Read tiv 2 Kroniku 6 Bible Online

2 Kroniku 6 - tiv bible

2 Kroniku 6

¹Tsô Solomon ôr kwagh, a kaa er: TER kaa er, ka Un pe teman ken angôghime.

²Kpa mo m maa U iyou i teman ker, ijiir i Ú teman ker gbem yô.

³Nahan tor gema ishigh, ver mkohol u Iserael cii doo doo; mkohol u Iserael cii tile sha.

⁴A kaa er: I̱ wuese TER, Aôndo u Iserael, u A ôr kwagh a terem Davidi sha zwa Na, man A kure un sha ave Na je, A kaa er:

⁵Hii sha iyange i M due a ior Av ken tar u Igipiti la je, M tsuwa ma gar ken ikwe i Iserael u Me maa iyou ker Mer iti Yam i̱ lu ker ga, man M tsuwa ma or u nana lu ityoor u ior Av Iserael kpaa ga;

⁶kpa M tsuwa Yerusalem Mer iti Yam i̱ lu ker; shi M tsuwa Davidi Mer a̱ tema tor sha ior Av Iserael.

⁷Terem Davidi lu veren ishima er una maa iyou sha ci u iti i TER, Aôndo u Iserael.

⁸Kpa TER kaa a terem Davidi er: Er u ver ishima u maan iyou sha ci u iti Yam yô, u er doo, er u ver ishima nahan yô.

⁹Nahan kpaa ka we ú maa iyou la ga; kpa ka wan wou u u mar iyol you je, ka un una maa iyou la sha ci u iti Yam ye.

¹⁰TER kpaa A er vough sha kwaghôron Na u A ôr la; gadia mo m va tile sha ityough ki terem Davidi, man m tema sha ikônough ki torough ki Iserael, er TER lu tôndo zwa yô, man m maa iyou la sha ci u iti i TER, Aôndo u Iserael.

¹¹Ka her kpaa m ver areki u ikuryan i TER i lu ker, i A ye a ônov mba Iserael la ye.

¹²Tsô a za tile sha ishigh ki atse a TER a nanden nagh sha mi, sha ishigh ki mkohol u Iserael cii, a naregh ave sha;

¹³gadia Solomon vande eren daa u togula, iniembe na lu aseva ataan, igbanger na kpaa aseva ataan, ityaven na aseva atar, a ver un her atô tembe, a tile sha mi a gure inya sha ishigh ki mkohol u Iserael cii a kende ave Sha,

¹⁴a kaa er: TERE, Aôndo u Iserael, ma Aôndo ugen ngu er We nahan ga, Sha kpaa ga, shin tar kpaa ga, We u U we iko sha ikuryan man U ver ishima sha erdoo a mbayev Ou mba ve zenden sha ishigh You a ishima i môm yô;

¹⁵We u U kur kwagh u U tôndo zwa a wanakiriki Wou terem Davidi la; mimi je, U or kwagh sha zwa Wou, shi U kure un sha uwegh Ough, er i lu nyian nahan.

¹⁶Yô TERE, Aôndo u Iserael wa iko sha kwagh u lu U tôndo zwa a wanakiriki Wou terem Davidi la, er U kaa wer: Ú ban a or sha ishigh Yagh, u nana tema sha ikônough ki torough ki Iserael ga, aluer ônov ou vea ver ishima sha gbenda ve, vea zenden sha atindiakaa Am, er we u lu zenden sha ishigh Yagh nahan yô.

¹⁷Yô, TERE, Aôndo u Iserael, kwaghôron Wou u U ôr a wanakiriki Wou Davidi la, a kure sha mi vough.

¹⁸Aôndo Una tema shin tar a ior imôngo mimi jee? Nenge, Sha man Sha u a hembe gban ca la je kpaa, fatyô u ngohol We ga; man hire iyou i m maa ne!

¹⁹Nahan kpaa wa iko sha msen u wanakiriki Wou, man zamber na, TERE, Aôndo wam, ver ato sha imo i wanakiriki Wou man msen u a sen sha ishigh You ne kpaa.

²⁰Ashe a Ou a̱ nengen sha iyou ne, tetan man tugh kpaa, ka ijiir i U kaa Wer, Ú ver iti You ker; sha u Ú ver ato sha msen u wanakiriki Wou una sôn, zum u una ver ishigh hen ijiir ne yô,

²¹man shi ver ato ungwa zamber u wanakiriki Wou, man u ior Ou Iserael, zum u vea eren msen vea veren ishigh hen ijiir ne yô; een, ungwa Sha, sha ijiir You i teman la, man zum u Ú ungwa yô, de se asorabo ase.

²²Aluer or nana er or u nan we ndor a nan kwaghbo, man i ver nan mbum er nana̱ bum, man nana va bum sha ishigh ki atse Ou a nanden nagh sha mi, ken iyou ne yô,

²³ungwa Sha, er sha mi, ôr ijir i mbayev Ou, or iferor iyev, hire nan a ieren i nan sha ityough ki nan, man gema na ormimi ishô, er a nan sha mimi u nan la.

²⁴Man aluer mbaihomov vea hemba ior Ou Iserael sha ci u isholibo i ve er U yô, man shi vea gema ishima vea pase iti You, vea er msen vea zamber sha ishigh You ken iyou ne yô,

²⁵ungwa Sha, de ior Ou Iserael isholibo ve shi hire a ve ken tar u U ne ve a uter vev ne.

²⁶Zum u á cir Sha man ura kera nôô ga, sha ci u ve er U isholibo yô, man vea er msen vea ver ishigh hen ijiir ne, vea pase iti You, vea gema ishima sha u den isholibo ve, sha ci u mtsaha u U tsaha ve yô,

²⁷ungwa Sha, de isholibo i mbayev Ou kua i ior Ou Iserael kpaa, gadia U tese ve gbenda u doon u vea zenden sha mi yô; yô, nôô ura sha tar Wou, u U ne ior Ou dyako la.

²⁸Man aluer ijen ia gba sha tar, shin aluer bouange una za va, shin aluer alakema una gba akpor shin mningem, shin ikomon ia za va, shin igyer, shin aluer mbaihomov vev vea va kase ve ken agar a ken tar ve, shin a lu hanma kwagh u bo shin hanma inja i uange ia lu kpaa;

²⁹hanma msen man zamber u hanma or, shin u ior Ou Iserael cii, aluer hanma or nana fa mvihi u nan, man ican i nan, man nana naregh ave sha iyou ne yô,

³⁰ungwa Sha, sha ijiir You i teman la, de nan isholibo i nan, na hanma or sha ieren i nan cii, er U fe ishima i nan yô (gadia ka We tseegh U fe asema a ônov mba iorov ye),

³¹sha u ve̱ cia U, ve̱ zenden sha igbenda You, sha ayange a uma ve cii, ken tar u U ne uter asev ne.

³²Man shin or u ken nongo ugen u nan lu or u ior Ou Iserael ga yô, u nan dugh ken tar u icaa sha ci u nan ongo gwa u iti You man uwegh Ough ku ageegh kua uwegh Ough ku naregh yô, zum u vea va er msen vea ver ishigh hen iyou ne yô,

³³ungwa Sha, hen ijiir You i teman, er akaa a orvanava la nan sen U cii, sha u akuraior sha won cii a̱ fa iti You, man a̱ cia U, er ior Ou Iserael nahan, man shi a̱ fa er iyou ingin i m maa i ne, ka iti You i yer i min ye.

³⁴Aluer ior Ou vea za ityav hen mbaihomov vev, sha hanma gbenda u U tindi ve cii, man vea sôn U, vea ver ishigh hen gar u U tsough ne man iyou i m maa sha ci u iti You ne yô,

³⁵ungwa msen ve kua zamber ve Sha, suwe mimi ve.

³⁶Man aluer vea er U isholibo (gadia or u den eren isholibo nan ngu ga), man ishima ia lu vihin We a ve, Wea na ve sha ikev i mbaihomov vev, man vea yem a ve uikangen ken tar u icaa shin u ikua ikua,

³⁷kpa aluer vea za hen kwagh ken asema a ve ken tar u i za a ve uikangen la, man vea gema ishima vea zamber We ken tar u ve lu uikangen la, vea kaa er: Se er isholibo, se er kwaghbo se er ifer,

³⁸man aluer vea hide hen a We a ishima ve cii man uma ve cii, ken tar u ve lu uikangen, ka tar u mba ve yem a ve uikangen la, vea sôn vea ver ishigh vegher u ken tar ve, u U ne uter vev, man hen gar u U tsough, man hen iyou i m maa sha ci u iti You ne yô,

³⁹ungwa msen ve kua zamber ve Sha, hen ijiir You i teman la, suwe mimi ve, de ior Ou asorabo a ve er U la.

⁴⁰Aôndo wam, ashe Ou a̱ lu ivegher, ato Ou kpaa a̱ ver sha msen u i eren hen ijiir ne.

⁴¹Yô, TERE, Aôndo, mough va hen ijiir You i memen, We, kua areki u agee Ou; TERE, Aôndo, upristi Ou ve̱ haa myom iyol, uicighan Ou kpaa ve̱ ember kwagh u doon.

⁴²TERE, Aôndo, de gem ishigh ki or u U shigh nan mkurem la kera ga! Umbur aeren a dedoo a U er a wanakiriki Wou Davidi la.