Read tiv 2 Kroniku 13 Bible Online

2 Kroniku 13 - tiv bible

2 Kroniku 13

¹Sha inyom i sha pue kar anigheni i tor Yerobiam la, Abiya ya tor ken Yuda.

²A tema tor ken Yerusalem anyom atar, iti i ngô na er Mikaia wan u Uriel u Gibea. Tsô ityav mough hen atô u Abiya vea Yerobiam.

³Abiya hii ityav a akum a anomaior a utya, lu uicuwanmbaiorov dubu deri unyiin; Yerobiam di ver uicuwanmbaiorov dubu deri anigheni er ve̱ nôngo ityav a na, lu anomaior a ageegh je.

⁴Tsô Abiya tile sha uwo u Semaraim u u lu sha tar u iwoogh u Eferaim la, a kaa er: Ungwa nen imo yam, Yerobiam kua Iserael cii!

⁵Doo u ma ne fe er TER, Aôndo u Iserael, A ne Davidi tor u Iserael gbem, un a ônov nav sha ikuryan i bar gaa?

⁶Kpa Yerobiam wan u Nebati, wanakiriki u Solomon wan u Davidi mough, hendan a ter na.

⁷Udangmbaiorov kohol un, agbilinaior, ve taver ayol a ve sha u hendan a Rehobiam wan u Solomon, zum u Rehobiam lu iyev, lu a taver ishima ga la, nahan a fatyô u yangen ve ga.

⁸Hegen yô, ne mba henen ner, ne fatyô u hendan a tor u TER, u a lu sha ikev i ônov mba Davidi, gadia ne mba ikumior i vesen je, man ne mba a anibuav mba zenaria mba Yerobiam er ne, er ve̱ hingir ne mbaaôndo la.

⁹Ne zenda upristi mba TER, ônov mba Aron man Mbalevi, ne gema ne ver upristi ayol a en er ior mbagenev mba ken ityar igen ve eren nahan gaa? Hanma or u ka nana va a wanbua man anomaiyôngo ataankarahar sha ci u nana va tsegha iyol i nan yô, maa nan gema nan hingir pristi u mbaaôndo mba ve lu Aôndo u mimi ga la!

¹⁰Kpa se yô, TER, ka Aôndo wase, se undu Un ga, ônov mba Aron mba eren TER tom u pristi, man Mbalevi kpaa mba ken tom ve.

¹¹Hanma iyange pepe man aikighe ve nanden TER iniav mbi nanden man kwaghhumandoon, ve veren ubredi mba sha tebul u wang, ve tsaren daarimenger u zenaria a amenger a na a zer yeghen aikighe gbem, gadia se mba we iko sha imo i TER, Aôndo wase; kpa ne yô, ne undu Un.

¹²Nenge, Aôndo ngu a vese, ngu hemen se kua upristi Nav a ikor i tôngon sha u nôngon ityav a ven. Ne ônov mba Iserael, de nenge nen ityav a TER, Aôndo u uter enev, ga; gadia á kpe ne iyol ga.

¹³Kpa Yerobiam ver mbautyav mbagenev due ve nev ken ijime; ve ve lu Yuda sha ishi, mba duen nev mbala lu ve ken ijime.

¹⁴Tsô zum u Mbayuda mba gem ashe yô, nenge ityav yisa ve ken hemen kua ken ijime, tsô ve vaa a TER, upristi kpaa tôngo ikor.

¹⁵Nahan ior mba Yuda ger akenge; Mbayuda mba geren akenge yô, Aôndo na Abiya man Yuda ve hemba Yerobiam a Iserael cii ityav.

¹⁶Tsô Mbaiserael yevese Yuda, Aôndo gema ve na sha ikev na.

¹⁷Abiya a ior nav wua ve je falegh gba, uicuwanmbaiorov mba Iserael dubu deri utaan kpe ken ityav mbila.

¹⁸Nahan Mbaiserael var inya hen shighe la, kpa Mbayuda seer taver a taver, gadia ve suur sha TER, Aôndo u uter vev.

¹⁹Abiya gba zendan Yerobiam ityô, ngohol un agar: Betel a agar a na, man Yeshana a agar a na, kua Eferon a agar a na.

²⁰Yerobiam kera hide a agee na sha ayange a Abiya la, je ga; TER tsaha un, maa a kpe.

²¹Kpa Abiya yô, seer taver a taver, a er kasev pue kar unyiin, amar ônov mba nomso ikundu kar uhar man mba kasev pue kar ataratar.

²²Aerenakaa a Abiya agen man igbenda na man mkaanem nam yô, i nger a ken mpase u profeti Ido.