Read tiv 1 Kroniku 27 Bible Online

1 Kroniku 27 - tiv bible

1 Kroniku 27

¹Mbaiserael ka iyenge ve ne: mbavesen mba sha uya mba uter, man mbahemenev mba lun a ior dubu dubu man deri deri sha ikev, man mbatomov vev mba ve lu eren tor tom sha hanma kwagh u iniongo i i lu nyôron man i lu duen sha iwer iwer, sha iwer i ken inyom cii, hanma nongo lu ior dubu ikundu kar unyiin.

²Or u nengen sha nongo u hiihii sha uwer u hiihii la yô, lu Yashobeam wan u Sabediel; ken nongo na ior lu dubu ikundu kar unyiin.

³Ken ônov mba Perese yô, un lu orvesen u mbahemenev mba akumautya cii sha uwer u hiihii la.

⁴Or u nengen sha nongo u sha uwer u sha uhar yô, lu Dodai, Orahohi; sha nongo na Mikeloti lu orvesen; ken nongo na, ior lu dubu ikundu kar unyiin.

⁵Orhemen u ikumutya i sha utar, sha uwer u sha utar la yô, lu Benaia wan u zegepristi Yehoyada; ken nongo na ior lu dubu ikundu kar unyiin.

⁶Ka Benaia u a lu or u ageegh ken mba ikundugber mbala je ne, man shi mba ikundugber mbala lu sha ikev na, wan na Amisabadi kpaa lu ken nongo na.

⁷U sha unyiin sha uwer u sha unyiin yô, lu Asahel, anngô u Yoabi, wan na Sebadia gema gbire sha a na; ken nongo na ior lu dubu ikundu kar unyiin.

⁸Orhemen u sha utaan sha uwer u sha utaan yô, lu Shamahuti, Orisera; ken nongo na ior lu dubu ikundu kar unyiin.

⁹U sha ataratar sha uwer u sha ataratar yô, lu Ira wan u Ikeshi, Ortekoa; ken nongo na ior lu dubu ikundu kar unyiin.

¹⁰U sha utaankaruhar sha uwer u sha utaankaruhar yô, lu Helese, Orpelon, u ken ônov mba Eferaim; ken nongo na ior lu dubu ikundu kar unyiin.

¹¹U sha anigheni sha uwer u sha anigheni yô, lu Shibekai, Orhusha, u ken Mbaserahi; ken nongo na ior lu dubu ikundu kar unyiin.

¹²U sha utaankarunyiin sha uwer u sha utaankarunyiin yô, lu Abieser, Oranatoti, u ken Mbabenyamin; ken nongo na ior lu dubu ikundu kar unyiin.

¹³U sha pue sha uwer u sha pue yô, lu Maharai, Ornetofa, u ken Mbaserahi; ken nongo na ior lu dubu ikundu kar unyiin.

¹⁴U sha pue kar môm sha uwer u sha pue kar môm yô, lu Benaia, Orpiraton, u ken ônov mba Eferaim; ken nongo na yô, ior lu dubu ikundu kar unyiin.

¹⁵U sha pue kar uhar sha uwer u sha pue kar uhar yô, lu Heldai, Ornetofa, u ken Oteniel; ken nongo na yô, ior lu dubu ikundu kar unyiin.

¹⁶Sha ikwe i Iserael ken Mbaruben yô, Elieser wan u Shikeri lu orhemen; ken Mbashimeon yô, lu Shefatia wan u Maaka;

¹⁷ken Levi yô, lu Hashabia wan u Kemuel; ken Aron yô, lu Sadoki;

¹⁸ken Yuda yô, lu Elihu, u ken anmgbianev mba Davidi; ken Isakar yô, lu Omeri wan u Mikael;

¹⁹ken Sebulon yô, lu Ishemaia wan u Obadia; ken Nafetali yô, lu Yeremoti wan u Aseriel;

²⁰ken ônov mba Eferaim yô, lu Hoshea wan u Asashia; ken vegherkwe u Manase yô, lu Yoel wan u Pedaia;

²¹ken vegherkwe u Manase ken Gileadi yô, lu Ido wan u Sekaria; ken Benyamin yô, lu Yaashiel wan u Abiner;

²²ken Dan yô, lu Asarel wan u Yeroham. Mban lu mbahemenev mba sha ikwe i Iserael.

²³Kpa Davidi ôr iyenge i mba ve kom anyom ikundu man mba ve yen la ga, gadia TER kaa er, Una ngee Iserael er asan a Sha nahan.

²⁴Yoabi wan u Seruya hii u ôron iyenge, kpa er lu a bee ga tsô, iyugh sen sha Iserael sha ci u kwagh shon ne; ka nahan man i nger iyenge ve ken ruamabera u abaver u tor Davidi ga ye.

²⁵Akaa a tor a i koso a yô, lu sha ikev i Asemaveti wan u Adiel; akaa a i koso ken ishule man ken agar a vesen man agar a kiriki man ken ayouautya yô, lu sha ikev i Yonatan wan u Ushia;

²⁶Eseri wan u Kelubi lu or u nengen sha mbakahansule;

²⁷Shimei Orrama nengen di sha ishule i ikon i wain; Sabedi Orshifemi yô, a nengen sha wain u i ombo un ken ishule i wain.

²⁸Ikon i olev man ikon i tur i shin pev yô, lu sha ikev i Baal-hanan, Orgeder; ayou a koson mkurem ker lu sha ikev i Yoashi;

²⁹akumabua a yan toho ken Sharon yô, lu sha ikev i Shiteria, Orsharon; man akumabua a a lu shin apev yô, lu sha ikev i Shafati, wan u Adelai;

³⁰urakumi yô, lu sha ikev i Obil, Orishemael; ujaki yô, lu sha ikev i Yedeia, Ormeronoti; man akumauile yô, lu sha ikev i Yashishi, Orhagar.

³¹Mban cii lu mbahemenev sha akaa a Davidi.

³²Yonatan wan u anngô u Davidi lu or u wasen henen kwagh, lu orfankwagh, shi lu orngeren kpaa; Yehiel wan u Hakemoni lu a ônov mba tor imôngo;

³³Ahitofel lu or u wasen tor kwaghhenen; Hushai, Orarkiti, lu ikar u tor;

³⁴or u nan dondo sha Ahitofel yô, lu Yehoyada wan u Benaia, man Abiatar; Yoabi lu orhemen u akumautya a tor.