleki wan u Abiatar lu upristi; Shavsha lu orngeren.

¹⁷Benaia wan u Yehoyada lu a Mbakereti man Mbapeleti sha ikev; ônov mba Davidi lu atiator a wasen tor tom.