Read tiv 2 Kroniku 28 Bible Online

2 Kroniku 28 - tiv bible

2 Kroniku 28

¹Ahashi lu anyom ikundu zum u a ya tor la; a tema tor ken Yerusalem anyom pue kar ataratar; a eren kwagh u dedoo sha ishigh ki TER, er ter na Davidi nahan ga;

²kpa a zaan sha igbenda i utor mba Iserael je, a ker ieev sha ci u Ubaal.

³Man shi a nande kwaghhumandoon shin pev u wan u Hinom, a nande ônov nav sha usu sha aeren a hôngorough a atôatyev, a TER lu zenda a sha ishigh ki Mbaiserael kera la.

⁴A naan nagh, shi a nanden kwaghhumandoon sha ajiir a taven sha man sha iwo kua shin hanma itinekon i lun a mure.

⁵Ka nahan man TER, Aôndo na, na un sha ikev i tor u Shiria ye, ve ve hemba un, ve kôr ior nav kpishi, ve yem a mi hen Damaseku. Shi i na un sha ikev i tor u Iserael kpaa, a hemba un, a wua un ior kpishi.

⁶Gadia Peka wan u Remalia wua ior dubu deri, dubu kar ikundu, ken Yuda, sha iyange i môm, ve cii ve lu anomaior a ageegh je; gadia ve undu TER, Aôndo u uter vev.

⁷Shikeri nomor u ageegh u Eferaim wua Maaseia wan u tor, kua Aserikam or u nengen sha ya u tor, kua Elkana mue u tor kpaa.

⁸Tsô Mbaiserael kura anmgbianev vev dubu deri uhar, lu kasev man ônov mba nomso man mba kasev, ve yem a ve uikangen, shi ve kura ishar kpishi kpaa her a ve, ve va a i hen Samaria.

⁹Kpa profeti u TER lu her, iti na er Odedi; a due a za kegh ikumutya i i lu hiden hen Samaria la gbenda, a kaa a ve er: Nenge nen, er TER, Aôndo u uter enev, A yugh a Yuda yô, A na ve sha ikev yen, ne wua ve sha iyugh i i ar Sha je yô.

¹⁰Hegen yô, ne ver ishima ner, né kighir ônov mba Yuda man Yerusalem ve̱ hingir ne ikpan i nomso man i ukase; nahan ne yô, ne mba a ma ibo hen TER, Aôndo wen, ga zee?

¹¹Yô, ungwam nen, na nen mbakwarev mba ne ker hen anmgbianev enev la gbenda; gadia iyugh i TER i vihin tsung ngi sha a ven.

¹²Tsô mbatamen mbagenev ken Mbaeferaim, lu: Asaria wan u Yohanan man Berekia wan u Meshilemoti man Yehisekia wan u Shalum, kua Amasa wan u Hadelai, ve hendan a mba ve hide ken utya la,

¹³ve kaa a ve er: Né nyôr a mbakwarev mban heen ga; gadia ne ver ishima u seer asorabo ase kua ibo yase sha u se̱ hingir mbabov sha ishigh ki TER; gadia ibo yase vese man iyugh i tsung kpaa ngi sha Iserael.

¹⁴Tsô mbautyav undu mbakwarev mbala kua ishar sha ikev i atiator kua ior cii.

¹⁵Nahan ior mba i ter ati a ve la mough, ve kua a mbakwarev mbala, ve pande ishar la, ve haa mba ve lu idyelegh la akondo, ve na ve akondo, ve wa ve akôv shin angahar, ve na ve kwaghyan man kwaghman, ve shighe ve mkurem, ve penda mba ve vôr la cii sha ujaki, ve hide a ve ken Yeriko, gar u avilegh, hen anmgbianev vev; tsô ve hide hen Samaria.

¹⁶Hen shighe la tor Ahashi tindi loho hen utor mba Ashiria er ve̱ va wase un;

¹⁷gadia Mbaedom shi va, va hemba Yuda, ve kôr mbagenev ve yem a mi uikangen.

¹⁸Mbafiliti kpaa va nôngo ityav a agar a shin pev man a ken tar u Imbusutariyan u Yuda la, ve ngohol Bete-shemeshi man Aiyalon man Gederoti man Soko kua agar a ve, man Timna a agar a na, man Gimso a agar a na; maa ve tema her je.

¹⁹Gadia TER hide a Mbayuda ijime sha ci u Ahashi tor u Iserael; gadia a kôr iyol na tsaha ken Yuda ga, shi a per atindi a TER kpishi kpaa.

²⁰Tsô Tilgati-pilneser tor u Ashiria va her a na, kpa a va za un iyol tseegh, wase un ga;

²¹gadia Ahashi kura inyaregh ken iyou i TER man ken iyou i tor kua ken iyou i atiator kpaa, a na tor u Ashiria; kpa kwagh la wase un ga.

²²Zum u ican tser un la, a seer peren atindi a TER, un tor Ahashi shon la;

²³gadia a na mbaaôndo mba Damaseku nagh, mba ve hemba un la; a kaa er: Er mbaaôndo mba utor mba Shiria ve wese ve yô, nahan mo kpaa, me na ve nagh, ve̱ wasem. Kpa ve gema ve hingir ityôkwagh i timin un kua Iserael cii.

²⁴Tsô Ahashi kohol ikav mbi ken iyou i TER Aôndo, a hembe ikav mbi iyou i Aôndo, a wuhe ihinda i iyou i TER; a er atse hen hanma zongough ken Yerusalem.

²⁵Ken hanma gar u Yuda kpaa, a er ajiir a taven sha, sha ci u nanden mbaaôndo mbagenev kwaghhumandoon; a bam TER, Aôndo u uter nav.

²⁶Aerenakaa a na agen man akaa a na cii, a hiihii man a masetyô, nenge, i nger a ken ruamabera u utor mba Yuda man mba Iserael.

²⁷Tsô Ahashi yav a uter nav imôngo, ve ii un ken gar, ka ken Yerusalem je la, gadia ve va a na ken iwar i utor mba Iserael ga; wan na Hesekia gema tema tor sha ityough nagh.