Read tiv Eseter 8 Bible Online

Eseter 8 - tiv bible

Eseter 8

¹Sha iyange la je tor Ahasueru gema ya u Haman orihom u Mbayuda la, na pendatyo Eseter. Tsô Mordekai va sha ishigh ki tor, gadia Eseter pase er a lu vea na yô.

²Tor tsuwa kunya na u a ngohol hen Haman la, gema na Mordekai. Eseter gema ya u Haman la, wa sha ikev i Mordekai.

³Tsô Eseter shi ôr kwagh a tor, a gba un hen angahar, a zamber a na a mliam ashe je, er, a̱ bunde kwaghbo u Haman, Oragagu la, man kwagh u a hen sha Mbayuda la.

⁴Tsô tor naregh tôgh ku zenaria sha Eseter; nahan Eseter mough tile sha sha ishigh ki tor.

⁵A kaa er, aluer a doo tor yô, man aluer a doo un a mo yô, man kwagh shon una kuma tor, man mea lu sha ishima na yô, i̱ nger, i̱ bunde uwashika mba Haman wan u Hamadata Oragagu a nger sha u timin Mbayuda mba ve lu ken uipaven mba tor cii la;

⁶gadia me er nan man me fatyô u nengen ican i ia va tser ior ava? Shin me er nan man me fatyô u nengen mtim u tsombor wama?

⁷Tsô tor Ahasueru kaa a pendatyo na Eseter kua Mordekai Oryuda la er: Nenge, m vande nan Eseter ya u Haman; man wen yô i sende un sha kon kpaa, gadia a za uwegh sha Mbayuda.

⁸Yô, gba ngeren nen Mbayuda kwagh u a doo ne ken iti i tor tsô, ver nen ikav i tor sha mi; gadia kwaghngeren u i nger ken iti i tor man i ver un ikav sha kunya u tor yô, ma or nana fatyô u bunden un ga.

⁹Tsô hen shighe la je, i yila mbangeren mba tor, sha uwer u sha utar ka uwer u Shivan, ayange a u ikundu kar utar la; nahan i nger kwagh u Mordekai kaa Mbayuda cii man mbatarev kua ugomna man atiator a uipaven la, hii hen India zan zan ar hen Etiopia, ka uipaven deri man ikundu kar utaankaruhar, hen hanma tar sha mnger u u, man hen hanma ikurior kpaa sha zwa u i, man hen Mbayuda sha mnger ve man sha zwa ve kpaa.

¹⁰Tsô a nger ken iti i tor Ahasueru, a ver ikav sha mi sha kunya u tor, a tindi uwashika sha ikev i mbatyomov mba hendan anyinya a tor a yevese tsung, a i mar a hen ya u tor la;

¹¹a nger er, tor rumun er Mbayuda mba ve lu ken hanma gar, ve̱ kohol imôngo, ve̱ nôngo sha ci u uma ve, sha u saren man u wuan man u timin hanma ikumutya i ior man i ipaven cii, mba vea mough num a ve la, a mbayev mba kiriki kua kasev vev, man shi ve̱ kura inyarev vev ve̱ ya ishar,

¹²sha iyange i môm ken uipaven mba tor Ahasueru cii, ka sha iyange i sha pue kar utar sha uwer u sha pue kar uhar la, ka uwer u Adar je la.

¹³I kaa ken kwaghngeren la er, i̱ wa tindi la sha hanma ipaven, man i̱ yôô un hen akuraior cii, sha er Mbayuda ve̱ wa ago iyol sha ci u iyange la, ve̱ or iyev sha mbaihomov vev yô.

¹⁴Tsô mbatyomov mbala mba ve henda anyinya a tor a yevese tsung la, ve due, i torough a ve, i mgbegha ve sha imo i tor a kaa la; i yôô tindi la ken garutya u Shushan kpaa.

¹⁵Tsô Mordekai due sha ishigh ki tor a akondo a tor iyol, a kwel man a pupuu, man zegedyer u zenaria, man riga u sha ikondo i mou u pupuu man u vel vel man u nyian dindee; tsô gar u Shushan gba genger imo, ember.

¹⁶Mbayuda zua a iwanger man iember man ishima i saan saan man icivir.

¹⁷Ken hanma ipaven, man hanma gar, henpe imo i tor kaa la man tindi na nyôr yô, Mbayuda lu a iember man ishima i saan saan, ve yôr iwer, ve er iniongo. Nahan mbagenev kpishi ken akuraior a ken tar la, ve gema ve hingir Mbayuda, gadia ve lu cian Mbayuda.