Read tiv Nehemia 1 Bible Online

Nehemia 1 - tiv bible

Nehemia 1

¹Kwagh u Nehemia wan u Hakalia. Tsô sha uwer u Kiselev sha inyom i sha ikundu la, er m lu ken Shushan gar u tor yô,

²anngôm ugen Hanania, za va, un a ior mbagenev mba ken Yuda; tsô, m pine ve kwagh u Mbayuda mba ve dugh ken kwar la, kua kwagh u Yerusalem kpaa.

³Ve kaam er: Asande a a shi her a a dugh ken kwar a a lu ken ipaventar la nga ken zegecan kua ilyahan kpishi kpaa; gilgar u Yerusalem yôhôl, ucivir nav kpaa usu hia ve.

⁴Tsô er m ungwa akaaôron ne yô, m shar inya, m gba vaan, m ure ayange kar je; m hôr kwaghyan, m sôn sha ishigh ki Aôndo u Sha,

⁵m kaa mer: TERE, Aôndo u Sha, Aôndo u hemban, u cier iyol, u wan ikuryan iko man erdoo a mba A doo ve ishima man ve we atindi Na iko yô.

⁶Shi kegh ato, ashe Ou kpaa a̱ lu ivegher, ungwa msen u wanakiriki Wou, u m sen U nyian ne, atetan man tugh, sha ci u mbayev Ou Mbaiserael, er m lu pasen akaabo a Mbaiserael, a se er U yô; mo a ya u terem kpaa, se er U kwaghbo.

⁷Se er U kwagh u vihin kpishi, atindi man akaawan kua ajiraôron, a U we wanakiriki Wou Mose la, se wa a iko ga.

⁸Yô, shi umbur kwaghôron u U ôr a Mose wanakiriki Wou la, U kaa Wer: Aluer ne er kwaghbo yô, Me sambe ne ken atôatyev;

⁹kpa aluer shi ne gema her a Mo, ne wa atindi a Am iko, ne eren sha a kpaa yô, shin ior ou mba i tsende ve kera la, vea lu sha ikighir i Sha je kpaa, nahan kpaa Me za kohol ve her, Me hide a ve ken ijiir i M tsough Mer iti Yam i̱ lu her la.

¹⁰Yô, mban ka mbayev Ou man ior Ou mba U paa ve sha agee a Ou a hemban man uwegh Ough ku taver kpaa yô.

¹¹Tere, shi kegh ato sha msen u wanakiriki Wou man msen u mbayev Ou, mba i lu ve ka cian iti You yô; shi na wanakiriki Wou ikôr-laghen nyian, man na i̱ doo or ne a na. Mo yô, m lu or u nan tor kwaghman.