Read tiv 2 Kroniku 21 Bible Online

2 Kroniku 21 - tiv bible

2 Kroniku 21

¹Tsô Yehoshafati yav a uter nav imôngo, i ii un a uter nav imôngo ken gar u Davidi; wan na Yehoram gema tema tor sha ityough nagh.

²A lu a anmgbianev, ka ônov mba Yehoshafati je la, lu: Asaria man Yehiel man Sekaria man Asaria man Mikael man Shefatia; mban cii lu ônov mba Yehoshafati tor u Iserael.

³Ter ve er ve uzegembaiwuav sha azurfa man sha zenaria man sha ikav mbi injaav kua agar a lun a ugir ken Yuda; kpa a na Yehoram tor, gadia un lu wan na u iunda.

⁴Kpa zum u Yehoram ngohol tor u ter na la, er a va taver yô, a gema a wua anngôôv nav ca ca sha sanker, kua atiator agen a Iserael kpaa.

⁵Yehoram lu anyom ikundugber kar ahar zum u a ya tor yô; a tema tor ken Yerusalem anyom anigheni.

⁶A zenden sha gbenda u utor mba Iserael, er ya u Ahaba lu eren nahan; gadia a er wan u Ahaba; a er kwaghbo sha ishigh ki TER.

⁷Nahan kpaa, TER rumun u timin ya u Davidi ga, sha ci u ityendezwa i A tôndo a Davidi la, gadia A tôndo zwa a na er Una na un imenger, un kua ônov nav gbem.

⁸Sha ayange na la, Edom due sha ikev i Yuda kera, ve gema ve ver tor ve ayol a ve.

⁹Tsô Yehoram per a mbahemenev nav kua akekeautya a na cii; a mough tugh, a hemba Mbaedom mba ve kase un a mbahemenev mba akekeautya la.

¹⁰Kape Edom hendan due sha ikev i Yuda kera, zan zan nyian ne. Libena kpaa hendan a na sha shighe shon môm la; gadia a undu TER, Aôndo u uter nav.

¹¹Shi a er ajiir a taven sha, sha iwo i Yuda, a na mba ve tema ken Yerusalem sha u ve̱ er idya; a tsume a Yuda sha gbenda u bo.

¹²Tsô takerada due hen profeti Eliya va nyôr hen a na, a kaa er: TER, Aôndo u Davidi teru, ngu kaa nahan er: Er u ze sha gbenda u teru Yehoshafati, shin sha gbenda u Asa tor u Yuda kpaa ga, yô,

¹³u gem u ze sha gbenda u utor mba Iserael, man u ne mba ve tem ken Yuda kua Yerusalem sha u ve̱ er idya, er ya u Ahaba lu er nahan, man shi u wua anmgbianev ou mba hen ya u teru mba ve hembe doon a we la,

¹⁴Nenge, TER Una tsaha ior ou sha mtsaha u vesen, kua ônov ou, man kasev ou, man kwagh u u lu a mi cii;

¹⁵We iyol you kpaa angev mbua er u kpishi ken mya, anyom imôngo, myam ou maa haa won sha angev mbula.

¹⁶Tsô TER kende jijingi u Mbafiliti kua Mbaarabia mba ve lu ikua ikua a Mbakushi la er ve̱ nôngo ityav a Yehoram;

¹⁷ve va ityav hen Yuda, ve hemba ve, ve nyôr, ve kura inyaregh ki ve zua a mi ken ya u tor cii kua ônov nav man kasev nav, je yô, i shi un ma wan môm ga, saa Yehoahashi wan na u masetyô tsô.

¹⁸Ken masejime u akaa ne cii yô, TER tsaha un sha angev mbu been mayange ga, ken myam nam.

¹⁹Tsô shighe kar er anyom ahar nahan yô, myam nam haa won sha angev nav mbula; a kpe sha bouange. Ior nav kera nande un kwaghhumandoon er ve nande uter nav nahan ga.

²⁰A lu anyom ikundugber kar uhar zum u a ya tor la, a tema tor ken Yerusalem anyom anigheni; er a kar kera nahan, i sar ve a na ga; ve ii un ken gar u Davidi, kpa lu ken iwar i utor ga.