Read tiv 1 Kroniku 26 Bible Online

1 Kroniku 26 - tiv bible

1 Kroniku 26

¹Sha kwagh u iniongo i mbakuranhunda yô, ken Mbakora i ver Meshelemia wan u Kore, u ken ônov mba Asav.

²Meshelemia lu a ônov mba nomso, ka: Sekaria waniunda, Yediael dondo, Sebadia lu u sha utar, Yateniel u sha unyiin,

³Elam u sha utaan, Yehohanan u sha ataratar, Elioenai u sha utaankaruhar.

⁴Obedi-edom kpaa lu a ônov mba nomso, ka: Shemaia waniunda. Yehoshabadi dondo. Yoa lu u sha utar, Sakar u sha unyiin, Netanel u sha utaan,

⁵Amiel u sha ataratar, Isakar u sha utaankaruhar, Peuletai u sha anigheni; gadia Aôndo ver un dedoo.

⁶Wan na Shemaia kpaa mar ônov mba nomso; ve lu mbahemenev hen ya u ter ve, gadia ve lu anomaior a ageegh.

⁷Ônov mba Shemaia yô, lu: Oteni man Refael man Obedi man Elsabadi; anmgbianev vev lu ior mba ageev, ka Elihu man Semakia.

⁸Mban cii lu ken ônov mba Obedi-edom; ve a ônov vev man anmgbianev vev, ve lu ior mba ageev, ve kuma sha tom la, ve lu akunduatar kar uhar, mba Obedi-edom.

⁹Meshelemia lu a ônov man anmgbianev, ior mba ageev, pue kar anigheni.

¹⁰Hosa u ken ônov mba Merari, lu a ônov mba nomso: Shimeri lu orhemen (gadia shin er un lu waniunda ga, nahan kpaa ter na ver un tamen),

¹¹Hilkia lu u sha uhar, Tebalia u sha utar, Sekaria u sha unyiin; kohol ônov man anmgbianev mba Hosa cii lu ior pue kar uhar.

¹²Iniongo i mbakuranhunda ne, er i pav hanma orvesen a nongo u nan, ve lu a tom u eren, er anmgbianev vev nahan, ken iyou i TER.

¹³Ve er ishor, mbakiriki kua mbavesen kpaa, sha mlu u iyenge i uya mba uter vev, sha ci u hanma hunda cii.

¹⁴Ishor i sha ci u vegher u sha ityoughkitaregh la, gba sha Shelemia. Tsô ve er ishor sha ci u wan na Sekaria, or u wasen u henen kwagh jighilii; kwar na gema gba vegher u ken imbusutarimese.

¹⁵Kwar u Obedi-edom yô, gba vegher u ken imbusutariyan; kwar u ônov nav gema lu di iyou i koson akaa ker.

¹⁶Kwar u Shupim man u Hosa yô, lu vegher u shin ityôtar, hen hunda u Shaleketi sha igbudu u kôndon sha la, mbakuran lu keen man keen, ve zua ishigh.

¹⁷Vegher u sha ityoughkitaregh, Mbalevi lu ataratar; vegher u ken imbusutarimese la, ve luun unyiin ayange ayange; vegher u ken imbusutariyan kpaa unyiin ayange ayange; sha iyou i koson akaa yô, ve luun uhar uhar.

¹⁸Hen ayou a i maa ken kungur la, vegher u shin ityôtar yô, ve luun unyiin sha igbudu u kôndon sha la, man uhar hen ayou a i maa ken kungur la.

¹⁹Ka iniongo i mbakuranhunda je ne; ka mba ken ônov mba Kora, kua mba ken ônov mba Merari.

²⁰Man anmgbianev vev, Mbalevi lu nengen sha inyaregh ki iyou i Aôndo, man sha inyaregh ki uicighanmbaakaav la.

²¹Ônov mba Ladan, ônov mba Mbagershon mba ve lu mba Ladan la, mbahemenev mba sha uya mba uter mba Ladan, Orgershon la, lu: Yehieli.

²²Ônov mba Yehieli yô, lu: Setam man anngô na Yoel; ve nengen sha inyaregh ki iyou i TER.

²³Sha kwagh u Mbaamram man Mbaisehar man Mbaheberon kua Mbaushiel yô,

²⁴lu Shebuel wan u Gershon, wan u Mose, lu orvesen sha ayouanyar la.

²⁵Man anmgbianev nav mba ken Elieser yô, lu: Rahabia wan na, Yeshaia wan na, Yoram wan na, Shikeri wan na, Shelomoti wan na.

²⁶Shelomoti ne kua anmgbianev nav ve lu nengen sha inyaregh ki uicighanmbaakaav cii, ki tor Davidi man mbahemenev mba sha uya mba uter, man mbahemenev mba lun a ior dubu dubu man deri deri sha ikev, man mbahemenev mba akumautya, ve tsegha yô.

²⁷Ve pande ishar i utya ve tsegha sha ci u sôron iyou i TER.

²⁸Akaa cii a profeti Samuel lu tsegha kpaa kua Saulu wan u Kishi, man Abiner wan u Ner, man Yoabi wan u Seruya, hanma kwagh u i tsegh un cii, ka sha ikev i Shelomoti kua anmgbianev nav a lu ye.

²⁹Ken Mbaisehar yô, i ver Kenania a ônov nav er ve̱ lu mbahemenev man mbaajiriv mba Iserael sha ci u akaa a ken won.

³⁰Ken Mbaheberon yô, Hashabia a anmgbianev nav, nomsombaiorov mba ageev, ior dubu man deri utaankaruhar, ve lu mba nengen sha Iserael yande Yordan vegher u shin ityôtar, sha ci u akaa a TER cii man tom u tor.

³¹Ken Mbaheberon yô, Yeriya lu orhemen, ka ken Mbaheberon je la, sha ikov ve ken uya mba uter. (Sha inyom i sha akunduahar i tor u Davidi la, i time sha kwagh, i zua a anomaior a ageegh ken ve hen Yaser u Gileadi.)

³²Anmgbianev nav kpaa lu anomaior, ve lu dubu uhar man deri utaankaruhar, mbavesen mba sha uya mba uter; tor Davidi ver ve, ve lu mba nengen sha Mbaruben man Mbagadi man vegherkwe u Mbamanase, sha ci u hanma kwagh u Aôndo kua akaa a tor.