Read tiv Esera 6 Bible Online

Esera 6 - tiv bible

Esera 6

¹Tsô tor Dariu kaa, nahan i ker ken iyou i koson uruamabera henpe i koson ikav mbi injaav ken Babilon la.

²Nahan i zua a ihurentakerada hen Akemeta, ken iyou i tor, i ken tar u Media la, i nger sha mi nahan: Kwagh u umbur:

³Sha inyom i hiihii i tor Shirushi la, tor Shirushi kaa er: Sha kwagh u iyou i Aôndo i ken Yerusalem la, i̱ shi i̱ maa iyou la her, ka ijiir i nan nagh her je la, i̱ tim imagh ki i ki̱ taver; ityaven i i, i̱ lu aseva akunduatar, igbanger i i kpaa aseva akunduatar,

⁴sha uzegembaawenev iniongo itiar man ikpande i he, nongo môm; inyaregh ki á vihi yô, á dugh ki ken iyounyar i tor;

⁵ikav mbi zenaria man mbi azurfa mbi ken iyou i Aôndo mbi Nebukadinesar lu kura ken tempel u a lu ken Yerusalem, va mi ken Babilon la kpaa, i̱ hide a mi, shi i̱ za ver mbi ken tempel u ken Yerusalem la, hanmôgh sha ijiir i ki; ú ver mbi ken iyou i Aôndo.

⁶Nahan yô, we, Tatenai, gomna u yande Ifi man Shetar-bosenai kua nongo wen, ugomna mba ve lu yande Ifi la, kar nen hen ijiir la kera, yem nen ca;

⁷tsuwa nen ave sha kwagh u tom u iyou i Aôndo la kera; gomna u Mbayuda kua mbavesen mba Mbayuda ve̱ maa iyou i Aôndo la hen ijiir i i.

⁸Man shi m wa tindi sha kwagh u né er mbavesen mba Mbayuda mbala, sha u wasen ve u maan iyou i Aôndo la; ka ken inyaregh ki tor a zough a mi sha kpandegh ku yande Ifi la je, i̱ pande i̱ na ior mban inyaregh ki ve vihi la, doo doo ye, i̱ de timbir ga.

⁹Man kwagh u a gbe ve sha agumabua man anomaiyôngo man agumaiyôngo sha ci u iniav mbi nanden Aôndo u Sha, man alakema man bar man wain kua mkurem, sha imo i upristi mba ve lu ken Yerusalem la yô, i̱ naan ve ayange ayange i̱ de bundu ga,

¹⁰sha u ve̱ naan Aôndo u Sha iniav mbi human doon man ve̱ eren msen kpaa sha ci u uma u tor kua u ônov nav.

¹¹Shi m kaa mer, hanma or u nana er kposo sha kwaghôron ne yô, i̱ tsuwa hwange hen ya u nan, i̱ kende nan sha, i̱ mande nan sha u; shi á gema ya u nan á hingir tihi u uihôgh sha ci u kwagh ne;

¹²man Aôndo u A ne iti Na i tem hen ijiir la kpaa, A̱ nzughul a utor cii man akuraior, a vea za uwegh sha u geman kwagh ne kposo, er vea yôhôl iyou i Aôndo i i lu ken Yerusalem la yô. Mo Dariu m kaa nahan; yô, i̱ er nahan sha ishima i môm je.

¹³Tsô Tatenai, gomna u yande Ifi la, vea Shetar-bosenai, kua nongo ve, ve er kwagh u tor Dariu tindi loho sha mi la cii, sha gbashima je.

¹⁴Nahan mbavesen mba Mbayuda gba maan; kpe ve iyol, sha kwaghôron u profeti u Hagai man Sekaria wan u Ido ve ôr la; ve maa i, ve kure, sha imo i Aôndo u Iserael man sha imo i Shirushi man Dariu man Artashaseta tor u Pershia la.

¹⁵I kure iyou la sha uwer u Adar ayange a u atar, sha inyom i sha ataratar i mtemtor u Dariu la.

¹⁶Tsô ônov mba Iserael man upristi man Mbalevi kua ônov mba mbakwarev mbagenev ve er iniongo i mtsegh u iyou i Aôndo ne a iember.

¹⁷Sha mtsegh u iyou i Aôndo ne, ve na nagh sha abua deri, anomaiyôngo deri uhar man agumaiyôngo deri unyiin; man sha ci u nagh ku isholibo sha ci u Iserael cii yô, ukpev pue kar uhar, sha iyenge i ikwe i Iserael.

¹⁸Ve ver upristi sha iniongo ve, man Mbalevi kpaa sha ityom ve sha tom u Aôndo ken Yerusalem, er i nger ken ruamabera u Mose nahan.

¹⁹Ônov mba mbakwarev er Paseka sha uwer u hiihii ayange a u pue kar anyiin.

²⁰Gadia upristi man Mbalevi ve vande wanger ayol a ve ishima i môm; ve cii, ve lu wang. Nahan ve sôngo Paseka sha ci u ônov mba mbakwarev cii, man sha ci u anmgbianev vev upristi, kua sha ci u ve ayol a ve kpaa.

²¹Mbaiserael, mba ve hide ken kwar, ve ya un, kua hanma or u nan tsegh iyol i nan, nan kem iyol i nan sha hôngor u atôatyev a ken tar la yô, nan va kohol ve sha u keren TER, Aôndo u Iserael.

²²Ve er iniongo i bredi u i we kwa sha mi ga yô, ayange ataankarahar cii, a iember; gadia TER na ve, ve lu saan saan, man A gema ishima i tor u Ashiria hen ve, er a̱ taver ve ave sha tom u iyou i Aôndo, Aôndo u Iserael.