Read tiv 2 Kroniku 11 Bible Online

2 Kroniku 11 - tiv bible

2 Kroniku 11

¹Zum u Rehobiam va ken Yerusalem yô, a kohol ya u Yuda kua u Benyamin, uicuwanmbaiorov dubu deri man akunduanyiin, mba ve lu mbanôngontyav yô, sha u á nôngo ityav a Iserael, shi á hide a tor hen Rehobiam.

²Kpa imo i TER va hen Shemaia or u Aôndo er:

³Ôr kwagh a Rehobiam wan u Solomon, tor u Yuda, man a Iserael cii, ken Yuda man Benyamin, kaa ve wer:

⁴TER ngu kaan nahan er: De kende nen ga, de za nenge nen ityav a anmgbianev enev kpaa ga; hanma or nana̱ hide hen ya u nan, gadia kwagh ne, ka her a Mo a dugh ye. Tsô ve ungwa imo i TER, ve hide, ve kera za nôngo ityav a Yerobiam ga.

⁵Nahan Rehobiam tema ken Yerusalem, gema maa agarautya ken Yuda.

⁶A maa Betelehem man Etam man Tekoa

⁷man Bete-sur man Soko man Adulam

⁸man Gati man Maresha man Shiv

⁹man Adoraim man Lakishi man Aseka

¹⁰man Sora man Aiyalon man Heberon, agar a a lu ken Yuda man Benyamin, ka agarautya a lun a ugir je la.

¹¹A taver agarautya la, a ver mbahemenev ken a, shi a ombo kwaghyan man mkurem kua wain ken a kpaa.

¹²Ken hanma gar a ver iperutya kua awange, a taver a kpishi. Yuda kua Benyamin lu mba nav.

¹³Upristi man Mbalevi mba ve lu ken Iserael cii, ve mough ken ityar ve cii, ve va her a na.

¹⁴Gadia Mbalevi undu ajiir a ve a ilev yan toho her, man akaa a ve, ve va hen Yuda kua ken Yerusalem; gadia Yerobiam kua ônov nav ta ve kera, er ve̱ de kera eren TER tom u pristi ga;

¹⁵a̱ gema a ver upristi nav iyol na, sha ci u ajiir a taven sha man sha ci u ujijingi mba bov man sha ci u anibuav mba a er la.

¹⁶Mbagenev kpaa, ken ikwe i Iserael cii va a ve ityô, ka mba ve ver asema a ve sha u keren TER, Aôndo u Iserael, je la, ve va ken Yerusalem, sha u va nan TER, Aôndo u uter vev, nagh.

¹⁷Nahan ve taver tor u Yuda, ve taver Rehobiam wan u Solomon ishima anyom atar; gadia anyom atar je, ve lu zenden sha gbenda u Davidi kua u Solomon.

¹⁸Rehobiam er Mahalati, wan u Yerimoti, wan u Davidi, wan u Abihail, wan u Eliabi, wan u Yese,

¹⁹a mar ônov mba nomso a na: Yeushi man Shemaria man Saham.

²⁰Ken ijime i ngula yô, a shi a er Maaka, wan u Abesalom; a mar Abiya man Atai man Shisa man Shelomiti a na.

²¹Maaka wan u Abesalom doo Rehobiam ishima hemba kasev nav mbagenev cii kua kasev nav mba sha uika kpaa (gadia a er kasev pue kar anigheni man kasev mba sha uika akunduatar, a mar ônov mba nomso ikundu kar anigheni man ônov mba kasev akunduatar).

²²Rehobiam ver Abiya wan u Maaka tamen, er a̱ lu orhemen ken anngôôv nav, gadia a lu wan ishima u veren un tor.

²³A er kwagh sha kwaghfan, a samber ônov nav cii, a ver ve ken ityar i Yuda man i Benyamin cii, ken hanma gar u lun a gir, a na ve kwaghyan kpishi, shi a er kasev kpishi sha ci ve.