Read tiv 2 Kroniku 24 Bible Online

2 Kroniku 24 - tiv bible

2 Kroniku 24

¹Yoashi lu anyom ataankarahar zum u a ya tor la; a tema tor anyom akunduahar ken Yerusalem, iti i ngô na er, Shibia u ken Bersheba.

²Yoashi eren kwagh u dedoo sha ishigh ki TER, sha ayange a pristi Yehoyada la cii;

³Yehoyada er kasev uhar na un; a mar ônov mba nomso kua mba kasev.

⁴Tsô ken masejime la yô, sar Yoashi u sôron iyou i TER.

⁵Nahan a kohol upristi man Mbalevi, a kaa a ve er: Za nen ken agar a Yuda, za kohol nen inyaregh hen Iserael cii, ki sôron iyou i Aôndo wen a mi anyom anyom, ver nen asema er nen fefa sha kwagh ne. Nahan kpaa, Mbalevi er fefa ga.

⁶Tsô tor yila pristi u tamen Yehoyada pine un er: Ka nyi u kaa Mbalevi wer, ve̱ za kohol inyaregh hen Yuda man hen Yerusalem, ki Mose wanakiriki u TER a wa mkohol u Iserael sha ci u tenti u Shiada la ga?

⁷Gadia ônov mba Atalia iferkwase la ve hembe iyou i Aôndo, ve gema uicighanmbaakaav mba ken iyou i TER cii ve vihi sha Ubaal.

⁸Nahan tor kaa er, ve̱ er akwati, ve̱ ver ken won hen hunda u iyou i TER.

⁹Tsô ve yôô ken Yuda man ken Yerusalem er i̱ va TER a inyaregh ki Mose wanakiriki u Aôndo lu wa Iserael ken desereti la.

¹⁰Nahan atiator cii kua ior cii ve ember, ve va a ki, ve va haa shin akwati la, zan zan ve na ve bee cii.

¹¹Tsô hanma shighe u Mbalevi vea va a akwati la hen mbatomov mba tor, man vea nenge inyaregh kia lu kpishi yô, orngeren u tor man or u eren tom hen pristi u tamen la, ve va kura kwagh u kimi, shi ve hire a mi hen ijiir na. Kape ve eren ayange ayange la; nahan ve kohol inyaregh kpishi.

¹²Tsô tor vea Yehoyada ve gema ki ve na mbaerentom u iyou i TER; nahan ve ker ior mba maan kwagh man mba gban akaa er, ve̱ sôr iyou i TER sha inyar, man shi mbavaren iyôv mbi iliv man mbi togula kpaa er, ve̱ sôr iyou i TER.

¹³Tsô mbatomov er tom, tom la kpaa za hemen doo doo sha ikev ve; ve sôr iyou i TER la her, hingir dedoo.

¹⁴Zum u ve bee cii yô, ve va a inyaregh ki ki neer la sha ishigh ki tor vea Yehoyada; ka sha ki man i er ikav mbi tomov sha ci u iyou i TER ye, ka ikav mbi eren tom a mi man mbi nan nagh a mi, man ugbande mba nanden nagh a mi man ikav mbi sha zenaria kua azurfa. Ve naan iniav mbi nanden ken iyou i TER gbem sha ayange a Yehoyada la cii.

¹⁵Kpa Yehoyada hingir or u been iyol, anyom a na ngee, nahan a kpe; anyom a na lu deri man ikundugber zum u a kpe la.

¹⁶Tsô ve ii un ken gar u Davidi a utor imôngo, gadia a er tom u dedoo ken Iserael sha ci u Aôndo kua iyou Na kpaa.

¹⁷Er Yehoyada kpe kera yô, atiator a Yuda va gure civir tor. Tor kpaa ver ato hen ve.

¹⁸Nahan ve undu iyou i TER, Aôndo u uter vev, ve gba civir Asherim man ieev; tsô iyugh sen sha Yuda man Yerusalem sha ci u ibo ve ne.

¹⁹Nahan kpaa, A tindi uprofeti hen a ve er ve̱ hide a ve hen TER; ve wa ve kwagh, kpa ve ver ato ga.

²⁰Tsô Jijingi u TER va sha Sekaria, wan u pristi Yehoyada; a tile sha ishigh ki ior, a kaa a ve er: Aôndo ngu kaan nahan er: Ka nyi ne peren atindi a TER, ne kera soo u zuan a mkpeyol ga nahana? Er ne undu TER yô, Un kpaa A undu ne ve.

²¹Tsô ve zua zwa sha a na, ve ta un awen sha imo i tor ken tembe u iyou i TER.

²²Kape tor Yoashi kera umbur kwagh u dedoo u Yehoyada ter u Sekaria er un, ga la, a gema a wua wan na je. Ngur nôngon ku yô, a kaa er: TER A̱ nenge, A̱ or iyev!

²³Tsô er inyom kar i môm yô, ikumutya i Mbashiria va nôngo ityav a na; ve va hen Yuda man Yerusalem, ve wua atiator a ior kera cii, ve tindi ishar i ve ya la cii hen tor u Damaseku.

²⁴Shin er ikumutya i Mbashiria va a ior kpuaa tsô, nahan kpaa, TER na zegeikumutya sha ikev ve, gadia ve undu TER, Aôndo u uter vev. Kape ve kure Yoashi ijir la.

²⁵Zum u ve undu un la (gadia ve undu un a angev mbu nyoon tsung), mbatomov nav zua zwa sha a na, sha ci u ike i awambe a wan u pristi Yehoyada, ve wua un sha gambe na, a kpe; ve ii un ken gar u Davidi, kpa ve ii un ken iwar i utor ga.

²⁶Mba ve zua zwa sha a na yô, lu Sabadi wan u Shimeati wankwase u Mbaamon, man Yehoshabadi wan u Shimeati wankwase u Mbamoabi.

²⁷Kwagh u ônov nav mba nomso, man akaaôron a Aôndo a i ôr sha a na la man kwagh u iyou i sôron i Aôndo la, nenge, i nger ve ken Mpase u ruamabera u utor. Tsô wan na Amashia tema tor sha ityough nagh.