Read tiv 2 Kroniku 29 Bible Online

2 Kroniku 29 - tiv bible

2 Kroniku 29

¹Hesekia ya tor zum u a lu anyom ikundu kar ataan la; man a tema tor ken Yerusalem anyom ikundu kar ataankaranyiin; iti i ngô na er Abiya wan u Sekaria.

²A eren kwagh u dedoo sha ishigh ki TER, er ter na Davidi lu eren nahan.

³Sha inyom i hiihii i a tema tor, sha uwer u hiihii la je, a bugh ihinda i iyou i TER, a sôr i.

⁴A nyôr a upristi man Mbalevi, a kohol ve hen tembe u u lu vegher u sha ityoughkitaregh la,

⁵a kaa a ve er: Ungwam nen, ne Mbalevi! Yô, wanger nen ayol a en, shi wanger nen iyou i TER, Aôndo u uter enev kpaa, kura nen hôngor ken icighanjiir kera.

⁶Gadia uter asev per atindi, ve er aferakaa sha ishigh ki TER, Aôndo wase, ve ta Un kera, ve gema ishiv vev hen ijiir i TER teman la kera, ve na ajime her.

⁷Man shi ve wuhe ihinda i puadwer, ve pir amenger, ve kera nande kwaghhumandoon ga, ve kera nyôr a nagh ku nanden ken icighanjiir u Aôndo u Iserael ga.

⁸Ka nahan man iyugh i TER va sha Yuda kua Yerusalem, A gema ve, ve hingir kwagh u tan mke iyol, man kwagh u cieryol, man kwagh u lahan kpaa, er ne nenge sha ashe a en nahan.

⁹Gadia, nenge, i wua uter asev sha sanker, ônov asev mba nomso man mba kasev kua kasev asev kpaa mba uikangen sha ci u kwagh ne.

¹⁰Hegen yô, sarem ken ishima u yan ikur a TER, Aôndo u Iserael, sha u A̱ hide a iyugh Na i vihin yum ne sha a vese kera.

¹¹Ônov av, de kera hunden nen ishima sha kwagh ne ga; gadia TER tsuwa ne er ne̱ tile sha ishigh Nagh, ne̱ er Un tom kpaa, ne̱ hingir mbatomov Nav, ne̱ nanden kwaghhumandoon kpaa.

¹²Tsô Mbalevi mough, Mahati wan u Amasi, man Yoel wan u Asaria, mba ken ônov mba Kohati man ken ônov mba Merari yô, lu: Kishi wan u Abedi, man Asaria wan u Yehalelel; man ken mba Gershon yô, lu; Yoa wan u Shima, man Eden wan u Yoa;

¹³ken ônov mba Elisafan yô, lu: Shimeri man Yeuel; man ken ônov mba Asav yô, lu: Sekaria man Matania;

¹⁴man ken ônov mba Heman yô, lu: Yehuel man Shimei; man ken ônov mba Yedutun yô, lu: Shemaia man Ushiel.

¹⁵Ve kohol anmgbianev vev, ve wanger ayol a ve, tsô ve nyôr, sha mkaa u tor kaa sha imo i TER la, sha u vea wanger iyou i TER yô.

¹⁶Upristi kpaa ve nyôr ken atô u iyou i TER, sha u wanger i, ve kura ihôghonov mbi ve zua a mi ken tempel u TER cii, ve va a mi hen tembeyough u TER; nahan Mbalevi tôô mbi sha u vea za a mi ken won shin uwagh u Kideron.

¹⁷Sha uwer u hiihii iyange i u i hiihii la, ve hii u wanger akaa, ayange a u anigheni la ve ar hen puadwer u TER, shi ayange anigheni ve lu eren tom u wanger iyou i TER; sha uwer u hiihii ayange a u pue kar ataratar la, ve kure.

¹⁸Tsô ve va nyôr hen tor Hesekia, ve kaa er: Se wanger iyou i TER cii, kua atse a nan nagh ku nanden sha mi a ikav mbi a cii, man tebul u ubredi mba sha ishi a ikav nav cii kpaa.

¹⁹Man shi ikav mbi tor Ahashi lu haa kera la cii, sha iyange i a tema tor, zum u a er kwaghbo la, se sôr mbi, shi se wanger mbi kpaa; nenge, mbi sha ishigh ki atse a TER a nanden nagh sha mi la.

²⁰Tsô tor Hesekia mough pepe, kohol mbatamen mba hen gar, a kôndo sha iyou i TER.

²¹Ve va a nagh ku isholibo sha anomabua ataankarahar, man anomaiyôngo ataankarahar, man agumaiyôngo ataankarahar, kua ukpev utaankaruhar kpaa, sha ci u tor man icighanjiir kua Yuda kpaa. Shi a kaa upristi ônov mba Aron er, ve̱ na ku sha atse a TER a nanden nagh sha mi la.

²²Tsô ve sôngo anomabua; upristi ngohol awambe la, ve tsenda sha atse; ve sôngo anomaiyôngo la kpaa, ve tsenda awambe sha atse; shi ve sôngo agumaiyôngo la kpaa, ve tsenda awambe sha atse.

²³Ve kporom a ukpev sha ci u nagh ku isholibo sha ishigh ki tor man ki mkohol u ior; ve penda ve ave sha ityou;

²⁴tsô upristi sôngo ve, ve na nagh ku isholibo sha awambe a ve sha atse, sha u wamen sha ci u Iserael cii; gadia tor kaa er, i̱ na nagh ku nanden man nagh ku isholibo sha ci u Iserael cii.

²⁵A ver Mbalevi ken iyou i TER a ukwen man mbaadiguve kua umolo sha imo i Davidi man i Gadi ornengenakaa u tor la, man i profeti Natan kpaa; gadia imo la due hen TER je, va hen uprofeti Nav ye.

²⁶Tsô Mbalevi za tile a ityougholov mbi Davidi, upristi di lu a ikor i tôngon.

²⁷Nahan Hesekia na zwa er i̱ na nagh ku nanden sha atse. Mba ngur nan nagh ku nanden yô, i hii icam i wuese TER kua ikor i tôngon kpaa, a ityogholov mbi Davidi tor u Iserael la imôngo.

²⁸Tsô mkohol u ior cii gure civir, i wa atsam, i tôngo ikor, zan zan i kar kuren nagh ku nanden kura.

²⁹Zum u ve kure tom u nan nagh yô, tor kua mba ve lu a na imôngo cii, ve gure ve wa ityough inya.

³⁰Tsô tor Hesekia kua atiator, ve kaa Mbalevi er, ve̱ wa icam i wuese TER, sha kwaghôron u Davidi man u Asav ornengenakaa. Nahan ve wa icam, i wuese a iember, ve gure ve wa ityough inya.

³¹Tsô Hesekia gema kaa er: Hegen yô, ne tsegha ayol a en hen TER ve, yô, kporom nen, va nen a iniav mbi sôngon man iniav mbi iwuese ken iyou i TER. Tsô mkohol u ior va a iniav mbi sôngon man iniav mbi iwuese; mba ve lu a ishima i gbar gbar cii, ve va a iniav mbi nanden.

³²Iyenge i iniav mbi nanden mbi mkohol u ior va a mi la yô, lu: anomabua akunduatargber, anomaiyôngo deri, man agumaiyôngo deri uhar; angan cii lu sha ci u nagh ku nanden TER.

³³Uicighanmbaiwuav lu: abua deri ataratar, man iyôngo dubu utar.

³⁴Kpa upristi ngee kuma ga, ve fatyô u burun iniav mbi nanden cii ga, nahan anmgbianev vev Mbalevi wase ve zan zan shighe u tom la kar been, man zan zan upristi ve wanger ayol a ve la; gadia Mbalevi hemba upristi ishima i veren sha u wanger ayol a ve.

³⁵Iniav mbi nanden kpaa lu kpishi, a ahôm a iniav mbi bem, kua iniav mbi man sha ci u nagh ku nanden kpaa. Kape i sôr tom u iyou i TER la.

³⁶Hesekia kpaa ember a ior cii, sha ci u kwagh u Aôndo A er sha ci u ior yô; gadia i er kwagh la fefa je.