Read tiv Esera 10 Bible Online

Esera 10 - tiv bible

Esera 10

¹Tsô er Esera lu eren msen, pasen kwaghbo, vaan, gbidyen iyol inya sha ishigh ki iyou i Aôndo yô, ikpelaior kpishi due ken Iserael, nomso man kasev kua mbayev, ve va kohol her a na, ve gba vaan tsung je.

²Nahan Shekania wan u Yehiel, u ken ônov mba Elam, gema kaa a Esera er: Se er Aôndo wase kwagh u bo, se er kasev ken atôatyev a tar ne; nahan kpaa ishima i veren keghen ngi her sha ci u Iserael sha kwagh ne.

³Yô, sé ya ikur a Aôndo wase, sé pav nen a kasev kua ônov mba i mar a ve cii, sha mhen u terem man u mba ve gbidi akarkase iyol sha tindi u Aôndo wase yô; kpa i̱ er kwagh ne sha tindi.

⁴Mough sha, gadia kwagh ne ka we ú er un ye, se kpaa se mba a we imôngo; taver ishima er un je.

⁵Tsô Esera mough, na upristi mba tamen man Mbalevi kua Iserael cii ve bum er vea er sha mkaanem man. Tsô ve bum.

⁶Nahan Esera mough sha ishigh ki iyou i Aôndo kar za nyôr ken iyou i Yehohanan wan u Eliashibi; er a nyôr her kpaa, a ya kwaghyan ga, a ma mngerem kpaa ga, gadia lu zungwen sha ci u kwaghbo u mbakwarev la.

⁷Tsô i yôô ken Yuda kua Yerusalem er mbakwarev mba ve hire la cii, ve̱ kohol ken Yerusalem;

⁸man hanma or u nana va ga, zan zan ayange á kar atar, sha mhen u atiator kua mbatamen yô, á ngohol nan akaa cii, man nan iyol i nan kpaa á dugh nan ken mkohol u mbakwarev kera.

⁹Tsô ior i Yuda kua i Benyamin cii, ve kohol ken Yerusalem er ayange atar la lu a kuma ga je yô; lu sha uwer u sha utaankarunyiin, ayange a u ikundu la; tsô ior cii tema sha tembe u sha ishigh ki iyou i Aôndo, ve lu gbidyen akarkase iyol sha ci u kwagh ne, man shi sha ci u ura u u lu nôôn kpishi la.

¹⁰Tsô pristi Esera mough tile sha, kaa a ve er: Ne er kwaghbo, ne er kasev ken atôatyev, sha u ne seer Iserael ibo.

¹¹Hegen yô, pase nen ase TER, Aôndo u uter enev, kwaghbo wen, er nen ishima Na; kem nen iyol a atôatyev a tar ne kua kasev mba atôatyev kpaa.

¹²Nahan mkohol u ior cii rumun sha imo i taver, ve kaa er: Er u kaa nahan, kape sé er je la.

¹³Kpa ior ngee kpishi, man shi ka shighe u ura kpaa, se fatyô u tilen ken won ga; man kwagh ne ka tom u iyange i môm shin ayange ahar tsô ga; gadia se er kwaghbo vese je, sha kwagh ne.

¹⁴Yô, atiator a ase a̱ tile sha ci u ior mbagenev cii, nahan mba ken agar ase cii, mba ve er kasev ken atôatyev la, ve̱ va sha shighe u á ver ve la, a mbatamen kua mbaajiriv mba ken hanma gar, a ve imôngo, i̱ tôô iyugh i vihin i Aôndo wase A yugh se sha ci u kwagh ne sha a vese kera.

¹⁵Ka Yonatan wan u Asahel kua Yaseia wan u Tikwa, ve tseegh ve hendan sha kwagh ne ye; Meshulam kua Orlevi Shabetai ta ken ve.

¹⁶Tsô ônov mba mbakwarev er nahan, ve ver pristi Esera kua mbavesen mbagenev mba sha uya mba uter, hanma or sha ya u ter u nan, ve cii i ter ve sha ati ati; ve tema sha uwer u sha pue, iyange i hiihii i uwer la, sha u timen sha kwagh ne.

¹⁷Sha uwer u hiihii, iyange i u i hiihii la, ve kure kwagh u ior mba ve er kasev ken atôatyev la cii.

¹⁸Ken ônov mba upristi kpaa, i zua a mbagenev mba ve er kasev ken atôatyev yô. Ken ônov mba Yeshua wan u Yosadaki man angbianev nav yô, lu: Maaseia man Elieser man Yaribi kua Gedalia.

¹⁹Ve zua zwa er vea pav a kasev vev, man vea na nagh ku iboogh sha nomiyôngo môm sha ci u ibo ve.

²⁰Man ken ônov mba Imer yô, lu: Hanania kua Sebadia.

²¹Ken ônov mba Harim yô, lu: Maaseia man Eliya man Shemaia man Yehiel kua Ushia.

²²Man ken ônov mba Pashur yô, lu: Elioenai, Maaseia, Ishemael, Netanel, Yosabadi kua Elasa.

²³Ken Mbalevi yô, lu: Yosabadi man Shimei man Kelaia (ka Kelita je la) man Petahia man Yuda kua Elieser.

²⁴Ken mbawanatsam yô, lu: Eliashibi. Ken mbakuranihinda yô, lu: Shalum man Telem kua Uri.

²⁵Ken Iserael, ken ônov mba Paroshi yô, lu: Ramia man Ishia man Malkiya man Miyamin man Eleasar man Malkiya kua Benaia.

²⁶Ken ônov mba Elam yô, lu: Matania man Sekaria man Yehiel man Abedi man Yeremoti kua Eliya.

²⁷Ken ônov mba Satu yô, lu: Elioenai man Eliashibi man Matania man Yeremoti man Sabadi kua Ashisa.

²⁸Ken ônov mba Bebai yô, lu: Yehohanan man Hanania, Sabai kua Atelai.

²⁹Ken ônov mba Bani yô, lu: Meshulam man Maluki man Adaia, Yashubi man Sheal man Yeremoti.

³⁰Ken ônov mba Pahati-moabi yô, lu: Adena man Kelal, Benaia, Maaseia, Matania, Besalel man Binui kua Manase.

³¹Ken ônov mba Harim yô, lu: Elieser, Ishiya, Malkiya, Shemaia, Shimeon,

³²Benyamin, Maluki man Shemaria.

³³Ken ônov mba Hashim yô, lu: Matenai, Matata, Sabadi, Elifeleti, Yeremai, Manase man Shimei.

³⁴Ken ônov mba Bani yô, lu: Maadai, Amram, Uel,

³⁵Benaia, Bedeia, Keluhi,

³⁶Vania, Meremoti, Eliashibi,

³⁷Matania, Matenai, Yaasu,

³⁸Bani, Binui, Shimei,

³⁹Shelemia, Natan, Adaia,

⁴⁰Makenadebai, Shashai, Sharai,

⁴¹Asarel, Shelemia, Shemaria,

⁴²Shalum, Amaria man Yosev.

⁴³Ken ônov mba Nebo yô, lu: Yeiel, Matitia, Sabadi, Sebina, Yadai, Yoel man Benaia.

⁴⁴Mban cii ve er kasev ken atôatyev; kasev mbagenev ken ve mar ônov je.