Read tiv Eseter 2 Bible Online

Eseter 2 - tiv bible

Eseter 2

¹Ken masejime u akaa ne, er ishimanyoon i tor Ahasueru la pever yô, a umbur Vaseti kua kwagh u a er, man ijir i i ôr un la kpaa.

²Nahan mbayev mba tor, mba ve eren un tom la, kaa er: I̱ ker tor anuunaukase a doon ashe;

³shi tor a̱ ver mbatomov sha uipaven mba tartor na cii, ve̱ kohol anuunaukase a doon ashe cii, i̱ va a ve hen garutya u Shushan, ken ya u ukase, yô i̱ wa ve sha ikev i Hegai or u a eren tom ken iyou i tor a kor kasev la; i̱ na ve akaa a ishin iyol;

⁴yô, iniunkwase i ia doo tor la, ia hingir pendatyo u tor sha ityough ki Vaseti. Nahan kwaghôron la doo tor, maa a er nahan je.

⁵Oryuda ugen lu ken garutya u Shushan, iti na er Mordekai wan u Yair, wan u Shimei, wan u Kishi, Orbenyamin,

⁶u i due a na ken Yerusalem a mbakwarev mba i kura ve i yem a ve a Yekonia tor u Yuda imôngo la, mba Nebukadinesar tor u Babilon lu kura ve yem a ve la.

⁷A koso Hadasa, ka Eseter je la, lu wan u anngô u ter na, gadia a lu a ter shin ngô kpaa ga; wankwase la kuma ashe, dooashe kpaa; er ter na man ngô na ve kpe yô, Mordekai tôô un hingir wan na.

⁸Tsô zum u i ungwa ikaan i tor man tindi na kpaa yô, i kohol ônkasev kpishi ken garutya u Shushan sha ikev i Hegai; nahan Eseter kpaa i za a na ken ya u tor za lu sha ikev i Hegai or u kuran kasev la.

⁹Iniunkwase la doo un, a er a na doo doo, nahan a na un akaa a ishin iyol fese je, man akaayan a doon, kua anuunaukase ataankarahar, a i tsuwa a tsuwa a ken ya u tor sha ci na; tsô a tôô un a mbayev nav mba kasev mbala a za a ven ken ijiir i hemban doon ken ya u ukase la.

¹⁰Eseter pase nongo na shin tsombor na kpaa ga, gadia Mordekai ta un icin er a̱ de pasen ga.

¹¹Hanma iyange kpaa Mordekai a due a tera hen tembe u iyou i ukase, sha u una fa er Eseter a lu yô, man er kwagh na una za yô.

¹²Er shighe u hanma iniunkwase kuma u ia nyôr hen tor Ahasueru er i vande eren a i sha tindi u ukase la, iwer pue kar ihiar yô, gadia kape ayange ve a sôron iyol kighir la: iwer ataratar lu sha mkurem ma mire, man iwer ataratar lu sha akaahumandoon kua akaa agen a ishin iyol, a ukase;

¹³zum u a kuma u iniunkwase ia za hen tor yô, hanma kwagh u a sar i u tôôn hen ya u ukase zan a mi hen iyou i tor yô, i na i.

¹⁴Iyange ia been yô, i nyôr, pepe yô, i hide i za hen iyou i ukase i sha uhar sha ikev i Shaashigashi or u a eren tom ken iyou i tor a kuran kasev mba sha uika yô; nan kera hide hen tor ga, saa u nan doo tor ishima man á yila nan sha iti i nan ye.

¹⁵Zum u shighe u Eseter wan u Abihail, anngô u ter u Mordekai u a tôô un a hingir wan na la, kuma u una nyôr hen tor yô, a ker ma kwagh ga saa kwagh u Hegai or u a eren tom ken iyou i tor a kor kasev la, vande veren yô. Eseter kuman mba ve nenge a na cii ishima.

¹⁶Nahan i nyôr a Eseter hen tor Ahasueru ken iyou i tor sha uwer u sha pue, ka uwer u Tebeti je la, sha inyom i sha utaankaruhar i tor na.

¹⁷Eseter doo tor ishima hemba kasev mbala cii, doo un a na, a kuma un ishima hemba anuunaukase agen la cii; nahan maa a cir un idyer i tor sha ityou, a ver un pendatyo sha ityough ki Vaseti.

¹⁸Tsô tor er atiator a na zegeiniongo kua mbatomov nav cii, ka iniongo i Eseter je la; a na uipaven iyange i memen, shi a na iwua sha inja i tor.

¹⁹Zum u shi i kohol anuunaukase la yô, Mordekai tema lu hen hunda u tor.

²⁰Yô, Eseter lu a pase tsombor na shin ior nav kpaa ga, er Mordekai ta un icin nahan; gadia Eseter ungwan imo i Mordekai her, er sha shighe u a lu sha ikev na la nahan.

²¹Sha ayange la, er Mordekai tema hen hunda u tor yô, mbaerentom ken iyou i tor, ior ihiar, ka Bigetan kua Tereshi mbakuranhunda, asema vihi ve, nahan ve lu nôngon u wuan tor Ahasueru.

²²Kpa Mordekai ungwa kwagh ve la nahan a pase Eseter pendatyo u tor, Eseter di gema pase tor ken iti i Mordekai.

²³Er i time sha kwagh la, man i zua di a mi nahan yô, i sende ve uhar cii sha kon; man i nger kwagh ve ken ruamabera u abaver a utor sha ishigh ki tor.